ਪੀ.ਐੱਮ ਟਰੂਡੋ ਨੇ ਯੂਕਰੇਨ ਦੀ ਮਦਦ ਲਈ ਗੋਲਾ-ਬਰੂਦ ਤੇ ਅਸਾਲਟ ਰਾਈਫਲਾਂ ਦੇਣ ਦਾ ਕੀਤਾ ਐਲਾਨ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਰੂਸ ਨਾਲ ਜੰਗ ਵਿਚਕਾਰ ਯੂਕਰੇਨ ਦੀ ਮਦਦ ਲਈ 11,000 ਤੋਂ ਵੱਧ ਅਸਾਲਟ ਰਾਈਫਲਾਂ ਅਤੇ 9 ਮਿਲੀਅਨ ਰਾਊਂਡ ਗੋਲਾ-ਬਰੂਦ ਦਾਨ ਕਰਨ ਦਾ ਐਲਾਨ ਕੀਤਾ ਹੈ। ਸ਼ੁੱਕਰਵਾਰ ਨੂੰ ਉਨ੍ਹਾਂ ਨੇ ਨਿਊਫ਼ਿਨਲੈਂਡ ਅਤੇ ਲੈਬਰਾਡੋਰ ਦੇ ਸੇਂਟ ਜੌਨਜ਼ ਵਿੱਚ ਪ੍ਰੈੱਸ ਕਾਨਫਰੰਸ ਕੀਤੀ ਜਿੱਥੇ ਉਹ ਈਯੂ ਕੈਨੇਡਾ ਦੀ 19ਵੇਂ ਸਿਖਰ ਸੰਮੇਲਨ ਨੂੰ ਹੋਸਟ ਕਰ ਰਹੇ ਸਨ।

ਟਰੂਡੋ ਨੇ ਕਿਹਾ ਕਿ ਇਸ ਮਾਹੌਲ ਵਿੱਚ ਜਿੱਥੇ ਲੋਕਤੰਤਰ ਲਈ ਖਤਰਾ ਉੱਥੇ ਸਾਨੂੰ ਸਭ ਨੂੰ ਨਾਲ ਮਿਲ ਕੇ ਚੱਲਣ ਦੀ ਜ਼ਰੂਰਤ ਹੈ, ਇਸੇ ਲਈ ਕੈਨੇਡਾ ਲਗਾਤਾਰ ਯੂਕਰੇਨ ਦੇ ਨਾਲ ਖੜ੍ਹਾ ਹੈ। ਗੌਰਤਲਬ ਹੈ ਕਿ ਟਰੂਡੋ ਵੱਲੋਂ ਹੋਸਟ ਕੀਤੀ ਗਈ ਈਯੂ ਕੈਨੇਡਾ ਸਮਿਟ ਵਿੱਚ ਯੂਰਪੀਅਨ ਕੌਂਸਲ ਦੇ ਰਾਸ਼ਟਰਪਤੀ ਚਾਰਲਸ ਮਿਸ਼ੇਲ ਅਤੇ ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਸ਼ਾਮਲ ਹੋਏ।

ਕੈਨੇਡੀਅਨ ਪ੍ਰਧਾਨ ਮੰਤਰੀ ਅਤੇ ਯੂਰਪ ਦੇ ਪ੍ਰਮੁੱਖ ਲੀਡਰਾਂ ਵਿਚਕਾਰ ਹਰ ਦੋ ਸਾਲ ਬਾਅਦ ਇਹ ਮੀਟਿੰਗਾਂ ਹੁੰਦੀਆਂ ਹਨ। ਪਿਛਲੀ ਸਮਿਟ 2021 ਵਿੱਚ ਬ੍ਰਸਲਜ਼ ਵਿੱਚ ਹੋਈ ਸੀ।