ਵਿਦੇਸ਼ੀ ਦਖਲਅੰਦਾਜ਼ੀ ਨੂੰ ਲੈ ਕੇ ਪਾਰਲੀਮੈਂਟ 'ਚ ਟਰੂਡੋ ਅਤੇ ਪੋਲੀਵਰੇ 'ਚ ਝੜਪ

ਕੈਨੇਡੀਅਨ ਸੰਸਦ ਵਿਚ ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੋਲੀਵਰੇ ਵਿਚਕਾਰ ਵਿਦੇਸ਼ੀ ਦਖ਼ਲ ਦੇ ਮੁੱਦੇ ’ਤੇ ਜਮ ਕੇ ਬਹਿਸ ਹੋਈ। ਪੀ.ਐੱਮ.ਜਸਟਿਨ ਟਰੂਡੋ ਨੇ ਦੋਸ਼ ਲਗਾਇਆ ਕਿ ਕੰਜ਼ਰਵੇਟਿਵ ਲੀਡਰ ਵਲੋਂ ਆਪਣੇ ਉਨ੍ਹਾਂ ਐੱਮ.ਪੀ. ਤੇ ਸਾਬਕਾ ਸਾਂਸਦਾਂ ਦੇ ਨਾਮ ਜਾਣਨ ਲਈ ਜਾਣਬੁੱਕ ਕੇ ਸਕਿਓਰਿਟੀ ਕਲੀਅਰੈਂਸ ਨਹੀਂ ਲਈ ਜਾ ਰਹੀ ਜੋ ਵਿਦੇਸ਼ੀ ਦਖ਼ਲ ਵਿਚ ਸ਼ਾਮਲ ਹਨ। ਉਥੇ ਹੀ, ਪੋਲੀਵਰ ਨੇ ਇਸ ’ਤੇ ਛੋਟਾ ਪਰ ਤਿੱਖਾ ਪਲਟਵਾਰ ਕੀਤਾ, ਉਨ੍ਹਾਂ ਪ੍ਰਧਾਨ ਮੰਤਰੀ ਨੂੰ ਕਿਹਾ ਕਿ ਨਾਮ ਜਨਤਕ ਕਰ ਦਿਓ।

ਓਧਰ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕਈ ਕਾਰਨਾਂ ਕਰਕੇ ਉਹ ਖੁਫੀਆ ਜਾਣਕਾਰੀ ਸਾਰਿਆਂ ਵਿਚ ਜਾਰੀ ਨਹੀਂ ਕਰ ਸਕਦੇ ਪਰ ਪੋਲੀਵਰੇ ਨੂੰ ਉਨ੍ਹਾਂ ਸਿਆਸਤਦਾਨ ਦੇ ਨਾਮ ਦੇ ਸਕਦੇ ਹਨ ਤਾਂ ਜੋ ਉਹ ਪਾਰਟੀ ਦੇ ਹੋਰ ਮੈਂਬਰਾਂ ਨੂੰ ਵਿਦੇਸ਼ੀ ਦਖਲ ਤੋਂ ਬਚਾ ਕੇ ਰੱਖ ਸਕਣ।

ਇਸ ’ਤੇ ਪੋਲੀਵਰੇ ਨੇ ਫਿਰ ਪਲਟਵਾਰ ਕੀਤਾ, ਉਨ੍ਹਾਂ ਕਿਹਾ ਕਿ ਟਰੂਡੋ ਨਾਮ ਜਨਤਕ ਨਹੀਂ ਕਰਨਗੇ ਕਿਉਂਕਿ ਉਨ੍ਹਾਂ ਤੇ ਉਨ੍ਹਾਂ ਦੀ ਪਾਰਟੀ ਨੇ ਦੇਸ਼ ਦੇ ਹਿੱਤਾਂ ਨਾਲ ਸਮਝੌਤਾ ਕੀਤਾ ਹੈ।