ਟਰੂਡੋ ਨੇ ਅਮਰੀਕਾ ਦੇ ਟੈਰਿਫ ਖਿਲਾਫ ਜਵਾਬੀ ਕਦਮ ਚੁੱਕਣ ਦੀ ਕੀਤੀ ਘੋਸ਼ਣਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅਮਰੀਕਾ ਦੇ ਟੈਰਿਫ ਖਿਲਾਫ ਜਵਾਬੀ ਕਦਮ ਚੁੱਕਣ ਦੀ ਘੋਸ਼ਣਾ ਕੀਤੀ ਹੈ। ਕੈਨੇਡਾ-ਅਮਰੀਕਾ ਸੰਬੰਧਾਂ ਬਾਰੇ ਬਣਾਈ ਗਈ ਕੌਂਸਲ ਨਾਲ ਬੈਠਕ ਮਗਰੋਂ ਟਰੂਡੋ ਨੇ ਕਿਹਾ ਕਿ ਜੇ ਅਮਰੀਕਾ ਦੀ ਨਵੀਂ ਆਉਣ ਵਾਲੀ ਸਰਕਾਰ ਟੈਰਿਫ ’ਤੇ ਅੱਗੇ ਵਧਦੀ ਹੈ ਤਾਂ ਕੈਨੇਡਾ ਜਵਾਬੀ ਕਦਮ ਚੁੱਕਣ ਤੋਂ ਗੁਰੇਜ਼ ਨਹੀਂ ਕਰੇਗਾ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੈਨੇਡਾ ਯਕੀਨੀ ਤੌਰ ’ਤੇ ਰਿਸਪੌਡ ਕਰੇਗਾ ਅਤੇ ਹਰ ਤਰ੍ਹਾਂ ਦੀ ਸੰਭਾਵਨਾ ਨਾਲ ਕੈਨੇਡਾ ਤਿਆਰ ਹੈ।

ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵਲੋਂ ਕੈਨੇਡਾ-ਅਮਰੀਕਾ ਦੇ ਸਬੰਧਾਂ ’ਤੇ ਬਣਾਈ ਗਈ ਨਵੀਂ ਕੌਂਸਲ ਵਿਚ ਵਪਾਰ ਜਗਤ ਦੇ ਆਗੂ, ਨੀਤੀ ਮਾਹਰ ਅਤੇ ਸਾਬਕਾ ਸਿਆਸਤਦਾਨ ਸ਼ਾਮਲ ਹਨ, ਇਸ ਗਰੁੱਪ ਦਾ ਉਦੇਸ਼ ਕੈਨੇਡੀਅਨ ਮਾਲ ’ਤੇ ਅਮਰੀਕੀ ਟੈਰਿਫ ਦੇ ਖ਼ਤਰੇ ਦਾ ਜਵਾਬ ਦੇਣ ਲਈ ਸਰਕਾਰ ਦੀ ਮਦਦ ਕਰਨਾ ਹੈ।

ਟਰੂਡੋ ਵਲੋਂ ਟਰੰਪ ਦੇ ਟੈਰਿਫ ਦੇ ਮੱਦੇਨਜ਼ਰ ਅਗਲੇ ਸੋਮਵਾਰ ਅਤੇ ਮੰਗਲਵਾਰ ਨੂੰ ਕੈਬਨਿਟ ਬੈਠਕ ਵੀ ਬੁਲਾਈ ਗਈ ਹੈ। ਇਸ ਤੋਂ ਇਲਾਵਾ ਪ੍ਰਧਾਨ ਮੰਤਰੀ ਨੇ ਕਿਹਾ ਹੈ ਕਿ ਉਹ ਪ੍ਰੀਮੀਅਰ ਨਾਲ ਹਰ ਹਫ਼ਤੇ ਮੀਟਿੰਗ ਕਰਨਗੇ।