ਫ੍ਰੈਂਚ ਬੋਲਣ ਵਾਲੇ ਦੇਸ਼ਾਂ ਦੀ ਸਮਿਟ ਵਿਚ ਹਿੱਸਾ ਲੈਣ ਲਈ ਫਰਾਂਸ ਪਹੁੰਚੇ ਟਰੂਡੋ

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅੱਜ ਫਰਾਂਸ ਲਈ ਰਵਾਨਾ ਹੋ ਰਹੇ ਹਨ, ਜਿੱਥੇ ਉਹ ਫ੍ਰਾਂਕੋਫੋਨੀ ਸਮਿੱਟ ਵਿਚ ਹਿੱਸਾ ਲੈਣਗੇ। ਇਹ ਮੀਟਿੰਗ ਫਰਾਂਸੀਸੀ-ਭਾਸ਼ੀ ਦੇਸ਼ਾਂ ਵਿਚਾਲੇ ਸਹਿਯੋਗ ’ਤੇ ਕੇਂਦ੍ਰਿਤ ਹੈ, ਹਾਲਾਂਕਿ ਮੱਧ ਪੂਰਬ ਵਿਚ ਵੱਧ ਰਹੇ ਤਣਾਅ ਦਾ ਅਸਰ ਵੀ ਇਸ ’ਤੇ ਪੈਣ ਦੀ ਸੰਭਾਵਨਾ ਹੈ।

ਇਹ ਦੋ ਦਿਨਾਂ ਦੀ ਚੋਟੀ ਬੈਠਕ ਵੀਲਰ-ਕੋਤੇਰੇ ਅਤੇ ਪੈਰਿਸ ਵਿਚ ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ ਹੋਵੇਗੀ। ਇਸ ਦੌਰਾਨ ਟੂਨੀਸੀਆ ਤੋਂ ਫਰਾਂਸ ਫ੍ਰਾਂਕੋਫੋਨੀ ਦੀ ਪ੍ਰਧਾਨਗੀ ਸੰਭਾਲੇਗਾ।

ਇਸ ਸਾਲ ਦਾ ਥੀਮ “ਫਰਾਂਸੀਸੀ ਵਿਚ ਰਚੋ, ਨਵੀਨਤਾ ਲਿਆਓ ਅਤੇ ਕਾਰੋਬਾਰ ਕਰੋ” - ਮੈਂਬਰ ਦੇਸ਼ਾਂ ਵਿਚ ਸੰਸਕ੍ਰਿਤਿਕ, ਭਾਸ਼ਾਈ ਅਤੇ ਆਰਥਿਕ ਸਬੰਧ ਮਜ਼ਬੂਤ ਕਰਨ ’ਤੇ ਕੇਂਦ੍ਰਿਤ ਹੈ। ਨੇਤਾ ਫਰਾਂਸੀਸੀ ਭਾਸ਼ਾ ਦੇ ਪ੍ਰਚਾਰ, ਡਿਜ਼ੀਟਲ ਖੇਤਰ ਵਿਚ ਵਿਭਿੰਨਤਾ ਦੇ ਪ੍ਰਤੀਬਿੰਬ ਅਤੇ ਮੌਜੂਦਾ ਜਿਓਪਾਲੀਟਿਕ ਚੁਣੌਤੀਆਂ ’ਤੇ ਵੀ ਚਰਚਾ ਕਰਨਗੇ।

ਟਰੂਡੋ ਦੀ ਇਹ ਯਾਤਰਾ ਉਸ ਵੇਲੇ ਹੋ ਰਹੀ ਹੈ ਜਦੋਂ ਕੈਨੇਡਾ ਮੱਧ ਪੂਰਬ ਵਿਚ ਵੱਧ ਰਹੇ ਹਿੰਸਕ ਤਣਾਅ ਅਤੇ ਵਿਸ਼ਵ ਪੱਧਰ ’ਤੇ ਲੋਕਤਾਂਤਰਿਕ ਸਹਿਯੋਗ ਬਾਰੇ ਚਰਚਾਵਾਂ ਵਿਚ ਆਪਣਾ ਰੋਲ ਨਿਭਾ ਰਿਹਾ ਹੈ।