ਟਰੂਡੋ ਨੇ ਜੈਸਪਰ ’ਚ ਲੱਗੀ ਜੰਗਲੀ ਅੱਗ ਤੋਂ ਬਾਅਦ ਅਧਿਕਾਰੀਆਂ ਅਤੇ ਸੁਰੱਖਿਅਤ ਲੋਕਾਂ ਨਾਲ ਕੀਤੀ ਮੁਲਾਕਾਤ

ਐਲਬਰਟਾ ਦੇ ਜੈਸਪਰ ਵਿਚ ਲੱਗੀ ਭਿਆਨਕ ਅੱਗ ਸਬੰਧੀ ਜਾਇਜ਼ਾ ਲੈਣ ਲਈ ਪੀ. ਐੱਮ. ਟਰੂਡੋ ਬੀਤੇ ਦਿਨ ਹਿੰਟਨ ਦਾ ਦੌਰਾ ਕਰਨ ਪੁੱਜੇ। ਇੱਥੇ ਉਨ੍ਹਾਂ ਸੂਬੇ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਸਣੇ ਹੋਰ ਔਫੀਸ਼ੀਅਲਜ਼ ਨਾਲ ਗੱਲਬਾਤ ਕੀਤੀ ਅਤੇ ਤਾਜ਼ਾ ਹਾਲਾਤਾਂ ਸੰਬੰਧੀ ਅਪਡੇਸ਼ਨ ਲਈ। ਟਰੂਡੋ ਹਿੰਟਨ ਦੇ ਮੋਬਾਇਲ ਘਟਨਾ ਕਮਾਂਡ ਸੈਂਟਰ ਵਿਚ ਗਏ ਅਤੇ ਖਾਲੀ ਕਰਨ ਨੂੰ ਮਿਲੇ।

ਅੱਗ ਬੁਝਾਉਣ ਦੌਰਾਨ ਮਾਰੇ ਗਏ ਕੈਲਗਰੀ ਦੇ 24 ਸਾਲਾ ਫਾਇਰ ਫਾਈਟਰ ਨੂੰ ਸਨਮਾਨ ਦੇਣ ਲਈ ਉਨ੍ਹਾਂ ਮੂਵਮੈਂਟ ਆਫ ਸਾਈਲੈਂਸ ਵਿਚ ਹਿੱਸਾ ਲਿਆ। ਫਾਇਰ ਫਾਈਟਰ ਦੀ ਪਛਾਣ ਫਿਲਹਾਲ ਸਾਂਝੀ ਨਹੀਂ ਕੀਤੀ ਗਈ ਪਰ ਦੱਸਿਆ ਗਿਆ ਕਿ ਅੱਗ ਬੁਝਾਉਂਦੇ ਸਮੇਂ ਦਰੱਖਤ ਡਿੱਗਣ ਕਾਰਨ ਉਸ ਦੀ ਮੌਤ ਹੋ ਗਈ।

ਸਮਿਥ ਅਤੇ ਪੀ. ਐੱਮ. ਨੇ ਕਿਹਾ ਕਿ ਉਹ ਜੈਸਪਰ ਨੂੰ ਮੁੜ ਬਣਾਉਣ ਵਿਚ ਪੂਰਾ ਸਹਿਯੋਗ ਕਰਨਗੇ। ਉਹ ਸਿਰਫ ਇੱਥੋਂ ਦੇ ਰਿਹਾਇਸ਼ ਲਈ ਹੀ ਨਹੀਂ ਸਗੋਂ ਸੀਜ਼ਨਲ ਵਰਕਰ ਲਈ ਵੀ ਖੜ੍ਹੇ ਰਹਿਣਗੇ। ਗੌਰਤਲਬ ਹੈ ਕਿ ਜੈਸਪਰ ਨੈਸ਼ਨਲ ਪਾਰਕ ਅਤੇ ਟਾਊਨ ਤੋਂ 20,000 ਤੋਂ ਵਧੇਰੇ ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ ਸੀ। ਇਨ੍ਹਾਂ ਨੂੰ ਸੂਬੇ ਦੇ ਵੱਖ-ਵੱਖ ਰੈਸਕਿਊ ਸੈਂਟਰਜ਼ ਵਿਚ ਰੱਖਿਆ ਗਿਆ ਹੈ।