ਟਰੂਡੋ, ਪੋਲੀਵਰੇ ਨੇ ਹਮਾਸ ਦੇ ਪੱਖ ’ਚ ਨਾਅਰੇ ਲੱਗਣ ਦੀ ਪਾਰਲੀਮੈਂਟ ਹਿੱਲ ’ਚ ਕੀਤੀ ਨਿੰਦਾ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਵਿਰੋਧੀ ਧਿਰ ਦੇ ਲੀਡਰ ਪੀਅਰੇ ਪੋਲੀਵਰੇ ਨੇ ਪਾਰਲੀਮੈਂਟ ਹਿੱਲ ਵਿਖੇ ਇਜ਼ਰਾਇਲ ਖ਼ਿਲਾਫ਼ ਹੋਏ ਪ੍ਰਦਸ਼ਨ ਵਿਚ ਹਮਾਸ ਦੇ ਪੱਖ ਵਿਚ ਨਾਅਰੇ ਲੱਗਣ ਦੀ ਨਿੰਦਾ ਕੀਤੀ ਹੈ।

ਦੋਹਾਂ ਲੀਡਰਸ ਨੇ ਇਸ ਤਰ੍ਹਾਂ ਦੀਆਂ ਕਾਰਵਾਈਆਂ ਨੂੰ ਅਸਵੀਕਾਰਯੋਗ ਕਰਾਰ ਦਿੱਤਾ। ਸ਼ਨੀਵਾਰ ਫਲਸਤੀਨੀ ਝੰਡਿਆਂ ਨਾਲ ਪ੍ਰਦਸ਼ਨਕਾਰੀ ਇਕੱਠੇ ਹੋਏ ਸਨ। ਵਿਰੋਧ ਪ੍ਰਦਰਸ਼ਨ ਦੀ ਵੀਡੀਓ ਵਿਚ ਇੱਕ ਵਿਅਕਤੀ ਨੂੰ ਇਹ ਕਹਿੰਦੇ ਹੋਏ ਸੁਣਿਆ ਜਾ ਸਕਦਾ ਹੈ ਕਿ 7 ਅਕਤੂਬਰ ਦਾ ਹਮਲਾ ਇਸ ਗੱਲ ਦਾ ਸਬੂਤ ਹੈ ਕਿ ਅਸੀਂ ਆਜ਼ਾਦ ਹਾਂ। ਇਹ ਉਹੀ ਤਾਰੀਖ ਹੈ ਜਦੋਂ ਹਮਾਸ ਨੇ ਇਜ਼ਰਾਇਲ ’ਤੇ ਹਮਲਾ ਕੀਤਾ ਸੀ, ਜਿਸ ਵਿਚ ਲਗਭਗ 1,200 ਲੋਕ ਮਾਰੇ ਗਏ ਸਨ।

ਓਟਵਾ ਪੁਲਿਸ ਵਲੋਂ ਇਸ ਪ੍ਰਦਰਸ਼ਨ ਦੀ ਜਾਂਚ ਕੀਤੀ ਜਾ ਰਹੀ ਹੈ ਜਾਂ ਨਹੀਂ ਫਿਲਹਾਲ ਇਸ ਦੀ ਜਾਣਕਾਰੀ ਨਹੀਂ ਮਿਲ ਸਕੀ ਪਰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਪੋਲੀਵਰੇ ਨੇ ਇਹ ਸਪੱਸ਼ਟ ਕੀਤਾ ਹੈ ਕਿ ਕੈਨੇਡਾ ਵਿਚ ਸ਼ਾਂਤਮਈ ਵਿਰੋਧ ਪ੍ਰਦਰਸ਼ਨਾਂ ਲਈ ਸਭ ਦਾ ਹੱਕ ਹੈ ਪਰ ਇਸ ਦੀ ਆੜ ਵਿਚ ਨਫ਼ਰਤ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਸਕਦੀ, ਜਿਸ ਨਾਲ ਦੂਜੀ ਕਮਿਊਨਿਟੀ ਅਸੁਰੱਖਿਅਤ ਮਹਿਸੂਸ ਕਰੇ।

ਟਰੂਡੋ ਨੇ ਕਿਹਾ ਕਿ ਸ਼ਾਂਤਮਈ ਪ੍ਰਦਰਸ਼ਨ ਅਤੇ ਨਫ਼ਰਤ ਭਰੀਆਂ ਧਮਕੀਆਂ ਵਿਚ ਫਰਕ ਹੁੰਦਾ ਹੈ। ਕੈਨੇਡਾ ਵਿਚ ਨਫ਼ਰਤ ਦੀ ਕੋਈ ਥਾਂ ਨਹੀਂ। ਉਥੇ ਹੀ, ਕੰਜ਼ਰਵੇਟਿਵ ਆਗੂ ਨੇ ਕਿਹਾ ਕਿ ਮੈਂ ਇਨ੍ਹਾਂ ਹਿੰਸਾ ਪੱਖੀ ਅਤੇ ਯਹੂਦੀ ਵਿਰੋਧੀ ਨਾਅਰਿਆਂ ਦੀ ਨਿੰਦਾ ਕਰਦਾ ਹਾਂ।