9.74C Vancouver 9.74C VancouverJun 2, 2020 12:59 AM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਹਾ ਹੈ ਕਿ ਜੀ-7 ਮੁਲਕਾਂ ਦੇ ਸਮੂਹ ਵਿੱਚ ਰੂਸ ਦਾ ਸਵਾਗਤ ਕਰਨ ਦਾ ਸਮਾਂ ਅਜੇ ਦੂਰ ਹੈ।
ਰੂਸ ਨੂੰ ਮੁੜ੍ਹ ਇਸ ਸਮੂਹ ਵਿੱਚ ਸ਼ਾਮਲ ਕਰਨ ਸੰਬੰਧੀ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟ੍ਰੰਪ ਦੇ ਸੁਝਾਅ ਨੂੰ ਟਰੂਡੋ ਨੇ ਸਪਸ਼ਟ ਰੂਪ ਵਿੱਚ ਅਸਵੀਕਾਰ ਕਰ ਦਿੱਤਾ ਹੈ। ਜਮਹੂਰੀਅਤ ਦੇ ਮੋਹਰੀ ਮੁਲਕਾਂ ਦੇ ਜੀ-7 ਸਮੂਹ ਵਿੱਚੋਂ ਰੂਸ ਨੂੰ ਸਾਲ 2014 ਵਿੱਚ ਯੂਕਰੇਨ ਉੱਪਰ ਹਮਲਾ ਕਰਨ ਕਾਰਣ ਕੱਢਿਆ ਗਿਆ ਸੀ।
ਟ੍ਰੰਪ ਨੇ ਇਸੇ ਮਹੀਨੇ ਜੀ-7 ਸੰਮੇਲਨ ਦੀ ਮੇਜ਼ਬਾਨੀ ਕਰਨੀ ਸੀ ਪਰ ਅਮਰੀਕਾ ਵਿੱਚ ਚਲ ਰਹੇ ਮੁਜ਼ਾਹਰਿਆਂ ਕਾਰਣ ਟ੍ਰੰਪ ਨੇ ਇਹ ਸੰਮੇਲਨ ਇਸ ਸਾਲ ਦੀ ਪਤਝੜ ਰੁੱਤ ਤਕ ਟਾਲ਼ ਦਿੱਤਾ ਹੈ। ਟ੍ਰੰਪ ਨੇ ਮੁਲਕਾਂ ਦੇ ਇਸ “ਬਹੁਤ ਪੁਰਾਣੇ ਹੋ ਚੁੱਕੇ” ਸਮੂਹ ਨੂੰ ਸਮੇਂ ਦਾ ਹਾਣੀ ਬਣਾਉਣ ਲਈ ਰੂਸ, ਭਾਰਤ, ਦੱਖਣੀ ਕੋਰੀਆ ਅਤੇ ਅਸਟ੍ਰੇਲੀਆ ਨੂੰ ਜੀ-7 ਵਿੱਚ ਸ਼ਾਮਲ ਕਰਨ ਦਾ ਵਿਚਾਰ ਵੀ ਰੱਖਿਆ ਹੈ।
ਟਰੂਡੋ ਨੇ ਕਿਹਾ ਕਿ ਰੂਸ ਨੂੰ 2014 ਵਿੱਚ ਯੂਕਰੇਨ ਦੇ ਪੂਰਬੀ ਕਰਾਈਮੀਆ ਖੇਤਰ ਉੱਪਰ ਧਾਵਾ ਬੋਲਣ ਕਾਰਣ ਸਮੂਹ ਵਿੱਚੋਂ ਕੱਢਿਆ ਗਿਆ ਸੀ। ਉਦੋਂ ਇਸ ਸਮੂਹ ਨੂੰ ਜੀ-8 (G-8) ਕਿਹਾ ਜਾਂਦਾ ਸੀ।
ਟਰੂਡੋ ਨੇ ਕਿਹਾ ਕਿ ਉਦੋਂ ਤੋਂ ਰੂਸ ਦੁਨੀਆ ਵਿੱਚ ਅੜਿੱਕੇ ਪਾਉਣ ਵਾਲੀ ਤਾਕਤ ਰਿਹਾ ਹੈ।
ਟ੍ਰੰਪ ਨੇਰੂਸ ਨੂੰਜੀ-7 ਵਿੱਚ ਮੁੜ੍ਹ ਸ਼ਾਮਲ ਕਰਨ ਦਾ ਜ਼ਿਕਰ ਪਹਿਲੀ ਵਾਰੀ ਨਹੀਂ ਕੀਤਾ ਹੈ – ਦੋ ਸਾਲ ਪਹਿਲਾਂ ਵੀ ਟ੍ਰੰਪ ਨੇ ਇਹੋ ਜਿਹੀ ਟਿੱਪਣੀ ਕੀਤੀ ਸੀ ਜਦੋਂ ਚਾਰਲੀਵੋਈ, ਕਿਉਬੈੱਕ ਵਿੱਚ ਲੀਡਰਾਂ ਦੇ ਇਸ ਸੰਮੇਲਨ ਦੀ ਮੇਜ਼ਬਾਨੀ ਟਰੂਡੋ ਵੱਲੋਂ ਕੀਤੀ ਗਈ ਸੀ।
