ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਟਰੰਪ ਨਾਲ ਮਿਲ ਕੇ ਕੰਮ ਕਰਨ ਦੀ ਜਤਾਈ ਉਮੀਦ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਟਰੰਪ ਨਾਲ ਮਿਲ ਕੇ ਕੰਮ ਕਰਨ ਦੀ ਉਮੀਦ ਜਤਾਈ ਹੈ। ਕਿਊਬੈਕ ਦੇ ਮੋਂਟੇਬੈਲੋ ਵਿਚ ਦੋ ਦਿਨਾਂ ਕੈਬਨਿਟ ਬੈਠਕ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲ ਕਰਦੇ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅਮਰੀਕਾ ਲਈ ਸੁਨਹਿਰੀ ਯੁੱਗ ਦੀ ਸ਼ੁਰੂਆਤ ਕਰਨ ਲਈ ਰਾਸ਼ਟਰਪਤੀ ਟਰੰਪ ਨੂੰ ਕੈਨੇਡਾ ਦੀ ਲੋੜ ਪਵੇਗੀ, ਜਿੱਥੋਂ ਅਮਰੀਕਾ ਸਸਤੇ ਵਿਚ ਊਰਜਾ, ਸਟੀਲ, ਐਲੂਮੀਨੀਅਮ ਅਤੇ ਮਹੱਤਵਪੂਰਨ ਖਣਿਜ ਵਗੈਰਾ ਖਰੀਦਦਾ ਹੈ।

ਪੀ.ਐੱਮ. ਟਰੂਡੋ ਨੇ ਕਿਹਾ ਕਿ ਬਾਰਡਰ ਦੇ ਦੋਵੇਂ ਪਾਸੇ ਦੇ ਲੋਕਾਂ ਦੀ ਬਿਹਤਰੀ ਲਈ ਇਕਮਾਤਰ ਰਸਤਾ ਇਹੀ ਹੈ ਕਿ ਅਮਰੀਕਾ ਅਤੇ ਕੈਨੇਡਾ ਮਿਲ ਕੇ ਕੰਮ ਕਰਨਾ। ਇਸ ਦੇ ਨਾਲ ਹੀ ਟਰੂਡੋ ਨੇ ਇਹ ਵੀ ਚਿਤਾਵਨੀ ਦਿੱਤੀ ਕਿ ਜੇ ਟਰੰਪ ਕੈਨੇਡਾ ’ਤੇ ਟੈਰਿਫ ਲਗਾਉਣ ਦੀ ਯੋਜਨਾ ’ਤੇ ਅੱਗੇ ਵਧਦੇ ਹਨ ਤਾਂ ਕੈਨੇਡਾ ਇਸ ਦੀ ਸਖ਼ਤ ਪ੍ਰਤੀਕਿਰਿਆ ਦੇਵੇਗਾ।

ਪੀ.ਐੱਮ. ਟਰੂਡੋ ਨੇ ਇਹ ਵੀ ਦੱਸਿਆ ਕਿ ਅਮਰੀਕਾ ਦੇ ਟੌਪ 5 ਵਪਾਰਕ ਭਾਈਵਾਲਾਂ ਵਿਚੋਂ ਕੈਨੇਡਾ ਇਕਮਾਤਰ ਮੁਲਕ ਹੈ ਜਿਸ ਨਾਲ ਅਮਰੀਕਾ ਦਾ ਨਿਰਮਾਣ ਵਿਚ ਟਰੇਡ ਸਰਪਲਸ ਹੈ।

ਗੌਰਤਲਬ ਹੈ ਕਿ ਕੈਨੇਡਾ ਵਲੋਂ ਟਰੰਪ ਨੂੰ ਕੈਨੇਡੀਅਨ ਮਾਲ ’ਤੇ ਟੈਰਿਫ ਲਗਾਉਣ ਤੋਂ ਟਾਲਣ ਲਈ ਬਾਰਡਰ ’ਤੇ ਗੈਰ ਕਾਨੂੰਨੀ ਲਾਂਘੇ ਅਤੇ ਨਸ਼ਾ ਤਸਕਰੀ ’ਤੇ ਨਕੇਲ ਕੱਸਣ ਲਈ ਨਿਗਰਾਨੀ ਸਖ਼ਤ ਕੀਤੀ ਜਾ ਰਹੀ ਹੈ। ਟਰੰਪ ਨੇ ਪਹਿਲਾਂ ਅਹੁਦਾ ਸੰਭਾਲਣ ਦੇ ਪਹਿਲੇ ਹੀ ਦਿਨ ਟੈਰਿਫ ਲਾਗੂ ਕਰਨ ਦੀ ਧਮਕੀ ਦਿੱਤੀ ਸੀ ਪਰ ਫਿਲਹਾਲ ਲਈ ਇਸ ਨੂੰ ਟਾਲਿਆ ਗਿਆ ਹੈ।