22.96C Vancouver 22.96C VancouverSep 11, 2020 9:38 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਕਨੇਡੀਅਨ ਸਰਕਾਰ ਨੇ ਪੈਂਡੇਮਿਕ ਦੇ ਮੱਦੇਨਜ਼ਰ, ਉਸੇ ਵੇਲੇ ਤੋਂ ਤਿਆਰੀ ਕਰਨੀ ਸ਼ੁਰੂ ਕਰ ਦਿੱਤੀ ਸੀ, ਜਦ ਚੀਨ 'ਚ ਨਵੇਂ ਸਾਲ ਦੇ ਨੇੜੇ, ਨਿਮੋਨੀਆ ਦੇ ਨਿਵੇਕਲੇ ਕਿਸਮ ਦੇ ਮਾਮਲਿਆਂ ਦੀ ਜਾਣਕਾਰੀ ਉਜਾਗਰ ਹੋਣੀ ਸ਼ੁਰੂ ਹੋਈ ਸੀ।
ਫੈਡਰਲ ਸਰਕਾਰ 'ਤੇ ਸਵਾਲ ਉੱਠ ਰਹੇ ਹਨ ਕਿ ਕਨੇਡੀਅਨ ਲੋਕਾਂ ਨੂੰ ਇਸ ਵਾਇਰਸ ਸੰਬੰਧੀ ਸਿਹਤ ਅਤੇ ਵਿੱਤੀ ਮਾਰ ਨਾਲ ਜੁੜੀ ਚੇਤਾਵਨੀ ਦੇਣ ਲਈ ਯੋਗ ਕਦਮ ਨਹੀਂ ਚੁੱਕੇ ਗਏ।
ਕੈਨੇਡਾ ਦੀ ਚੀਫ਼ ਪਬਲਿਕ ਹੈਲਥ ਅਫ਼ਸਰ, ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਜਨਵਰੀ ਅਤੇ ਫਰਵਰੀ ਦੇ ਮਹੀਨੇ 'ਚ ਕੋਵਿਡ-19 ਸੰਬੰਧਤ ਬਹੁਤ ਸਾਰਾ ਕੰਮ ਕੀਤਾ ਗਿਆ ਸੀ, ਜਿਸ ਦੇ ਵਿੱਚ ਕੋਰੋਨਾ ਵਾਇਰਸ ਸੰਬੰਧੀ ਟੈਸਟਿੰਗ ਲਈ ਲੈਬਜ਼ ਨੂੰ ਤਿਆਰ ਕਰਨਾ ਵੀ ਸ਼ਾਮਿਲ ਸੀ।
ਫੈਡਰਲ ਸਿਹਤ ਮੰਤਰੀ ਪੈਟੀ ਹਾਏਡੂ ਬਾਰੇ ਕਿਹਾ ਜਾ ਰਿਹਾ ਹੈ ਕਿ ਉਨ੍ਹਾਂ 10 ਮਾਰਚ ਤੱਕ ਇਹ ਕਿਹਾ ਸੀ ਕਿ ਦੇਸ਼ 'ਚ ਇਸ ਵਾਇਰਸ ਦਾ ਖਤਰਾ ਬੇਹੱਦ ਘੱਟ ਹੈ, ਪਰ ਇਸ ਤੋਂ ਕਰੀਬ ਇੱਕ ਹਫ਼ਤੇ ਅੰਦਰ ਦੇਸ਼ ਦੇ ਵੱਡੇ ਹਿੱਸੇ ਨੂੰ ਲੌਕਡਾਊਨ ਕਰ ਦਿੱਤਾ ਗਿਆ ਸੀ।
