ਪੀ. ਐੱਮ. ਟਰੂਡੋ ਸਣੇ ਹੋਰ ਨੇਤਾਵਾਂ ਨੂੰ ਧਮਕੀ ਦੇਣ ਵਾਲੇ ਐਲਬਰਟਾ ਦੇ ਦੋ ਸ਼ੱਕੀ ਪੁਲਿਸ ਹਿਰਾਸਤ ਵਿਚ

ਐਡਮਿੰਟਨ ਅਤੇ ਕੈਲਗਰੀ ਦੇ ਰਹਿਣ ਵਾਲੇ ਦੋ ਵਿਅਕਤੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਸਣੇ ਹੋਰ ਕੈਨੇਡੀਅਨ ਸਿਆਸਤਦਾਨਾਂ ਨੂੰ ਔਨਲਾਈਨ ਧਮਕੀਆਂ ਦੇਣ ਦੇ ਚਾਰਜਿਜ਼ ਦਾ ਸਾਹਮਣਾ ਕਰ ਰਹੇ ਹਨ।

ਏਕੀਕ੍ਰਿਤ ਰਾਸ਼ਟਰੀ ਸੁਰੱਖਿਆ ਇਨਫੋਰਸਮੈਂਟ ਟੀਮ ਨੇ ਪਿਛਲੇ ਮਹੀਨੇ ਵੱਖ-ਵੱਖ ਜਾਂਚ ਦੌਰਾਨ ਦੋਹਾਂ ਨੂੰ ਹਿਰਾਸਤ ਵਿਚ ਲਿਆ ਸੀ। ਪੁਲਿਸ ਨੇ 6 ਜੂਨ ਨੂੰ ਕੈਲਗਰੀ ਦੇ ਰਹਿਣ ਵਾਲੇ 23 ਸਾਲਾ ਮੇਸਨ ਜੌਨ ਬੇਕਰ ਨੂੰ ਧਮਕੀਆਂ ਦੇਣ ਦੇ ਦੋਸ਼ ਵਿਚ ਹਿਰਾਸਤ ਵਿਚ ਲਿਆ ਹੈ ਅਤੇ ਅੱਜ ਅਦਾਲਤ ਵਿਚ ਪੇਸ਼ ਕੀਤਾ ਜਾਣਾ ਹੈ।

ਐਡਮਿੰਟਨ ਦੇ ਰਹਿਣ ਵਾਲੇ 67 ਸਾਲਾ ਗੈਰੀ ਬੇਲਜ਼ੇਵਿਕ ਨੂੰ 13 ਜੂਨ ਨੂੰ ਪੁਲਿਸ ਨੇ ਧਮਕੀਆਂ ਦੇਣ ਦੇ 3 ਦੋਸ਼ਾਂ ਤਹਿਤ ਹਿਰਾਸਤ ਵਿਚ ਲਿਆ ਅਤੇ ਉਸ ਨੂੰ ਵੀਰਵਾਰ ਅਦਾਲਤ ਵਿਚ ਪੇਸ਼ ਕੀਤਾ ਜਾਣਾ ਹੈ।

ਉਨ੍ਹਾਂ ਮੁਤਾਬਕ 10 ਮਈ ਨੂੰ ਸੋਸ਼ਲ ਮੀਡੀਆ ਹੈਂਡਲਰ ਐਕਸ ਰਾਹੀਂ ਉਨ੍ਹਾਂ ਨੇ ਪੀ. ਐੱਮ. ਟਰੂਡੋ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਸਨ। ਐਲਬਰਟਾ ਪੁਲਿਸ ਮੁਤਾਬਕ ਏਕੀਕ੍ਰਿਤ ਟੀਮ ਨੂੰ 7 ਜੂਨ ਨੂੰ ਜਾਣਕਾਰੀ ਮਿਲੀ ਸੀ ਕਿ ਯੂ-ਟਿਊਬਰ ਊਪਭੋਗਤਾ ਨੇ ਟਰੂਡੋ, ਡਿਪਟੀ ਪੀ. ਐੱਮ. ਕ੍ਰਿਸਟੀਆ ਫ੍ਰੀਲੈਂਡ ਅਤੇ ਫੈਡਰਲ ਐੱਨ.ਡੀ.ਪੀ. ਦੇ ਨੇਤਾ ਜਗਮੀਤ ਸਿੰਘ ਨੂੰ ਔਨਲਾਈਨ ਧਮਕੀਆਂ ਦਿੱਤੀਆਂ ਸਨ। ਇਸ ਜਾਂਚ ਵਿਚ ਕੈਨੇਡਾ ਦੀ ਨੈਸ਼ਨਲ ਸਕਿਓਰਟੀ ਪੁਲਿਸ ਨੇ ਵੀ ਮਦਦ ਕੀਤੀ।