ਕੈਨੇਡਾ-ਅਮਰੀਕਾ ਸਰਹੱਦ 'ਤੇ ਪ੍ਰਵਾਸੀਆਂ ਦੀ ਮੌਤ ਦੇ ਮਾਮਲੇ ਵਿਚ ਦੋ ਵਿਅਕਤੀਆਂ ਨੂੰ ਸੁਣਾਈ ਜਾਵੇਗੀ ਸਜ਼ਾ

ਮੈਨੀਟੋਬਾ ਵਿਚ ਕੈਨੇਡਾ-ਅਮਰੀਕਾ ਸਰਹੱਦ ਪਾਰ ਕਰਨ ਦੀ ਕੋਸ਼ਿਸ਼ ਦੌਰਾਨ ਭਾਰਤ ਦੇ ਗੁਜਰਾਤ ਨਾਲ ਸਬੰਧਤ 4 ਜੀਆਂ ਦੇ ਇੱਕ ਪਰਿਵਾਰ ਦੀ ਹੋਈ ਮੌਤ ਦੇ ਮਾਮਲੇ ਵਿਚ ਮਨੁੱਖੀ ਤਸਕਰੀ ਦੇ ਦੋਸ਼ੀ ਸਟੀਵ ਸ਼ੈਂਡ ਅਤੇ ਹਰਸ਼ਕੁਮਾਰ ਪਟੇਲ ਨੂੰ ਅੱਜ ਅਮਰੀਕਾ ਦੀ ਮਿਨੇਸੋਟਾ ਕੋਰਟਹਾਊਸ ਵਲੋਂ ਸਜ਼ਾ ਸੁਣਾਈ ਜਾਵੇਗੀ।

ਫਲੋਰੀਡਾ ਨਿਵਾਸੀ ਸ਼ੈਂਡ ਅਤੇ ਭਾਰਤੀ ਨਾਗਰਿਕ ਹਰਸ਼ਕੁਮਾਰ ਨੂੰ ਪਿਛਲੇ ਸਾਲ ਨਵੰਬਰ ਵਿਚ ਮਿਨੇਸੋਟਾ ਦੀ ਅਦਾਲਤ ਨੇ ਮਨੁੱਖੀ ਤਸਕਰੀ ਦਾ ਦੋਸ਼ੀ ਪਾਇਆ ਸੀ। ਮੁਕੱਦਮੇ ਵਿਚ ਇਹ ਵੀ ਸਾਹਮਣੇ ਆਇਆ ਸੀ ਕਿ ਇਹ ਦੋਵੇਂ ਦਸੰਬਰ 2021 ਤੇ ਜਨਵਰੀ 2022 ਵਿਚਕਾਰ ਮੈਨੀਟੋਬਾ ਅਤੇ ਮਿਨੇਸੋਟਾ ਵਿਚਾਲੇ ਕਈ ਮਨੁੱਖੀ ਤਸਕਰੀ ਵਿਚ ਸ਼ਾਮਲ ਸਨ।

ਇਸੇ ਕੜੀ ਤਹਿਤ 39 ਸਾਲਾ ਜਗਦੀਸ਼ ਪਟੇਲ ਅਤੇ ਉਸ ਦੀ 37 ਸਾਲਾ ਪਤਨੀ ਵੈਸ਼ਾਲੀ ਤੇ ਉਨ੍ਹਾਂ ਦੇ ਦੋ ਬੱਚਿਆਂ ਨੂੰ ਬਾਰਡਰ ਪਾਰ ਕਰਾਉਣ ਦੀ ਕੋਸ਼ਿਸ਼ ਹੋਈ ਸੀ ਪਰ ਬਰਫੀਲੇ ਤੂਫਾਨ ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ ਸੀ, 19 ਜਨਵਰੀ 2022 ਨੂੰ ਉਨ੍ਹਾਂ ਦੀਆਂ ਲਾਸ਼ਾਂ ਅਮਰੀਕਾ ਸਰਹੱਦ ਤੋਂ ਲਗਭਗ 12 ਕਿਲੋਮੀਟਰ ਪਹਿਲਾਂ ਮੈਨੀਟੋਬਾ ਵਿਚ ਬਰਫ਼ ਵਿਚ ਜੰਮੀਆਂ ਮਿਲੀਆਂ ਸਨ।