27.16C Vancouver 27.16C VancouverMar 31, 2022 11:15 PM - Connect News
ਵੈਨਕੂਵਰ ਪੁਲਿਸ ਨੇ ਅੱਜ ਸ਼ਹਿਰ 'ਚ ਹੋਏ 2 ਔਰਤਾਂ ਦੇ ਕਤਲ ਸੰਬੰਧਤ ਜਾਣਕਾਰੀ ਸਾਂਝੀ ਕਰਦੇ ਹੋਏ ਦੱਸਿਆ ਹੈ ਕਿ ਦੋਵਾਂ ਮਾਮਲਿਆਂ ਨੂੰ ਕੋਲਡ ਕੇਸ ਵੈਬਸਾਈਟ 'ਤੇ ਦਰਜ ਕਰ ਲਿਆ ਗਿਆ ਹੈ।
ਕਤਲ ਦੀਆਂ ਦੋਵੇਂ ਘਟਨਾਵਾਂ 3 ਦਹਾਕੇ ਤੋਂ ਵੀ ਵੱਧ ਸਮਾਂ ਪੁਰਾਣੀਆਂ ਹਨ।
ਪੁਲਿਸ ਨੇ ਅੱਜ ਜਾਣਕਾਰੀ ਸਾਂਝੀ ਕਰਦੇ ਹੋਏ ਆਸ ਜਾਹਿਰ ਕੀਤੀ ਹੈ ਕਿ ਕੋਈ ਇਨ੍ਹਾਂ 34 ਸਾਲ ਪੁਰਾਣੇ ਮਾਮਲਿਆਂ 'ਚ ਜਾਣਕਾਰੀ ਦੇਣ ਲਈ ਸਾਹਮਣੇ ਆਵੇਗਾ।
ਸਾਰਜੈਂਟ ਸਟੀਵ ਐਡੀਸਨ ਨੇ ਕਿਹਾ ਕਿ ਕਤਲ ਦਾ ਕੋਈ ਵੀ ਕੇਸ ਉਸ ਵੇਲੇ ਤਕ ਬੰਦ ਨਹੀਂ ਕੀਤਾ ਜਾਂਦਾ ਜਦ ਤਕ ਕਿ ਉਸ ਨੂੰ ਸੁਲਝਾ ਨਾ ਲਿਆ ਜਾਵੇ।
ਕਤਲ ਦੀਆਂ ਵਾਰਦਾਤਾਂ ਦੇ ਪੀੜਤਾਂ 'ਚ ਸ਼ਾਮਿਲ 2 ਔਰਤਾਂ ਦੀ ਪਛਾਣ ਗਲੈਨਾ ਸੌਵਨ ਅਤੇ ਲੀਜ਼ਾ ਗੈਵਿਨ ਵਜੋਂ ਹੋਈ ਹੈ।
ਜਾਣਕਾਰੀ ਦਿੱਤੀ ਗਈ ਕਿ ਦੋਵੇਂ ਔਰਤਾਂ ਦੋਸਤ ਸਨ ਅਤੇ ਦੋਵਾਂ ਦਾ ਕਤਲ 6 ਹਫਤਿਆਂ ਦੇ ਫਰਕ 'ਤੇ ਹੋਇਆ ਸੀ।
ਲੀਜ਼ਾ ਗੈਵਿਨ ਦਾ ਮ੍ਰਿਤ ਸ਼ਰੀਰ 13 ਅਗਸਤ 1988 ਨੂੰ ਨਾਈਟ ਸਟ੍ਰੀਟ ਅਤੇ ਈਸਟ 49 ਐਵੀਨਿਊ ਕੋਲ ਮਿਲਿਆ ਸੀ।
ਪੁਲਿਸ ਨੇ ਦੱਸਿਆ ਕਿ ਗਾਈਵੀਂ ਇੱਕ ਸੈਕਸ ਵਰਕਰ ਸੀ ਅਤੇ 12 ਅਗਸਤ ਦੀ ਰਾਤ ਆਪਣੇ ਦੋਸਤ ਦੇ ਅਪਾਰਟਮੈਂਟ ਤੋਂ ਨਿਕਲਦੇ ਹੋਏ ਉਸ ਨੇ ਆਖਿਆ ਸੀ ਕਿ ਉਹ ਇੱਕ ਘੰਟੇ 'ਚ ਵਾਪਿਸ ਪਰਤ ਆਵੇਗੀ।
ਗਲੈਨਾ ਸੌਵਨ ਬਾਰੇ ਦੱਸਿਆ ਗਿਆ ਕਿ ਉਹ ਵੀ ਇੱਕ ਸੈਕਸ ਵਰਕਰ ਸੀ ਅਤੇ ਉਸ ਦਾ ਮ੍ਰਿਤ ਸ਼ਰੀਰ 30 ਸਿਤੰਬਰ 1988 ਨੂੰ ਵੈਸਟ 24 ਐਵੀਨਿਊ ਅਤੇ ਵਿਲੋ ਸਟ੍ਰੀਟ 'ਚ ਝਾੜੀਆਂ ਵਾਲੇ ਇਲਾਕੇ 'ਚ ਮਿਲਿਆ ਸੀ।
ਸਾਰਜੈਂਟ ਸਟੀਵ ਐਡੀਸਨ ਨੇ ਦੱਸਿਆ ਕਿ ਸਾਲਾਂ ਤੋਂ ਜਾਂਚ ਅਧਿਕਾਰੀਆਂ ਨੇ ਸਬੂਤ ਇਕੱਤਰ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ਪਰ ਕਾਤਲ ਪੁਲਿਸ ਦੇ ਹੱਥੇ ਨਹੀਂ ਚੜ੍ਹ ਸਕੇ।
ਪੁਲਿਸ ਨੇ ਦੋਵਾਂ ਪੀੜਤਾਂ ਦੀ ਤਸਵੀਰ ਸਾਂਝੀ ਕਰਦੇ ਹੋਏ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਕੋਈ ਜਾਣਕਾਰੀ ਹੋਵੇ ਤਾਂ ਸਾਂਝੀ ਕੀਤੀ ਜਾਵੇ।
ਪੁਲਿਸ ਵੱਲੋਂ ਜਾਰੀ ਜਾਣਕਾਰੀ ਪੜ੍ਹਨ ਲਈ ਲਿੰਕ ਕਲਿਕ ਕਰੋ:
https://vpd.ca/news/2022/03/31/two-unsolved-murders-added-to-vpd-cold-cases-website/
