20.26C Vancouver 20.26C VancouverJan 22, 2026 5:49 PM - Connect Newsroom - Ramandeep Kaur with files from The Canadian Press
ਪੀ.ਐਮ.ਮਾਰਕ ਕਾਰਨੀ ਵਲੋਂ ਦਾਵੋਸ ਵਿਚ ਦਿੱਤੇ ਭਾਸ਼ਣ ਤੋਂ ਟਰੰਪ ਪ੍ਰਸ਼ਾਸਨ ਭੜਕਿਆ ਹੋਇਆ ਹੈ। ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਕਾਮਰਸ ਸੈਕਟਰੀ ਹਾਵਰਡ ਲੂਟਨਿਕ ਨੇ ਬਲੂਮਬਰਗ ਟੀਵੀ 'ਤੇ ਗੱਲਬਾਤ ਕਰਦਿਆਂ ਕਾਰਨੀ ਦੇ ਭਾਸ਼ਣ ਨੂੰ ਮਹਿਜ਼ ਸਿਆਸੀ ਰੌਲਾ ਕਰਾਰ ਦਿੱਤਾ ਅਤੇ ਕੈਨੇਡਾ ਦੀ ਚੀਨ ਨਾਲ ਡੀਲ ਦੀ ਤਿੱਖੀ ਆਲੋਚਨਾ ਕੀਤੀ।
ਲੂਟਨਿਕ ਨੇ ਕਿਹਾ ਕਿ ਕੈਨੇਡਾ ਕੋਲ ਅਮਰੀਕਾ ਨਾਲ ਦੁਨੀਆ ਦੀ ਦੂਜੀ ਸਭ ਤੋਂ ਵੱਡੀ ਡੀਲ ਹੈ, ਜਿਸ ਤਹਿਤ 85 ਫੀਸਦੀ ਕੈਨੇਡੀਅਨ ਵਪਾਰ ਜ਼ੀਰੋ ਟੈਰਿਫ ਦੇ ਹੋ ਰਿਹਾ ਹੈ ਅਤੇ ਫਿਰ ਵੀ ਕਾਰਨੀ ਸ਼ਿਕਾਇਤਾਂ ਕਰ ਰਹੇ ਹਨ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਔਟਵਾ ਦਾ ਚੀਨ ਨਾਲ ਹਾਲੀਆ ਵਪਾਰ ਸਮਝੌਤਾ ਸੀ.ਯੂ.ਐਸ.ਐਮ.ਏ. ਯਾਨੀ ਕੈਨੇਡਾ-ਅਮਰੀਕਾ-ਮੈਕਸੀਕੋ ਵਿਚਕਾਰ ਮੌਜੂਦਾ ਸਮੇਂ ਚੱਲ ਰਹੇ ਸਮਝੌਤੇ 'ਤੇ ਅੱਗੇ ਹੋਣ ਵਾਲੀ ਗੱਲਬਾਤ ਨੂੰ ਵਿਗਾੜ ਸਕਦਾ ਹੈ।
ਲੂਟਨਿਕ ਨੇ ਪ੍ਰਧਾਨ ਮੰਤਰੀ ਦੇ ਚੀਨ ਦੌਰੇ 'ਤੇ ਨਿਸ਼ਾਨਾ ਸਾਧਦੇ ਕਿਹਾ ਕਿ ਕੀ ਤੁਹਾਨੂੰ ਲੱਗਦਾ ਹੈ ਕਿ ਚੀਨ ਕੈਨੇਡਾ ਦੇ ਐਕਸਪੋਰਟ ਲਈ ਆਪਣੇ ਦਰਵਾਜ਼ੇ ਖੋਲ੍ਹ ਦੇਵੇਗਾ? ਇਹ ਸਭ ਮੂਰਖਤਾ ਭਰੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਚੀਨ ਸਿਰਫ ਤਹਾਨੂੰ ਆਪਣਾ ਮਾਲ ਵੇਚੇਗਾ।
ਗੌਰਤਲਬ ਹੈ ਕਿ ਬੀਤੇ ਕੱਲ੍ਹ ਟਰੰਪ ਨੇ ਵੀ ਸਿੱਧੇ ਤੌਰ 'ਤੇ ਪ੍ਰਧਾਨ ਮੰਤਰੀ ਦਾ ਨਾਂ ਲੈਂਦੇ ਹੋਏ ਉਨ੍ਹਾਂ ਦੇ ਭਾਸ਼ਣ 'ਤੇ ਨਾਰਾਜ਼ਗੀ ਜਤਾਈ ਸੀ ਅਤੇ ਕਿਹਾ ਸੀ ਕੀ ਕੈਨੇਡਾ ਦਾ ਵਜੂਦ ਅਮਰੀਕਾ ਕਾਰਨ ਹੈ ਅਤੇ ਕਾਰਨੀ ਨੂੰ ਅੱਗੇ ਤੋਂ ਇਹ ਗੱਲ ਯਾਦ ਰੱਖਣੀ ਚਾਹੀਦੀ ਹੈ।
