17.12C Vancouver 17.12C VancouverJan 17, 2020 9:33 PM -
ਹੁਆਵੇ ਦੀ ਚੀਫ ਫਾਇਨੈਨਸ਼ੀਅਲ ਔਫੀਸਰ (CFO) ਮੈਂਗ ਵਾਨਜ਼ੂ ਨੇ ਨਵੇਂ ਸਾਲ 'ਚ ਪਹਿਲੀ ਵਾਰ ਅਦਾਲਤ 'ਚ ਹਾਜ਼ਰੀ ਭਰੀ।
ਵੈਨਕੂਵਰ ਡਾਊਨਟਾਊਨ 'ਚ ਮੈਂਗ ਵਾਨਜ਼ੂ, ਸ਼ੁੱਕਰਵਾਰ ਸਵੇਰੇ ਅਦਾਲਤ ਪਹੁੰਚਦੀ ਨਜਰ ਆਈ। ਸ਼ੁੱਕਰਵਾਰ ਦੀ ਪੇਸ਼ੀ ਕੇਸ ਮੈਨੇਜਮੈਂਟ ਕਾਨਫਰੰਸ ਨਾਲ ਸੰਬੰਧਤ ਸੀ।
ਇਸ ਦੌਰਾਨ ਜੱਜ, ਕਨੇਡੀਅਨ ਸਰਕਾਰੀ ਵਕੀਲ ਅਤੇ ਮੈਂਗ ਦਾ ਬਚਾਅ ਕਰ ਰਹੀ ਟੀਮ ਨੇ ਅੱਗੇ ਦੀਆਂ ਤਰੀਕਾਂ ਬਾਰੇ ਗੱਲਬਾਤ ਕੀਤੀ।
ਕਰੀਬ 30 ਮਿਨਟ ਤਕ ਬੀ.ਸੀ. ਸੁਪ੍ਰੀਮ ਕੋਰਟ 'ਚ ਹਾਜਿਰ ਰਹਿਣ ਤੋਂ ਬਾਅਦ, ਮੈਂਗ ਵਾਨਜੂ ਆਪਣੀ ਟੀਮ ਦੇ ਨਾਲ ਉਥੋਂ ਰਵਾਨਾ ਹੋ ਗਈ। ਇਸ ਦੌਰਾਨ ਕੁਝ ਸਿਕਿਉਰਿਟੀ ਗਾਰਡ ਵੀ ਉਨ੍ਹਾਂ ਨਾਲ ਮੌਜੂਦ ਸਨ।
ਇਸ ਦੌਰਾਨ ਹੁਆਵੇ ਐਗਜ਼ੀਕਿਊਟਿਵ (Huawei Executive) ਦਾ ਬਚਾਅ ਕਰ ਰਹੇ ਵਕੀਲਾਂ ਨੇ, ਕਰਾਊਨ ਅਟੌਰਨੀਆਂ 'ਤੇ ਇਲਜ਼ਾਮ ਲਗਾਏ ਕਿ ਓਹ ਕੈਨੇਡਾ ਤੋਂ ਮੈਂਗ ਦੀ ਐਕਸਟ੍ਰੈਡੀਸ਼ਨ (extradition) ਲਈ ਅਮਰੀਕੀ ਸੈਂਕਸ਼ਨ ਕਨੂੰਨ ਦਾ ਸਹਾਰਾ ਲੈ ਰਹੇ ਹਨ।
ਸੂਬੇ ਦੇ ਸੁਪ੍ਰੀਮ ਕੋਰਟ ਵੱਲੋਂ ਸ਼ੁੱਕਰਵਾਰ ਨੂੰ ਜਾਰੀ ਕੀਤੇ ਗਏ ਦਸਤਾਵੇਜ਼ਾਂ 'ਚ ਮੈਂਗ ਦੇ ਵਕੀਲਾਂ ਨੇ ਆਖਿਆ ਹੈ ਕਿ ਕੈਨੇਡਾ ਨੇ ਇਰਾਨ ਖਿਲਾਫ ਅਮਰੀਕੀ ਸੈਂਕਸ਼ਨ ਨੂੰ ਖਾਰਿਜ ਕੀਤਾ ਹੈ, ਅਤੇ ਨਾ ਸਿਰਫ ਬੈਂਕਾਂ ਨੂੰ ਇਰਾਨ ਨਾਲ ਵਪਾਰ ਕਰਨ ਦੀ ਇਜਾਜ਼ਤ ਹੈ, ਬਲਕਿ ਅਜਿਹਾ ਕਰਨ ਲਈ ਉਨ੍ਹਾਂ ਨੂੰ ਉਤਸ਼ਾਹਿਤ ਵੀ ਕੀਤਾ ਜਾਂਦਾ ਹੈ।
ਵਕੀਲਾਂ ਨੇ ਆਖਿਆ ਕਿ ਮੈਂਗ ਵਾਨਜ਼ੂ ਦੀ ਅਮਰੀਕਾ ਨੂੰ ਸਪੁਰਦਗੀ ਨਹੀਂ ਹੋਣੀ ਚਾਹੀਦੀ, ਕਿਉਂਕਿ ਕੈਨੇਡਾ ਦੇ ਕਨੂੰਨ ਅਨੁਸਾਰ ਉਨ੍ਹਾਂ ਕੋਈ ਅਪਰਾਧ ਨਹੀਂ ਕੀਤਾ।
ਚੀਨ ਦੀ ਦਿੱਗਜ ਟੈਲੀਕਾਮ ਕੰਪਨੀ ਹੁਆਵੇ ਦੀ ਐਗਜ਼ੀਕਿਊਟਿਵ, ਮੈਂਗ ਵਾਨਜ਼ੂ 1 ਦਿਸੰਬਰ 2018 ਨੂੰ ਵੈਨਕੂਵਰ ਹਵਾਈ ਅੱਡੇ ਤੋਂ ਗਿਰਫਤਾਰ ਕੀਤਾ ਗਿਆ ਸੀ ਅਤੇ ਇਹ ਗਿਰਫਤਾਰੀ ਅਮਰੀਕਾ ਦੀ ਮੰਗ ਤੇ ਕੀਤੀ ਗਈ ਸੀ।
ਅਮਰੀਕਾ ਨੇ ਠੱਗੀ ਦੇ ਮਾਮਲੇ ਵਿਚ ਮੈਂਗ ਵਾਨਜ਼ੂ ਦੀ ਸਪੁਰਦਗੀ ਦੀ ਮੰਗ ਕੀਤੀ ਹੈ।
ਮੈਂਗ ਵਾਨਜ਼ੂ ਅਤੇ ਹੁਆਵੇ ਨੇ ਲਗਾਤਾਰ ਕਿਸੇ ਵੀ ਕਿਸਮ ਦੀ ਗਲਤ ਹਰਕਤ ਤੋਂ ਇਨਕਾਰ ਕੀਤਾ ਹੈ।
