ਯੂ.ਐੱਸ. ਸੈਨੇਟਰਾਂ ਨੇ ਟਰੂਡੋ ਨੂੰ ਲਿਖਿਆ ਪੱਤਰ, ਕੈਨੇਡਾ ਨੂੰ ਨਾਟੋ ਦੇ ਖਰਚੇ ਦੇ ਟੀਚੇ ਨੂੰ ਪੂਰਾ ਕਰਨ ਦੀ ਕੀਤੀ ਅਪੀਲ

ਕੈਨੇਡਾ ’ਤੇ ਨਾਟੋ ਦੇ ਮੈਂਬਰ ਵਜੋਂ ਡਿਫੈਂਸ ’ਤੇ ਖ਼ਰਚ ਵਧਾਉਣ ਦਾ ਦਬਾਅ ਵੱਧ ਰਿਹਾ ਹੈ। ਅਮਰੀਕੀ ਸੈਨੇਟਰਾਂ ਦੇ ਇੱਕ ਗਰੁੱਪ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਇਹ ਸਿੱਧੇ ਤੌਰ ’ਤੇ ਅਪੀਲ ਕੀਤੀ ਹੈ ਕਿ ਕੈਨੇਡਾ ਡਿਫੈਂਸ ’ਤੇ ਆਪਣੀ ਜੀ. ਡੀ. ਪੀ. ਦਾ ਘੱਟੋ-ਘੱਟ ਦੋ ਫੀਸਦੀ ਖ਼ਰਚ ਕਰਨ ਦੇ ਨਾਟੋ ਟੀਚੇ ਨੂੰ ਪੂਰਾ ਕਰੇ।

ਟਰੂਡੋ ਨੂੰ 23 ਅਮਰੀਕੀ ਸੈਨੇਟਰਾਂ ਵਲੋਂ ਲਿਖੇ ਪੱਤਰ ਵਿਚ ਕਿਹਾ ਗਿਆ ਹੈ ਕਿ ਕੈਨੇਡਾ ਨਾਟੋ ਗਠਜੋੜ ਪ੍ਰਤੀ ਆਪਣੀਆਂ ਵਚਨਬੱਧਤਾਵਾਂ ਨੂੰ ਬਰਕਰਾਰ ਰੱਖਣ ਵਿਚ ਅਸਫਲ ਹੋ ਰਿਹਾ ਹੈ। ਇਹ ਪੱਤਰ ਉਸ ਸਮੇਂ ਲਿਖਿਆ ਗਿਆ ਹੈ ਜਦੋਂ ਲਗਭਗ ਦੋ ਮਹੀਨਿਆਂ ਮਗਰੋਂ ਅਮਰੀਕਾ ਨਾਟੋ ਦੀ ਸਲਾਨਾ ਸਿਖਰ ਸੰਮੇਲਨ ਨੂੰ ਹੋਸਟ ਕਰਨ ਵਾਲਾ ਹੈ।

ਅਮਰੀਕੀ ਸੈਨੇਟਰਾਂ ਨੇ ਪੱਤਰ ਵਿਚ ਲਿਖਿਆ ਕਿ ਸਾਨੂੰ ਇਸ ਗੱਲ ਦੀ ਚਿੰਤਾ ਅਤੇ ਡੂੰਘੀ ਨਿਰਾਸ਼ਾ ਹੈ ਕਿ ਕੈਨੇਡਾ ਦੇ ਸਭ ਤੋਂ ਤਾਜ਼ਾ ਅਨੁਮਾਨਾਂ ਮੁਤਾਬਕ, ਉਹ ਇਸ ਦਹਾਕੇ ਵਿਚ ਦੋ ਫੀਸਦੀ ਟਾਰਗੇਟ ਤੱਕ ਨਹੀਂ ਪਹੁੰਚੇਗਾ, ਜਿਸ ਦਾ ਮਤਲਬ ਹੈ ਕਿ ਕੈਨੇਡਾ ਨਾਟੋ ਗਠਜੋੜ ਪ੍ਰਤੀ ਆਪਣੀਆਂ ਜ਼ਿੰਮੇਵਾਰੀਆਂ ਨੂੰ ਪੂਰਾ ਕਰਨ ਵਿਚ ਲਗਾਤਾਰ ਅਸਫਲ ਰਹੇਗਾ।

ਗੌਰਤਲਬ ਹੈ ਕਿ ਲਿਬਰਲ ਸਰਕਾਰ ਹੁਣ ਤੱਕ ਇਹ ਨਹੀਂ ਦੱਸ ਸਕੀ ਉਹ ਕਦੋਂ ਤੱਕ ਨਾਟੋ ਦੇ ਦੋ ਫੀਸਦੀ ਟੀਚੇ ਨੂੰ ਪੂਰਾ ਕਰੇਗੀ। ਸਰਕਾਰ ਦਾ ਕਹਿਣਾ ਹੈ ਕਿ 2029-30 ਤੱਕ ਡਿਫੈਂਸ ’ਤੇ ਖ਼ਰਚ ਜੀ. ਡੀ. ਪੀ. ਦੇ 1.76 ਤੱਕ ਹੀ ਪਹੁੰਚਣ ਦਾ ਅਨੁਮਾਨ ਹੈ।