26.93C Vancouver 26.93C VancouverSep 22, 2023 5:40 PM - The Canadian Press
ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਪਾਰਲੀਮੈਂਟ ਹਿੱਲ 'ਤੇ ਪਹੁੰਚ ਗਏ ਹਨ, ਜਿੱਥੇ ਸਭ ਤੋਂ ਪਹਿਲਾਂ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਉਨ੍ਹਾਂ ਦਾ ਸੁਆਗਤ ਕੀਤਾ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਉਨ੍ਹਾਂ ਦੀ ਮੁਲਾਕਾਤ ਹਾਊਸ ਤੇ ਸੈਨੇਟ ਦੇ ਲੀਡਰਾਂ, ਵਿਰੋਧੀ ਪਾਰਟੀ ਦੇ ਲੀਡਰਾਂ ਅਤੇ ਕੁੱਝ ਹੋਰ ਚੁਣੇ ਹੋਏ ਨੁਮਾਇੰਦਿਆਂ ਨਾਲ ਕਰਵਾਈ।
ਜਿਸ ਤੋਂ ਬਾਅਦ ਜ਼ੇਲੇਨਸਕੀ ਤੇ ਟਰੂਡੋ ਇੱਕ ਮੀਟਿੰਗ ਲਈ ਬੰਦ ਕਮਰੇ ਵਿੱਚ ਚਲੇ ਗਏ।
ਦੱਸ ਦਈਏ ਕਿ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਵੱਲੋਂ ਕੈਨੇਡਾ ਦੀ ਪਾਰਲੀਮੈਂਟ ਨੂੰ ਸੰਬੋਧਨ ਵੀ ਕੀਤਾ ਜਾਣਾ ਹੈ।
ਫ਼ਰਵਰੀ 2022 ਵਿੱਚ ਰੂਸ ਵੱਲੋਂ ਯੂਕਰੇਨ ‘ਤੇ ਕੀਤੇ ਹਮਲੇ ਤੋਂ ਬਾਅਦ ਜ਼ੇਲੇਨਸਕੀ ਦਾ ਇਹ ਪਹਿਲਾ ਅਧਿਕਾਰਤ ਕੈਨੇਡੀਅਨ ਦੌਰਾ ਹੈ।
ਇਸ ਦੌਰੇ ਦੌਰਾਨ ਉਨ੍ਹਾਂ ਦੀ ਪਤਨੀ ਓਲੇਨਾ ਜ਼ੈਲੈਂਸਕਾ ਵੀ ਔਟਵਾ ਪਹੁੰਚੇ ਹਨ।
ਇਸ ਫੇਰੀ ਦੌਰਾਨ ਟਰੂਡੋ ਅਤੇ ਜ਼ੇਲੇਨਸਕੀ ਦੋਵੇਂ ਦੇਸ਼ਾਂ ਦਰਮਿਆਨ ਆਰਥਿਕ ਰਿਸ਼ਤੇ ਮਜ਼ਬੂਤ ਕਰਨ ਬਾਰੇ ਇੱਕ ਸਮਝੌਤੇ ‘ਤੇ ਦਸਤਖ਼ਤ ਕਰਨਗੇ।
ਜ਼ਿਕਰਯੋਗ ਹੈ ਕਿ ਕੈਨੇਡਾ ਯੂਕਰੇਨ ਨੂੰ 4.95 ਬਿਲੀਅਨ ਡਾਲਰ ਦੀ ਵਿੱਤੀ ਮਦਦ ਅਤੇ 1.8 ਬਿਲੀਅਨ ਦੀ ਫ਼ੌਜੀ ਮਦਦ ਪ੍ਰਦਾਨ ਕਰ ਚੁੱਕਾ ਹੈ।
ਇਸ ਮਦਦ ਵਿੱਚ ਹਥਿਆਰ, ਗੋਲਾ ਬਾਰੂਦ, ਟੈਂਕ ਅਤੇ ਯੂਕਰੇਨੀ ਫੌਜੀਆਂ ਦੀ ਸਿਖਲਾਈ ਵੀ ਸ਼ਾਮਲ ਹੈ।
