ਸਟੈਲੈਂਟਿਸ ਬ੍ਰੈਂਪਟਨ ਜੀਪ ਕੰਪਾਸ ਨੂੰ ਇਲੀਨੋਇਸ ਵੱਲ ਤਬਦੀਲ ਕਰ ਰਿਹਾ ਹੈ:ਯੂਨੀਫੋਰ

ਕੈਨੇਡਾ ਵਿਚ ਸਟੈਲੈਂਟਿਸ ਨੇ ਜੀਪ ਕੰਪਾਸ ਦਾ ਨੈਕਸਟ ਜਨਰੇਸ਼ਨ ਮਾਡਲ ਬਣਾਉਣ ਦਾ ਫੈਸਲਾ ਟਾਲ ਦਿੱਤਾ ਹੈ ਅਤੇ ਕਿਹਾ ਕਿ ਉਹ ਬਰੈਂਪਟਨ ਦੀ ਬਜਾਏ ਅਮਰੀਕਾ ਦੇ ਇਲੀਨੋਇਸ ਸਥਿਤ ਆਪਣੀ ਫੈਕਟਰੀ ਵਿਚ ਇਸ ਦਾ ਉਤਪਾਦਨ ਕਰੇਗੀ। ਸਟੈਲੈਂਟਿਸ ਨੇ ਮੰਗਲਵਾਰ ਰਾਤ ਇਸ ਦਾ ਐਲਾਨ ਕੀਤਾ। ਕੰਪਨੀ ਨੇ ਕਿਹਾ ਕਿ ਉਹ ਅਮਰੀਕਾ ਵਿਚ ਆਪਣੀ ਨਿਰਮਾਣ ਸਮਰੱਥਾ ਨੂੰ ਵਧਾਉਣ ਲਈ ਅਗਲੇ ਚਾਰ ਸਾਲਾਂ ਵਿਚ 13 ਬਿਲੀਅਨ ਅਮਰੀਕੀ ਡਾਲਰ ਦਾ ਨਿਵੇਸ਼ ਕਰੇਗੀ।

ਸਟੈਲੈਂਟਿਸ ਦੇ ਇਸ ਫੈਸਲੇ ਦੀ ਕੈਨੇਡੀਅਨ ਯੂਨੀਅਨ,ਬਰੈਂਪਟਨ ਦੇ ਮੇਅਰ ਪੈਟਰਿਕ ਬ੍ਰਾਊਨ,ਓਨਟਾਰੀਓ ‐ ਪ੍ਰੀਮੀਅਰ ਡੱਗ ਫੋਰਡ ਅਤੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਆਲੋਚਨਾ ਕੀਤੀ ਗਈ ਹੈ। ਉਨ੍ਹਾਂ ਕੰਪਨੀ ਦੇ ਕੈਨੇਡਾ ਵਿਚ ਨਿਵੇਸ਼ ਅਤੇ ਸੰਭਾਵੀ ਨੌਕਰੀਆਂ ਦੇ ਨੁਕਸਾਨ 'ਤੇ ਨਿਰਾਸ਼ਾ ਜਤਾਈ ਹੈ।

ਸਟੈਲੈਂਟਿਸ ਦਾ ਅਮਰੀਕਾ ਵਿਚ ਵੱਡੇ ਨਿਵੇਸ਼ ਦਾ ਫੈਸਲਾ ਅਜਿਹੇ ਸਮੇਂ ਆਇਆ ਹੈ ਜਦੋਂ ਕੈਨੇਡੀਅਨ ਆਟੋ ਇੰਡਸਟਰੀ ਰਾਸ਼ਟਰਪਤੀ ਡੌਨਲਡ ਟਰੰਪ ਵਲੋਂ ਲਗਾਏ ਟੈਰਿਫ ਕਾਰਨ ਅਨਿਸ਼ਚਿਤਤਾ ਅਤੇ ਵਿੱਤੀ ਦਬਾਅ ਦੋਵਾਂ ਦਾ ਸਾਹਮਣਾ ਕਰ ਰਹੀ ਹੈ। ਪਿਛਲੇ ਹਫ਼ਤੇ ਅਮਰੀਕੀ ਕੌਮਰਸ ਸੈਕਟਰੀ ਹਾਵਰਡ ਲੂਟਨਿਕ ਨੇ ਕੈਨੇਡਾ ਨਾਲ ਆਟੋ ਡੀਲ ਦੀ ਕਿਸੇ ਵੀ ਸੰਭਾਵਨਾ ਨੂੰ ਖਾਰਜ ਕਰ ਦਿੱਤਾ ਸੀ।