14.11C Vancouver 14.11C VancouverJun 11, 2020 7:41 PM -
ਵਿਸ਼ਵ ਪੱਧਰ 'ਤੇ ਨਸਲਵਾਦ ਅਤੇ ਪੁਲੀਸ ਦੇ ਸੰਬੰਧ ਵਿੱਚ ਜਾਰੀ ਵਾਦ-ਵਿਵਾਦ ਦੇ ਚੱਲਦੇ, ਵੈਨਕੂਵਰ ਦੇ ਮੇਅਰ ਨੇ ਬ੍ਰਿਟਿਸ਼ ਕੋਲੰਬੀਆ ਦੇ ਪ੍ਰੀਮੀਅਰ ਨੂੰ ਸੂਬਾਈ ਪੁਲੀਸ ਪ੍ਰਣਾਲੀ ਦੀ ਸਮੀਖਿਆ ਕਰਨ ਦੀ ਅਪੀਲ ਕੀਤੀ ਹੈ।
ਕੈਨੇਡੀ ਸਟੂਅਰਟ ਦਾ ਕਹਿਣਾ ਹੈ ਕਿ ਵੈਨਕੂਵਰ ਦੀ ਪੁਲੀਸ ਸੇਵਾ ਵਿੱਚ ਕੋਈ ਵੱਡਾ ਬਦਲਾਵ ਕਰਨ ਲਈ ਸਿਟੀ ਕੌਂਸਲ ਕੋਲ ਲੋੜੀਂਦੇ ਅਧਿਕਾਰ ਨਹੀਂ ਹਨ, ਅਤੇ ਸਿਟੀ ਦੇ ਕਿਸੇ ਵੀ ਅਜਿਹੇ ਫ਼ੈਸਲੇ ਨੂੰ ਸੂਬੇ ਵੱਲੋਂ ਬਦਲਿਆ ਜਾ ਸਕਦਾ ਹੈ।
ਮੇਅਰ ਦਾ ਇਹ ਬਿਆਨ, ਸਿਟੀ ਵੱਲੋਂ ਵੈਨਕੂਵਰ ਪੁਲੀਸ ਦੇ ਬਜਟ ਵਿੱਚ 1% ਦੀ ਕਟੌਤੀ ਸੁਝਾਏ ਜਾਣ ਅਤੇ ਇਸ ਸੁਝਾਅ ਦਾ ਵੈਨਕੂਵਰ ਪੁਲੀਸ ਡਿਪਾਰਟਮੇਂਟ ਵੱਲੋਂ ਵਿਰੋਧ ਕੀਤੇ ਜਾਣ ਪਿੱਛੋਂ ਆਇਆ ਹੈ।
ਅਮਰੀਕਾ ਵਿੱਚ ਪੁਲੀਸ ਦੀ ਵਧੀਕੀ ਕਾਰਣ ਹੋਈ ਜੌਰਜ ਫਲੌਇਡ ਦੀ ਮੌਤ ਤੋਂ ਬਾਅਦ, ਪੂਰੇ ਵਿਸ਼ਵ ਵਿੱਚ ਪੁਲੀਸ ਦੇ ਬਜਟ ਵਿੱਚ ਕਟੌਤੀ ਕਰਕੇ, ਇਹ ਰਾਸ਼ੀ ਸਮਾਜਿਕ ਸੰਸਥਾਵਾਂ ਨੂੰ ਦੇਣ ਦੀ ਗੱਲ ਤੁਰ ਪਈ ਹੈ।
ਕੱਲ ਵੈਨਕੂਵਰ ਪ੍ਰਾਈਡ ਦੇ ਆਯੋਜਕਾਂ ਵੱਲੋਂ ਵੀ ਇਸ ਸਾਲ ਦੀ ਪਰੇਡ ਵਿੱਚ ਪੁਲੀਸ ਅਧਿਕਾਰੀਆਂ ਨੂੰ ਸ਼ਾਮਿਲ ਨਾ ਕਰਨ ਦਾ ਐਲਾਨ ਕੀਤਾ ਗਿਆ ਸੀ।
ਕੈਨੇਡੀ ਸਟੂਅਰਟ ਨੇ ਕਿਹਾ ਕਿ ਨਸਲਵਾਦ ਦਾ ਸ਼ਿਕਾਰ ਹੋਏ ਲੋਕ, ਉੱਚੇ ਅਹੁਦਿਆਂ 'ਤੇ ਬੈਠੇ ਅਧਿਕਾਰੀਆਂ ਵੱਲੋਂ ਇਸ ਸਮੱਸਿਆ ਦੇ ਹੱਲ ਲਈ ਕਰੜੀ ਕਾਰਵਾਈ ਦੀ ਉਮੀਦ ਕਰਦੇ ਹਨ।
ਉਹਨਾਂ ਕਿਹਾ ਕਿ ਉਹ ਪ੍ਰੀਮੀਅਰ ਜੌਹਨ ਹੌਰਗਨ ਅਤੇ ਵਿਰੋਧੀ ਪਾਰਟੀਆਂ ਦੇ ਆਗੂਆਂ ਨੂੰ ਲਿਖਿਤ ਬੇਨਤੀ ਭੇਜਣਗੇ।
