ਬਾਸਕਟਬਾਲ ਮੈਚ ਖ਼ਤਮ ਹੋਣ ਦੌਰਾਨ ਦੋ ਗਰੁੱਪਾਂ ਵਿਚ ਹੋਈ ਲੜਾਈ, ਵੈਨਕੂਵਰ ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਵੈਨਕੂਵਰ ਦੇ ਇੱਕ ਸਕੂਲ ਵਿਚ ਬਾਸਕਟਬਾਲ ਮੈਚ ਖ਼ਤਮ ਹੋਣ ਦੌਰਾਨ ਦੋ ਗਰੁੱਪਾਂ ਵਿਚ ਹੋਈ ਲੜਾਈ ਵਿਚ ਇੱਕ 18 ਸਾਲਾ ਨੌਜਵਾਨ ਨੂੰ ਚਾਕੂ ਮਾਰ ਕੇ ਜ਼ਖਮੀ ਕਰ ਦਿੱਤਾ ਗਿਆ। ਪੁਲਿਸ ਮੁਤਾਬਕ, ਘਟਨਾ ਰਾਤ 9 ਵਜੇ ਦੇ ਕਰੀਬ ਵੈਸਟ 33rd ਅਤੇ ਓਕ ਸਟ੍ਰੀਟ ਸਥਿਤ ਏਰਿਕ ਹੈਂਬਰ ਸੈਕੰਡਰੀ ਸਕੂਲ ਵਿਚ ਵਾਪਰੀ। ਉਸ ਸਮੇਂ ਏਰਿਕ ਹੈਂਬਰ ਅਤੇ ਕਿਲਾਰਨੀ ਸੈਕੰਡਰੀ ਸਕੂਲ ਵਿਚਕਾਰ ਮੈਚ ਚੱਲ ਰਿਹਾ ਸੀ, ਜੋ ਖ਼ਤਮ ਹੋਣ ਵਾਲਾ ਸੀ।

ਪੁਲਿਸ ਮੁਤਾਬਕ, ਮੈਚ ਦੇਖਣ ਆਏ ਦੋ ਗਰੁੱਪ ਵਿਚਕਾਰ ਲੜਾਈ ਹੋਈ ਅਤੇ 18 ਸਾਲਾ ਨੌਜਵਾਨ ਦੀ ਬਾਂਹ 'ਤੇ ਚਾਕੂ ਨਾਲ ਹਮਲਾ ਕੀਤਾ ਗਿਆ। ਬੀ.ਸੀ. ਐਮਰਜੈਂਸੀ ਹੈਲਥ ਸਰਵਿਸ ਮੁਤਾਬਕ ਜ਼ਖਮੀ ਨੌਜਵਾਨ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ ਅਤੇ ਉਸ ਦੀ ਹਾਲਤ ਸਥਿਰ ਸੀ।

ਰਿਪੋਰਟਸ ਮੁਤਾਬਕ, ਇਹ ਘਟਨਾ ਸਕੂਲ ਦੇ ਹਾਲਵੇਅ ਅੰਦਰ ਵਾਪਰੀ। ਵੈਨਕੂਵਰ ਪੁਲਿਸ ਨੇ ਅਜੇ ਤੱਕ ਕੋਈ ਗ੍ਰਿਫਤਾਰੀ ਨਹੀਂ ਕੀਤੀ ਹੈ। ਪੁਲਿਸ ਨੇ ਇੱਕ ਔਨਲਾਈਨ ਪੋਰਟਲ ਬਣਾਇਆ ਹੈ ਅਤੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਨੇ ਲੜਾਈ ਦੀ ਵੀਡੀਓ ਬਣਾਈ ਹੈ ਤਾਂ ਉਹ ਪੋਰਟਲ ਉਤੇ ਸਬਿਮਟ ਕਰ ਸਕਦਾ ਹੈ।