ਬਾਲਕੋਨੀ ਤੋਂ ਅੱਠ ਸਾਲਾ ਬੱਚੀ ਦੇ ਡਿੱਗਣ ਨੂੰ ਇੱਕ ਹਾਦਸਾ ਮੰਨਿਆ ਗਿਆ: ਵੈਨਕੂਵਰ ਪੁਲਿਸ

ਵੈਨਕੂਵਰ ਪੁਲਿਸ ਨੇ ਯੇਲਟਾਊਨ ਇਲਾਕੇ ਦੀ ਇੱਕ ਉੱਚੀ ਇਮਾਰਤ ਤੋਂ ਡਿੱਗ ਕੇ ਮਰਨ ਵਾਲੀ 8 ਸਾਲਾ ਬੱਚੀ ਦੀ ਮੌਤ ਦੇ ਸਬੰਧ ਵਿਚ ਆਪਣੀ ਜਾਂਚ ਪੂਰੀ ਕਰ ਲਈ ਹੈ ਅਤੇ ਇਸ ਮਾਮਲੇ ਵਿਚ ਕੋਈ ਅਪਰਾਧਿਕ ਦੋਸ਼ ਦਾਇਰ ਨਾ ਕੀਤੇ ਜਾਣ ਦੀ ਪੁਸ਼ਟੀ ਕੀਤੀ ਹੈ। ਇਹ ਦੁਖਦਾਈ ਘਟਨਾ 11 ਨਵੰਬਰ ਦੀ ਦੁਪਹਿਰ ਨੂੰ ਵਾਪਰੀ ਸੀ, ਜਦੋਂ ਬੱਚੀ ਰਿਹਾਇਸ਼ੀ ਇਮਾਰਤ ਦੀ 23ਵੀਂ ਮੰਜ਼ਿਲ ਦੀ ਬਾਲਕੌਨੀ ਤੋਂ ਹੇਠਾਂ ਡਿੱਗ ਗਈ ਸੀ।

ਪੁਲਿਸ ਅਤੇ ਐਮਰਜੈਂਸੀ ਸੇਵਾਵਾਂ ਮੌਕੇ 'ਤੇ ਪਹੁੰਚੀਆਂ ਪਰ ਬੱਚੀ ਨੂੰ ਬਚਾਇਆ ਨਹੀਂ ਜਾ ਸਕਿਆ ਸੀ। ਮ੍ਰਿਤਕ ਦੀ ਪਛਾਣ ਗੈਂਡਮ ਤਾਹੇਰੀ ਵਜੋਂ ਕੀਤੀ ਗਈ। ਇਹ ਘਟਨਾ ਨੈਲਸਨ ਸਟ੍ਰੀਟ ਅਤੇ ਐਕਸਪੋ ਬੁਲੇਵਾਰਡ ਨੇੜੇ ਇੱਕ ਕੰਡੋ ਬਿਲਡਿੰਗ ਦੀ ਸੀ। ਵੈਨਕੂਵਰ ਪੁਲਿਸ ਵਿਭਾਗ ਦੇ ਮੇਜਰ ਕ੍ਰਾਈਮ ਡਿਵੀਜ਼ਨ ਨੇ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ।

ਪੁਲਿਸ ਬੁਲਾਰੇ ਨੇ ਦੱਸਿਆ ਕਿ ਉਨ੍ਹਾਂ ਨੇ ਹਾਲਾਤ ਨੂੰ ਚੰਗੀ ਤਰ੍ਹਾਂ ਸਮਝਿਆ, ਜਿਸ ਕਾਰਨ ਇਹ ਦੁਖਾਂਤ ਵਾਪਰਿਆ ਅਤੇ ਜਾਂਚ ਤੋਂ ਬਾਅਦ ਪੁਲਿਸ ਇਸ ਸਿੱਟੇ 'ਤੇ ਪਹੁੰਚੀ ਹੈ ਕਿ ਇਸ ਮੌਤ ਵਿਚ ਕੋਈ ਵੀ ਅਪਰਾਧਿਕ ਪਹਿਲੂ ਸ਼ਾਮਲ ਨਹੀਂ ਸੀ। ਗੈਂਡਮ ਆਪਣੀ ਮਾਂ ਮਹਸਾ ਤੇ ਮਤਰੇਏ ਪਿਤਾ ਨਾਲ ਸਕੁਆਮਿਸ਼ ਵਿਚ ਰਹਿੰਦੀ ਸੀ ਅਤੇ ਘਟਨਾ ਵਾਲੇ ਦਿਨ ਆਪਣੇ ਪਿਤਾ ਨੂੰ ਮਿਲਣ ਵੈਨਕੂਵਰ ਆਈ ਹੋਈ ਸੀ।