ਵੈਨਕੂਵਰ ਪੁਲਿਸ ਨੇ ਚੋਰੀ ਦੀਆਂ ਘਟਨਾਵਾਂ ਦੇ ਸਬੰਧ ਵਿੱਚ ਸ਼ੱਕੀ ਦੀਆਂ ਤਸਵੀਰਾਂ ਕੀਤੀਆਂ ਜਾਰੀ

ਵੈਨਕੂਵਰ ਪੁਲਿਸ ਨੇ ਵੱਡੇ ਤੜਕੇ ਹੋਈਆਂ ਕਈ ਚੋਰੀ ਦੀਆਂ ਘਟਨਾਵਾਂ ਦੇ ਸਬੰਧ ਵਿਚ ਇੱਕ ਸ਼ੱਕੀ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹਨ, ਜਿਸ ਦੀ ਪਛਾਣ ਅਤੇ ਗ੍ਰਿਫਤਾਰੀ ਵਿਚ ਮਦਦ ਮੰਗੀ ਗਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਸ਼ੱਕੀ 30 ਤੋਂ 35 ਸਾਲ ਦਾ ਏਸ਼ੀਆਈ ਮੂਲ ਦਾ ਮੰਨਿਆ ਜਾਂਦਾ ਹੈ, ਜੋ ਜਨਵਰੀ ਤੋਂ ਹੁਣ ਤੱਕ 16 ਵਾਰ ਅਜਿਹੀਆਂ ਵਾਰਦਾਤਾਂ ਘਰ ਚੁੱਕਾ ਹੈ।

ਵੈਨਕੂਵਰ ਪੁਲਿਸ ਨੇ ਕਿ ਉਹ ਦੇਰ ਰਾਤ ਜਾਂ ਵੱਡੇ ਤੜਕੇ ਦਰਵਾਜ਼ੇ ਖੁੱਲ੍ਹੇ ਵਾਲੇ ਘਰਾਂ ਵਿਚ ਦਾਖ਼ਲ ਹੁੰਦਾ ਹੈ ਅਤੇ ਅਕਸਰ ਸਾਹਮਣੇ ਖੁੱਲ੍ਹੇ ਵਿਚ ਰੱਖੇ ਗਏ ਕੈਸ਼ ਜਾਂ ਹੋਰ ਕੀਮਤੀ ਸਾਮਾਨ ਨੂੰ ਚੋਰੀ ਕਰ ਕੇ ਭੱਜ ਜਾਂਦਾ ਹੈ। ਕਾਂਸਟੇਬਲ ਤਾਨੀਆ ਵਿਸਿੰਟਿਨ ਨੇ ਕਿਹਾ ਕਿ ਇਸ ਸ਼ੱਕੀ ਦਾ ਸਬੰਧ ਮਾਰਪੋਲ, ਕੈਰਿਸਡੇਲ, ਆਰਬੁਟਸ ਰਿਜ, ਓਕਰਿਜ ਅਤੇ ਸ਼ੌਘਨੇਸੀ ਵਿਚ ਹੋਈਆਂ ਚੋਰੀਆਂ ਨਾਲ ਹੈ।

ਪੁਲਿਸ ਦਾ ਮੰਨਣਾ ਹੈ ਕਿ ਸ਼ੱਕੀ ਖੇਤਰ ਦੇ ਆਸਪਾਸ ਦਾ ਹੀ ਰਹਿਣ ਵਾਲਾ ਹੈ ਤੇ ਰਾਤ ਨੂੰ ਆਂਢ-ਗੁਆਂਢ ਵਿਚ ਪੈਦਲ ਘੁੰਮਦਾ ਹੈ। ਉਸ ਵਲੋਂ ਸਭ ਤੋਂ ਤਾਜ਼ਾ ਚੋਰੀ ਮਾਰਗਰੇਟ ਸਟ੍ਰੀਟ ਅਤੇ ਵੈਸਟ 41st ਐਵੇਨਿਊ ਦੇ ਨੇੜੇ ਇੱਕ ਘਰ ਵਿਚ ਸਵੇਰੇ 3:30 ਵਜੇ ਦੇ ਕਰੀਬ ਕੀਤੀ ਗਈ ਹੈ। ਪੁਲਿਸ ਨੇ ਉਸ ਨੂੰ ਦੇਖਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ 911 'ਤੇ ਕਾਲ ਕਰਨ ਲਈ ਕਿਹਾ ਹੈ।