ਵੈਨਕੂਵਰ ਵਿੱਚ ਚੋਰ ਬਣਾ ਰਹੇ ਬਜ਼ੁਰਗਾਂ ਨੂੰ ਨਿਸ਼ਾਨਾ,ਪੁਲਿਸ ਨੇ ਲੋਕਾਂ ਨੂੰ ਕੀਤਾ ਸੁਚੇਤ

ਵੈਨਕੂਵਰ ਵਿਚ ਡਿਸਟਰੈਕਸ਼ਨ ਚੋਰੀਆਂ ਦੀਆਂ ਘਟਨਾਵਾਂ ਵਿਚ ਵਾਧਾ ਰਿਪੋਰਟ ਕੀਤਾ ਜਾ ਰਿਹਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਕੱਲੇ ਨਵੰਬਰ ਮਹੀਨੇ ਵਿਚ ਅਜਿਹੀਆਂ 20 ਘਟਨਾਵਾਂ ਦੀ ਰਿਪੋਰਟ ਕੀਤੀ ਗਈ ਹੈ, ਜਿਨ੍ਹਾਂ ਵਿਚੋਂ ਸਭ ਤੋਂ ਵੱਧ 16 ਘਟਨਾਵਾਂ ਈਸਟ ਸਾਈਡ ਵਿਚ ਹੋਈਆਂ ਹਨ। ਇਹ ਨਵੰਬਰ 2024 ਦੇ ਮੁਕਾਬਲੇ ਇਨ੍ਹਾਂ ਮਾਮਲਿਆਂ ਵਿਚ 122 ਫੀਸਦੀ ਦਾ ਵਾਧਾ ਹੈ।

ਵੈਨਕੂਵਰ ਪੁਲਿਸ ਵਲੋਂ ਇਨ੍ਹਾਂ ਘਟਨਾਵਾਂ ਦੇ ਮੱਦੇਨਜ਼ਰ ਸ਼ਹਿਰ ਵਾਸੀਆਂ ਨੂੰ ਸੁਚੇਤ ਰਹਿਣ ਲਈ ਕਿਹਾ ਗਿਆ ਹੈ। ਕਾਂਸਟੇਬਲ ਡੈਰਨ ਵਾਂਗ ਨੇ ਕਿਹਾ ਕਿ ਚੋਰ ਗੱਲਾਂ ਵਿਚ ਪਾ ਕੇ ਬਜ਼ੁਰਗਾਂ ਨੂੰ ਖਾਸ ਤੌਰ 'ਤੇ ਟਾਰਗੇਟ ਕਰਦੇ ਹਨ, ਇਸ ਲਈ ਉਨ੍ਹਾਂ ਨੂੰ ਵਧੇਰੇ ਚੌਕਸ ਕਰਨ ਦੀ ਲੋੜ ਹੈ।

ਕਾਂਸਟੇਬਲ ਵਾਂਗ ਨੇ ਕਿਹਾ ਕਿ ਇਹ ਚੋਰ ਪੀੜਤਾਂ ਦਾ ਧਿਆਨ ਭਟਕਾ ਕੇ ਤੇਜ਼ੀ ਨਾਲ ਕੰਮ ਕਰਦੇ ਹਨ, ਫਿਰ ਜਿੰਨੀ ਜਲਦੀ ਆਏ ਸਨ, ਓਨੀ ਹੀ ਜਲਦੀ ਚਲੇ ਜਾਂਦੇ ਹਨ ਅਤੇ ਅਕਸਰ ਪੀੜਤਾਂ ਨੂੰ ਬਹੁਤ ਬਾਅਦ ਵਿਚ ਹੀ ਅਹਿਸਾਸ ਹੁੰਦਾ ਹੈ ਕਿ ਉਹ ਠੱਗੇ ਗਏ ਹਨ।

ਵੈਨਕੂਵਰ ਪੁਲਿਸ ਨੇ ਕਿਹਾ ਕਿ ਨਵੰਬਰ ਵਿਚ 20 ਵਿਚੋਂ 19 ਘਟਨਾਵਾਂ ਪੀੜਤ ਦੇ ਨਿਵਾਸ ਸਥਾਨ ਦੇ ਬਿਲਕੁਲ ਨੇੜੇ ਹੋਈਆਂ, ਜਦੋਂ ਉਹ ਆਪਣੇ ਘਰਾਂ ਦੇ ਨੇੜੇ ਖੜ੍ਹੇ ਸਨ ਜਾਂ ਸੈਰ ਕਰ ਰਹੇ ਸਨ। ਪੁਲਿਸ ਨੇ ਲੋਕਾਂ ਨੂੰ ਚੌਕਸ ਰਹਿਣ ਅਤੇ ਡਿਸਟਰੈਕਸ਼ਨ ਚੋਰੀਆਂ ਦੀ ਤੁਰੰਤ ਰਿਪੋਰਟ ਕਰਨ ਦੀ ਸਲਾਹ ਦਿੱਤੀ ਹੈ।