12.36C Vancouver 12.36C VancouverOct 22, 2025 5:43 PM - Connect Newsroom - Pervez Sandhu
14 ਜੂਨ ਨੂੰ ਸਕਵਾਮਿਸ਼ ਦਰਿਆ ਵਿੱਚ ਨਵਦੀਪ ਸਿੰਘ ਸਿੱਧੂ ਨਾਮ ਦੇ ਸਰੀ ਵਾਸੀ ਦੀ ਗੱਡੀ ਰੁੜ ਗਈ ਸੀ।
ਘਟਨਾ ਮੌਕੇ ਨਵਦੀਪ ਵੀ ਗੱਡੀ ਅੰਦਰ ਹੀ ਫਸ ਗਿਆ ਸੀ ਅਤੇ ਉਸ ਵੇਲੇ ਤੋਂ ਹੁਣ ਤੱਕ ਗੱਡੀ ਅਤੇ ਨਵਦੀਪ ਬਾਰੇ ਕੁਝ ਪਤਾ ਨਹੀਂ ਲੱਗਿਆ ਸੀ।
ਦਰਿਆ ਦਾ ਪਾਣੀ ਚੜ੍ਹਿਆ ਹੋਣ ਕਾਰਨ ਪੁਲਿਸ ਵੱਲੋਂ ਕੀਤੀਆਂ ਗਈਆਂ ਗੱਡੀ ਅਤੇ ਨਵਦੀਪ ਨੂੰ ਲੱਭਣ ਦੀਆਂ ਕੋਸ਼ਿਸ਼ਾਂ ਨਾਕਾਮ ਰਹੀਆਂ ਸਨ।
ਪਰ ਅੱਜ ਸੀ-ਟੁ-ਸਕਾਈ ਜਨਰਲ ਇਨਵੈਸਟੀਗੇਸ਼ਨ ਸੈਕਸ਼ਨ ਵੱਲੋਂ ਜਾਣਕਾਰੀ ਦਿੱਤੀ ਗਈ ਕਿ 18 ਅਕਤੂਬਰ ਨੂੰ ਗੱਡੀ ਦੀ ਭਾਲ ਹੋ ਗਈ ਸੀ ਅਤੇ ਗੱਡੀ ਨੂੰ ਦਰਿਆ ਵਿੱਚੋਂ ਕੱਢ ਲਿਆ ਗਿਆ ਸੀ।
ਘਟਨਾ ਮੌਕੇ ਗੱਡੀ 'ਚ 4 ਲੋਕ ਸਵਾਰ ਸਨ ਜਿਸ ਵਿੱਚੋਂ 3 ਗੱਡੀ ਦੇ ਬਾਹਰ ਨਿਕਲ ਆਏ ਸਨ।
ਅੱਜ ਸਾਰਜੈਂਟ ਵਨੈਸਾ ਮੰਨ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ 'ਚ ਗੱਡੀ ਮਿਲਣ ਨਾਲ ਹੁਲਾਰਾ ਮਿਲੇਗਾ ਅਤੇ ਮਾਮਲੇ 'ਚ ਕੋਈ ਕ੍ਰਿਮੀਨਲ ਐਂਗਲ ਹੈ ਜਾਂ ਨਹੀਂ, ਇਸ ਦੀ ਜਾਂਚ ਅੱਗੇ ਵਧ ਸਕੇਗੀ।
ਉੱਧਰ ਕਨੈਕਟ ਐਫ.ਐਮ. ਨੇ ਮਾਮਲੇ ਸੰਬੰਧੀ ਨਵਦੀਪ ਦੇ ਨਜਦੀਕੀ ਰਿਸ਼ਤੇਦਾਰ ਨੈਵ ਧਾਲੀਵਾਲ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਪੁਲਿਸ ਜਾਂਚ 'ਤੇ ਸੰਤੁਸ਼ਟੀ ਪ੍ਰਗਟਾਉਂਦਿਆਂ ਦੱਸਿਆ ਕਿ ਫਿਲਹਾਲ ਨਵਦੀਪ ਦੇ ਮਾਤਾ ਜੀ ਨੂੰ ਗੱਡੀ ਸੰਬੰਧੀ ਜਾਣਕਾਰੀ ਨਹੀਂ ਦਿੱਤੀ ਹੈ ਕਿਉਂਕਿ ਉਹ ਦੀਵਾਲੀ ਲੰਘਣ ਦੀ ਉਡੀਕ ਕਰ ਰਹੇ ਸਨ।
ਸਾਰਜੈਂਟ ਮੰਨ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਨਵਦੀਪ ਬਾਰੇ ਕੁਝ ਪਤਾ ਲੱਗ ਸਕੇ ਤਾਂ ਜੋ ਪ੍ਰੀਵਾਰ ਨੂੰ ਨਵਦੀਪ ਸੰਬੰਧੀ ਜਵਾਬ ਮਿਲ ਸਕਣ, ਪਰ ਉਨ੍ਹਾਂ ਆਖਿਆ ਕਿ ਹਾਲਾਤਾਂ ਨੂੰ ਧਿਆਨ 'ਚ ਰੱਖਦਿਆਂ ਇਹ ਗਰੰਟੀ ਦੇਣੀ ਮੁਸ਼ਕਿਲ ਹੈ ਕਿ ਨਵਦੀਪ ਬਾਰੇ ਕੁਝ ਪਤਾ ਲੱਗੇਗਾ।
