9.64C Vancouver 9.64C VancouverNov 24, 2023 7:30 PM - The Canadian Press
ਕੈਨੇਡਾ-ਅਮਰੀਕਾ ਦੇ ਰੈਂਬੋ ਬ੍ਰਿਜ ਕਰਾਸਿੰਗ 'ਤੇ ਕਾਰ ਹਾਦਸੇ ਵਿੱਚ ਮਾਰੇ ਗਏ ਪੀੜਤਾਂ ਦੀ ਪਹਿਚਾਣ ਅਮਰੀਕੀ ਜੋੜ੍ਹੇ ਵਜੋਂ ਹੋਈ ਹੈ। ਨਿਆਗਰਾ ਫਾਲਜ਼ ਪੁਲਿਸ ਵਿਭਾਗ ਨੇ ਸ਼ੁੱਕਰਵਾਰ ਜਾਰੀ ਪ੍ਰੈੱਸ ਰਿਲੀਜ਼ ਵਿੱਚ ਇਹ ਜਾਣਕਾਰੀ ਦਿੱਤੀ।
ਪੁਲਿਸ ਨੇ ਕਿਹਾ ਕਿ ਹਾਦਸੇ ਮਗਰੋਂ ਜਿਸ ਗੱਡੀ ਵਿੱਚ ਅੱਗ ਲੱਗ ਗਈ ਸੀ ਉਸ ਵਿੱਚ 53 ਸਾਲਾ ਕਰਟ ਪੀ. ਵਿਲਾਨੀ ਅਤੇ ਉਸ ਦੀ 53 ਸਾਲਾ ਪਤਨੀ ਮੋਨਿਕਾ ਵਿਲਾਨੀ ਸਵਾਰ ਸਨ। ਦੋਵੇਂ ਨਿਊਯਾਰਕ ਦੇ ਗ੍ਰੈਂਡ ਆਈਲੈਂਡ ਦੇ ਰਹਿਣ ਵਾਲੇ ਸਨ।
ਨਿਆਗਰਾ ਫਾਲਜ਼ ਪੁਲਿਸ ਨੇ ਕਿਹਾ ਕਿ ਹਾਦਸੇ ਦੀ ਜਾਂਚ ਜਾਰੀ ਹੈ, ਜਿਸ ਨੂੰ ਉਸ ਦਾ ਕਰੈਸ਼ ਪ੍ਰਬੰਧਨ ਯੂਨਿਟ ਦੇਖ ਰਿਹਾ ਹੈ। ਇਸ ਤੋਂ ਇਲਾਵਾ ਹੋਰ ਜਾਣਕਾਰੀ ਨਹੀਂ ਦਿੱਤੀ ਗਈ। ਗੌਰਤਲਬ ਹੈ ਕਿ ਓਨਟਾਰੀਓ-ਨਿਊਯਾਰਕ ਰਾਜ ਵਿਚਕਾਰ ਰੈਂਬੋ ਬ੍ਰਿਜ ਕਰਾਸਿੰਗ 30 ਘੰਟੇ ਤੋਂ ਵੱਧ ਸਮਾਂ ਬੰਦ ਰਹਿਣ ਮਗਰੋਂ ਵੀਰਵਾਰ ਸ਼ਾਮ ਤੋਂ ਮੁੜ ਖੁੱਲ੍ਹੀ ਹੈ।
ਬੁੱਧਵਾਰ ਤੇਜ਼ ਰਫ਼ਤਾਰ ਕਾਰ ਅਮਰੀਕਾ ਵਾਲੇ ਪਾਸੇ ਸਥਿਤ ਚੌਕੀ ਨਾਲ ਟਕਰਾ ਗਈ ਸੀ। ਇਸ ਹਾਦਸੇ ਵਿੱਚ ਦੋ ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ ਤੀਜਾ ਵਿਅਕਤੀ ਜ਼ਖਮੀ ਹੋ ਗਿਆ ਸੀ। ਸ਼ੁਰੂਆਤ ਵਿੱਚ ਇਸ ਦੀ ਜਾਂਚ ਅੱਤਵਾਦੀ ਹਮਲੇ ਵਜੋਂ ਕੀਤੀ ਜਾ ਰਹੀ ਸੀ ਪਰ ਬਾਅਦ ਵਿੱਚ ਅਧਿਕਾਰੀਆਂ ਨੇ ਇਹ ਮਾਮਲਾ ਆਵਾਜਾਈ ਘਟਨਾ ਦੇ ਤੌਰ 'ਤੇ ਨਿਆਗਰਾ ਫਾਲਜ਼ ਪੁਲਿਸ ਵਿਭਾਗ ਨੂੰ ਸੌਂਪ ਦਿੱਤਾ।
ਅਮਰੀਕੀ ਜਾਂਚ ਏਜੰਸੀ ਐੱਫ ਬੀ ਆਈ ਅਤੇ ਨਿਊਯਾਰਕ ਦੀ ਗਵਰਨਰ ਕੈਥੀ ਹੋਕੋ ਇਹ ਸਪੱਸ਼ਟ ਕਰ ਚੁੱਕੇ ਹਨ ਕਿ ਇਹ ਅੱਤਵਾਦੀ ਹਮਲਾ ਨਹੀਂ ਸੀ ਪਰ ਹਾਦਸੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਅਧਿਕਾਰੀਆਂ ਨੇ ਨਿਆਗਰਾ ਖੇਤਰ ਵਿੱਚ ਚਾਰੇ ਪਾਸਿਆਂ ਤੋਂ ਸਰਹੱਦ ਨੂੰ ਬੰਦ ਕਰ ਦਿੱਤਾ ਸੀ।
