ਤਿੰਨ ਪਾਰਲੀਮੈਂਟ ਹਲਕਿਆਂ ਵਿੱਚ ਵੋਟਿੰਗ ਜਾਰੀ,ਲਿਬਰਲਜ਼ ਨੂੰ ਬਹੁਮਤ ਮਿਲਣ ਦੀ ਸੰਭਾਵਨਾ

ਕੈਨੇਡਾ ਵਿਚ ਸੋਮਵਾਰ ਨੂੰ ਤਿੰਨ ਪਾਰਲੀਮੈਂਟ ਹਲਕਿਆਂ ਵਿਚ ਜ਼ਿਮਨੀ ਚੋਣਾਂ ਹੋ ਰਹੀਆਂ ਹਨ, ਜੋ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਲਿਬਰਲ ਸਰਕਾਰ ਲਈ ਇੱਕ ਇਤਿਹਾਸਕ ਮੋੜ ਸਾਬਤ ਹੋ ਸਕਦੀਆਂ ਹਨ। ਜੇ ਲਿਬਰਲ ਪਾਰਟੀ ਇਨ੍ਹਾਂ ਵਿਚੋਂ ਸਿਰਫ਼ ਇੱਕ ਸੀਟ ਵੀ ਜਿੱਤਦੀ ਹੈ ਤਾਂ ਉਹ ਹਾਊਸ ਔਫ ਕਾਮਨਜ਼ ਵਿਚ ਬਹੁਮਤ ਹਾਸਲ ਕਰ ਲਵੇਗੀ।​

ਵਰਤਮਾਨ ਵਿਚ ਲਿਬਰਲਸ ਕੋਲ 171 ਸੀਟਾਂ ਹਨ ਅਤੇ ਬਹੁਮਤ ਤੱਕ ਪਹੁੰਚਣ ਲਈ ਉਨ੍ਹਾਂ ਨੂੰ ਸਿਰਫ਼ ਇੱਕ ਹੋਰ ਸੀਟ ਦੀ ਲੋੜ ਹੈ। ਓਨਟਾਰੀਓ ਦੀ ਯੂਨੀਵਰਸਿਟੀ ਰੋਜ਼ਡੇਲ ਸੀਟ ਨੂੰ ਲਿਬਰਲ ਪਾਰਟੀ ਦਾ ਗੜ੍ਹ ਮੰਨਿਆ ਜਾਂਦਾ ਹੈ। ​ਸਕਾਰਬਰੋ-ਸਾਊਥ ਵੈਸਟ ਸੀਟ ਵੀ ਰਵਾਇਤੀ ਤੌਰ 'ਤੇ ਲਿਬਰਲਸ ਦੇ ਪੱਖ ਵਿਚ ਰਹੀ ਹੈ।

ਉਥੇ ਹੀ, ਕਿਊਬੈਕ ਦੀ ​ਟੈਰੇਬੋਨ ਸੀਟ 'ਤੇ ਮੁਕਾਬਲਾ ਸਭ ਤੋਂ ਦਿਲਚਸਪ ਹੈ,ਜਿੱਥੇ ਪਿਛਲੀਆਂ ਚੋਣਾਂ ਵਿਚ ਲਿਬਰਲਸ ਨੇ ਬਲਾਕ ਕਿਊਬੈਕਵਾ ਨੂੰ ਸਿਰਫ਼ 1 ਵੋਟ ਨਾਲ ਹਰਾਇਆ ਸੀ, ਜਿਸ ਤੋਂ ਬਾਅਦ ਹਾਲ ਹੀ ਵਿਚ ਸੁਪਰੀਮ ਕੋਰਟ ਨੇ ਇਸ ਦਾ ਨਤੀਜਾ ਰੱਦ ਕਰ ਦਿੱਤਾ ਸੀ। ਕਾਰਨੀ ਸਰਕਾਰ ਨੂੰ ਇਨ੍ਹਾਂ ਜ਼ਿਮਨੀ ਚੋਣਾਂ ਵਿਚ ਬਹੁਮਤ ਮਿਲਣ ਨਾਲ ਕਿਸੇ ਵੀ ਸਮੇਂ ਡਿੱਗਣ ਜਾਂ ਅਵਿਸ਼ਵਾਸ ਪ੍ਰਸਤਾਵ ਦਾ ਡਰ ਨਹੀਂ ਰਹੇਗਾ ਅਤੇ ਸਰਕਾਰ ਦੇ ਬਿੱਲ ਆਪਣੇ ਦਮ 'ਤੇ ਪਾਸ ਹੋ ਸਕਣਗੇ।