13.17C Vancouver 13.17C VancouverDec 13, 2023 5:13 PM - Connect News, The Canadian Press
ਕੈਨੇਡਾ-ਭਾਰਤ ਸਮੇਤ ਸੰਯੁਕਤ ਰਾਸ਼ਟਰ ਜਨਰਲ ਅਸੈਂਬਲੀ ਨੇ ਗਾਜ਼ਾ ਵਿੱਚ ਤੁਰੰਤ ਜੰਗਬੰਦੀ ਦੇ ਪੱਖ ਵਿੱਚ ਭਾਰੀ ਵੋਟਿੰਗ ਕੀਤੀ ਹੈ। ਸੰਯੁਕਤ ਰਾਸ਼ਟਰ ਵਿੱਚ ਸ਼ਾਮਲ 193 ਮੁਲਕਾਂ ਵਿੱਚੋਂ ਕੈਨੇਡਾ ਸਮੇਤ 153 ਨੇ ਸੀਜ਼ਫਾਇਰ ਦੇ ਹੱਕ ਵਿੱਚ ਵੋਟ ਦਿੱਤੀ।
ਜਦਕਿ ਅਮਰੀਕਾ ਅਤੇ ਇਜ਼ਰਾਇਲ ਸਮੇਤ 10 ਮੈਂਬਰ ਮੁਲਕਾਂ ਨੇ ਇਸ ਦੇ ਵਿਰੋਧ ਵਿੱਚ ਵੋਟ ਪਾਈ। ਉੱਥੇ ਹੀ 23 ਮੈਂਬਰਾਂ ਨੇ ਇਸ ਤੋਂ ਦੂਰੀ ਬਣਾਈ ਅਤੇ 7 ਹੋਰ ਮੁਲਕ ਇਸ ਦੌਰਾਨ ਗੈਰ ਹਾਜ਼ਰ ਰਹੇ। ਪਿਛਲੇ ਹਫ਼ਤੇ ਅਮਰੀਕਾ ਨੇ ਯੂ. ਐੱਨ. ਸੁਰੱਖਿਆ ਪ੍ਰੀਸ਼ਦ ਵਿੱਚ ਇਸ ਮਤੇ ਨੂੰ ਵੀਟੋ ਨਾਲ ਹਰਾ ਦਿੱਤਾ ਸੀ, ਜਦੋਂ ਕਿ ਜਨਰਲ ਅਸੈਂਬਲੀ ਵਿੱਚ ਉਸ ਕੋਲ ਇਹ ਪਾਵਰ ਨਹੀਂ ਸੀ।
ਕੈਨੇਡਾ ਅਤੇ ਭਾਰਤ ਦਾ ਕਦਮ ਇਸ ਵਾਰ ਕਾਫ਼ੀ ਮਾਈਨੇ ਰੱਖਦਾ ਹੈ ਕਿਉਂਕਿ ਪਿਛਲੀ ਵਾਰ ਆਏ ਇਸ ਮਤੇ ਦੌਰਾਨ ਦੋਹਾਂ ਨੇ ਵੋਟ ਤੋਂ ਦੂਰੀ ਬਣਾਈ ਸੀ। ਹੁਣ ਦੋਹਾਂ ਨੇ ਇਹ ਸਪੱਸ਼ਟ ਕੀਤਾ ਹੈ ਕਿ ਗਾਜ਼ਾ ਵਿੱਚ ਹੋ ਰਹੀ ਆਮ ਲੋਕਾਂ ਦੀ ਮੌਤ ਨਾਲ ਸਮਝੌਤਾ ਨਹੀਂ ਕੀਤਾ ਜਾ ਸਕਦਾ।
ਗੌਰਤਲਬ ਹੈ ਕਿ ਬੇਸ਼ੱਕ ਅਮਰੀਕਾ ਨੇ ਸੀਜ਼ਫਾਇਰ ਦੇ ਵਿਰੋਧ ਵਿੱਚ ਵੋਟ ਕੀਤੀ ਪਰ ਯੂ. ਐੱਨ. ਵਿੱਚ ਵੋਟਿੰਗ ਤੋਂ ਪਹਿਲਾਂ ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਆਪਣੀ 2024 ਲਈ ਮੁੜ ਚੋਣ ਮੁਹਿੰਮ ਵਾਸਤੇ ਫੰਡ ਇਕੱਠਾ ਕਰਨ ਦੇ ਸਮਾਗਮ ਵਿੱਚ ਕਿਹਾ ਕਿ ਇਜ਼ਰਾਇਲ ਗਾਜ਼ਾ ਵਿੱਚ ਲਗਾਤਾਰ ਬੰਬਾਰੀ ਕਾਰਨ ਆਪਣਾ ਅੰਤਰਰਾਸ਼ਟਰੀ ਸਮਰਥਨ ਗੁਆ ਰਿਹਾ ਹੈ।
