11.81C Vancouver 11.81C VancouverDec 12, 2022 10:25 PM - Connect News
ਵੈਨਕੂਵਰ ਪੁਲਿਸ ਵੱਲੋਂ ਇੱਕ ਔਰਤ ਸੰਬੰਧੀ ਜਾਣਕਾਰੀ ਸਾਂਝੀ ਕਰਨ ਦੀ ਅਪੀਲ ਕੀਤੀ ਗਈ ਹੈ।
ਪੁਲਿਸ ਨੇ ਵੀਡੀਓ ਅਪੀਲ ਜਾਰੀ ਕਰ ਇੱਕ ਅਜਿਹੀ ਔਰਤ ਬਾਰੇ ਜਾਣਕਾਰੀ ਸਾਂਝੀ ਕਰਨ ਨੂੰ ਕਿਹਾ ਹੈ, ਜੋ ਸਪੈਨਿਸ਼ ਬੈਂਕਸ ਦੇ ਪਾਣੀਆਂ 'ਚ ਡੁੱਬ ਗਈ ਸੀ।
ਪੁਲਿਸ ਨੂੰ ਉਮੀਦ ਹੈ ਕਿ ਸੋਸ਼ਲ ਮੀਡੀਆ ਦੀ ਤਾਕਤ ਕੰਮ ਆ ਸਕਦੀ ਹੈ ਅਤੇ ਔਰਤ ਦੀ ਪਛਾਣ ਸੰਬੰਧੀ ਮਦਦ ਹੋ ਸਕਦੀ ਹੈ।
ਸਾਰਜੈਂਟ ਸਟੀਵ ਐਡੀਸਨ ਨੇ ਕਿਹਾ ਕਿ ਕੋਈ ਤਾਂ ਹੋਵੇਗਾ ਜੋ ਇਸ ਔਰਤ ਨੂੰ ਜਾਣਦਾ ਸੀ ਅਤੇ ਉਸ ਨੂੰ ਪਿਆਰ ਕਰਦਾ ਹੋਵੇਗਾ ਪਰ ਫਿਲਹਾਲ ਜਾਣਦਾ ਹੀ ਨਹੀਂ ਕਿ ਔਰਤ ਦੀ ਮੌਤ ਹੋ ਗਈ ਹੈ।
ਔਰਤ ਦੀ ਪਛਾਣ ਸੰਬੰਧੀ ਦੱਸਿਆ ਗਿਆ ਕਿ ਔਰਤ ਸਿਆਹ ਰੰਗ ਦੀ ਸੀ ਅਤੇ ਉਸ ਦੀ ਉਮਰ 30 ਤੋਂ 40 ਸਾਲ ਦਰਮਿਆਨ ਮੰਨੀ ਜਾ ਰਹੀ ਹੈ।
ਔਰਤ ਦਾ ਮ੍ਰਿਤ ਸ਼ਰੀਰ 29 ਸਿਤੰਬਰ ਨੂੰ ਰਾਤ ਕਰੀਬ 9 ਵਜੇ ਯੂ.ਬੀ.ਸੀ. ਨੇੜ ਸਪੈਨਿਸ਼ ਬੈਂਕਸ ਦੇ ਪਾਣੀਆਂ 'ਚ ਮਿਲਿਆ ਸੀ।
ਉਸ ਨੂੰ ਕੰਢੇ ਲਿਆਂਦਾ ਗਿਆ ਪਰ ਉਸ ਨੂੰ ਹੋਸ਼ 'ਚ ਲਿਆਉਣ ਦੀਆਂ ਕੋਸ਼ਿਸ਼ਾਂ ਨਾਕਾਮ ਰਹੀਆਂ।
ਔਰਤ ਕੋਲ ਕੋਈ ਆਈ.ਡੀ. ਨਹੀਂ ਸੀ।
ਸਾਰਜੈਂਟ ਸਟੀਵ ਐਡੀਸਨ ਨੇ ਕਿਹਾ ਕਿ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਔਰਤ ਕੈਨੇਡਾ 'ਚ ਨਵੀਂ ਸੀ ਜਾਂ ਯਾਤਰੀ ਸੀ ਅਤੇ ਸ਼ਾਇਦ ਇਸੇ ਕਾਰਨ ਫਿਲਹਾਲ ਉਸ ਨੂੰ ਲਾਪਤਾ ਵੀ ਰਿਪੋਰਟ ਨਹੀਂ ਕੀਤਾ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਇਹ ਵੀ ਸਪਸ਼ਟ ਨਹੀਂ ਹੈ ਕਿ ਔਰਤ ਨਾਲ ਕੀ ਹੋਇਆ ਅਤੇ ਉਹ ਕਿਵੇਂ ਡੁੱਬ ਗਈ।
