ਗਰਮ ਮੌਸਮ ਕਾਰਨ ਬ੍ਰਿਟਿਸ਼ ਕੋਲੰਬੀਆ ਦੇ ਕਈ ਪਹਾੜੀ ਰਸਤੇ ਹੋਏ ਬੰਜਰ

ਬ੍ਰਿਟਿਸ਼ ਕੋਲੰਬੀਆ ਦਾ ਗਰਮ ਮੌਸਮ ਪਹਾੜੀਆਂ ਲਈ ਮੁਸੀਬਤ ਬਣ ਗਿਆ ਹੈ ਕਿਉਂਕਿ ਬਰਫ ਦੀ ਕਮੀ ਕਾਰਨ ਕਈ ਰਸਤੇ ਬੰਜਰ ਹੋ ਗਏ ਹਨ। ਗਰਮ ਸਰਦੀਆਂ ਕਾਰਨ ਸਥਾਨਕ ਸਕਾਈ ਰਿਜ਼ੋਰਟ ਨੂੰ ਛੁੱਟੀਆਂ ਦੇ ਸੀਜ਼ਨ ਦੌਰਾਨ ਬਰਫ ਦੀ ਕਮੀ ਨਾਲ ਜੂਝਣਾ ਪੈ ਰਿਹਾ ਹੈ।

ਫਿਲਹਾਲ ਵਿਸਲਰ ਬਲੈਕਕੌਬ ਦੇ ਅੱਧੇ ਤੋਂ ਵੀ ਘੱਟ ਰਸਤੇ ਖੁੱਲ੍ਹੇ ਹੋਏ ਹਨ ਜਦਕਿ ਉੱਤਰੀ ਕੰਢੇ ਦਾ ਮਾਊਂਟ ਸੀਮੋਰ ਬਿਹਤਰ ਸਥਿਤੀਆਂ ਦੀ ਉਡੀਕ ਵਿੱਚ ਪੂਰੀ ਤਰ੍ਹਾਂ ਬੰਦ ਹੈ। ਇਸ ਹਫਤੇ ਐੱਲ.ਨੀਨੋ ਜਲਵਾਯੂ ਸੰਬੰਧੀ ਗਰਮੀ ਕਾਰਨ ਮੈਟਰੋ ਵੈਨਕੂਵਰ, ਗ੍ਰੇਟਰ ਵਿਕਟੋਰੀਆ, ਸਨਸ਼ਾਈਨ ਕੋਸਟ ਅਤੇ ਓਕਾਨਾਗਨ ਵਿਚ ਤਾਪਮਾਨ ਰਿਕਾਰਡ ਤੋੜ ਉਚਾਈ ’ਤੇ ਪਹੁੰਚ ਗਿਆ।

ਕੈਨੇਡਾ ਦੇ ਵਾਤਾਵਰਣ ਅਨੁਸਾਰ ਕ੍ਰਿਸਮਿਸ ਵਾਲੇ ਦਿਨ ਵੈਨਕੂਵਰ ਦੇ ਉੱਤਰ ਵਿਚ ਸਥਿਤ ਵਿਸਲਰ ਵਿਚ ਜ਼ਮੀਨ ’ਤੇ ਕੋਈ ਬਰਫ ਨਹੀਂ ਸੀ ਜਦਕਿ ਪਿਛਲੇ ਸਾਲ ਇਥੇ 40 ਸੈਂਟੀਮੀਟਰ ਤਕ ਬਰਫ ਰਿਕਾਰਡ ਕੀਤੀ ਗਈ ਸੀ।

ਗਰਮ ਮੌਸਮ ਨੇ ਮੈਟਰੋ ਵੈਨਕੂਵਰ ਦੀਆਂ 3 ਮੁੱਖ ਪਹਾੜੀਆਂ ਨੂੰ ਹੋਰ ਵੀ ਪ੍ਰਭਾਵਿਤ ਕੀਤਾ ਹੈ। ਇਸ ਦੌਰਾਨ ਸਾਈਪਰਸ ਅਤੇ ਗਰੌਸ ਪਹਾੜੀਆਂ ਵਿਚ ਸਿਰਫ 1 ਜਾਂ 2 ਦੋੜਾਂ ਕਵਾਈਆਂ ਜਾ ਰਹੀਆਂ ਹਨ ਜਦਕਿ ਮਾਊਂਟ ਸੀਮੌਰ ਬੁੱਧਵਾਰ, ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ ਪੂਰੀ ਤਰ੍ਹਾਂ ਬੰਦ ਰਿਹਾ।