ਕੈਨੇਡਾ ਵਿੱਚ ਇਸ ਸਾਲ ਵੱਧ ਪਵੇਗੀ ਗਰਮੀ, ਆਮ ਨਾਲੋਂ ਘੱਟ ਪੈਣਗੇ ਮੀਂਹ

ਕੈਨੇਡਾ ਦੇ ਵਾਤਾਵਰਣ ਤੇ ਜਲਵਾਯੂ ਪਰਿਵਰਤਨ ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਸੂਬਿਆਂ ਵਿਚ ਬਾਰਸ਼ ਦੇ ਪੱਧਰ ਦੀ ਅਨਿਸ਼ਚਿਤਤਾ ਵਿਚਕਾਰ ਇਸ ਵਾਰ ਕੈਨੇਡਾ ਵਿਚ ਆਮ ਨਾਲੋਂ ਵੱਧ ਗਰਮੀ ਪੈਣ ਦੀ ਸੰਭਾਵਨਾ ਹੈ। ਮੌਸਮ ਵਿਗਿਆਨੀ ਜੈਨੀਫਰ ਸਮਿਥ ਦਾ ਕਹਿਣਾ ਹੈ ਕਿ ਐਟਲਾਂਟਿਕ ਕੈਨੇਡਾ, ਕਿਊਬੈਕ, ਓਨਟਾਰੀਓ ਅਤੇ ਉੱਤਰੀ ਮੈਨੀਟੋਬਾ ਵਿਚ ਖਾਸ ਤੌਰ 'ਤੇ ਵਧੇਰੇ ਗਰਮੀ ਪੈਣ ਦੀ ਸੰਭਾਵਨਾ ਹੈ।

ਹਾਲਾਂਕਿ, ਦੇਸ਼ ਦੇ ਬਾਕੀ ਹਿੱਸਿਆਂ ਲਈ ਵੀ ਅਜਿਹੀਆਂ ਸੰਭਾਵਨਾਵਾਂ ਹਨ। ਸਮਿਥ ਨੇ ਕਿਹਾ ਕਿ ਅਜੇ ਇਸ ਗੱਲ ਨੂੰ ਲੈ ਕੇ ਅਨਿਸ਼ਚਿਤਤਾ ਹੈ ਕਿ ਗਰਮੀਆਂ ਦੌਰਾਨ ਉਨ੍ਹਾਂ ਸੂਬਿਆਂ ਵਿਚ ਕਿੰਨੀ ਬਾਰਸ਼ ਹੋਵੇਗੀ ਪਰ ਐਲਬਰਟਾ, ਬ੍ਰਿਟਿਸ਼ ਕੋਲੰਬੀਆ ਅਤੇ ਸਸਕੈਚਵਨ ਦੇ ਕੁਝ ਹਿੱਸਿਆਂ ਵਿਚ ਆਮ ਨਾਲੋਂ ਘੱਟ ਬਾਰਸ਼ ਹੋ ਸਕਦੀ ਹੈ।

ਵਾਤਾਵਰਣ ਕੈਨੇਡਾ ਦੇ ਖੋਜ ਵਿਗਿਆਨੀ ਬਿਲ ਮੈਰੀਫੀਲਡ ਨੇ ਕਿਹਾ ਕਿ ਬਾਰਸ਼ ਘੱਟ ਹੋਣ ਦਾ ਮਤਲਬ ਹੈ ਕਿ ਅਗਲੇ ਮਹੀਨੇ ਤੋਂ ਪੱਛਮੀ ਕੈਨੇਡਾ ਦੇ ਸਾਰੇ ਹਿੱਸੇ ਭਿਆਨਕ ਜੰਗਲੀ ਅੱਗ ਦੇ ਰਿਸਕ 'ਤੇ ਆ ਸਕਦੇ ਹਨ। ਉਹਨਾਂ ਕਿਹਾ ਕਿ ਅਗਸਤ ਤੱਕ ਹਾਲਾਤ ਹੋਰ ਵੀ ਖਰਾਬ ਹੋਣ ਦਾ ਖ਼ਦਸ਼ਾ ਹੈ, ਪੱਛਮੀ ਕੈਨੇਡਾ ਵਿਚ ਅੱਗ ਲੱਗਣ ਦਾ ਖ਼ਤਰਾ ਔਸਤਨ ਤੋਂ ਉੱਪਰ ਜਾ ਸਕਦਾ ਹੈ।