ਕੈਨੇਡਾ ਸਰਕਾਰ 'ਮੈਡੀਕਲੀ ਅਸਿਸਟਿਡ ਡਾਇੰਗ' ਪ੍ਰੋਗਰਾਮ 'ਚ ਕਰ ਸਕਦੀ ਦੇਰੀ

ਕੈਨੇਡਾ ਸਰਕਾਰ ਮੈਡੀਕਲੀ ਅਸਿਸਟਿਡ ਡਾਇੰਗ ਪ੍ਰੋਗਰਾਮ ਦਾ ਵਿਸਥਾਰ ਕਰਨ ਦੇ ਯੋਜਨਾ ਵਿੱਚ ਫਿਰ ਤੋਂ ਦੇਰੀ ਕਰ ਸਕਦੀ ਹੈ, ਜਿਸ ਤਹਿਤ ਉਨ੍ਹਾਂ ਮਰੀਜ਼ਾਂ ਨੂੰ ਸ਼ਾਮਲ ਕੀਤਾ ਜਾਣਾ ਸੀ ਜਿਨ੍ਹਾਂ ਦੀ ਡਾਕਟਰੀ ਸਥਿਤੀ ਮਾਨਸਿਕ ਤੌਰ 'ਤੇ ਵਿਗੜੀ ਹੈ। ਇਹ ਦੇਰੀ ਦੂਜੀ ਵਾਰ ਹੋਵੇਗੀ, ਇਸ ਤੋਂ ਪਹਿਲਾਂ ਫਰਵਰੀ ਵਿੱਚ ਸਰਕਾਰ ਨੇ ਇਸ ਨੂੰ ਮਾਰਚ 2024 ਦੀ ਡੈੱਡਲਾਈਨ ਤੱਕ ਲਈ ਦੇਰ ਕਰਨ ਦਾ ਫੈਸਲਾ ਕੀਤਾ ਸੀ ਜੋ ਹੁਣ ਫਿਰ ਤੋਂ ਬਦਲਣ ਦੀ ਸੰਭਾਵਨਾ ਹੈ।

ਜਸਟਿਸ ਮਿਨਿਸਟਰ ਆਰਿਫ ਵਿਰਾਨੀ ਨੇ ਕਿਹਾ ਹੈ ਕਿ ਸਰਕਾਰ ਮੈਡੀਕਲ ਮਾਹਰ ਅਤੇ ਸਾਂਝੀ ਸੰਸਦੀ ਕਮੇਟੀ ਵੱਲੋਂ ਮਿਲੇ ਸੁਝਾਵਾਂ 'ਤੇ ਵਿਚਾਰ ਕਰਕੇ ਇਹ ਫੈਸਲਾ ਕਰੇਗੀ ਕਿ ਇਸ ਪ੍ਰੋਗਰਾਮ ਨੂੰ 17 ਮਾਰਚ 2024 ਤੋਂ ਮਾਨਸਿਕ ਰੋਗ ਪੀੜਤਾਂ ਲਈ ਲਾਗੂ ਕਰਨਾ ਹੈ ਜਾਂ ਇਸ ਨੂੰ ਹੋਰ ਲੇਟ ਕੀਤੇ ਜਾਣ ਦੀ ਲੋੜ ਹੈ।

ਸੰਸਦ ਨੇ ਇਹ ਕਾਨੂੰਨ 2016 ਵਿੱਚ ਪਾਸ ਕੀਤਾ ਸੀ ਜੋ ਮਰੀਜ਼ਾਂ ਨੂੰ ਆਪਣੀ ਜ਼ਿੰਦਗੀ ਖਤਮ ਕਰਨ ਲਈ ਡਾਕਟਰੀ ਸਹਾਇਤਾ ਮੰਗਣ ਦੀ ਇਜਾਜ਼ਤ ਦਿੰਦਾ ਹੈ। ਯੂਰਪ ਦੇ ਕੁੱਝ ਮੁਲਕਾਂ ਵਿੱਚ ਮਾਨਸਿਕ ਵਕਾਰ ਵਾਲੇ ਮਰੀਜ਼ਾਂ ਲਈ ਇਹ ਕਾਨੂੰਨ ਪਹਿਲਾਂ ਹੀ ਹੈ। ਕੈਨੇਡਾ ਦੇ ਕਾਨੂੰਨ ਮੁਤਾਬਕ, ਪ੍ਰਕਿਰਿਆ ਵਿੱਚ ਕਿਸੇ ਵੀ ਸਮੇਂ ਮਰੀਜ਼ ਆਪਣਾ ਮਨ ਬਦਲ ਸਕਦਾ ਹੈ ਜਾਂ ਐਮ.ਏ.ਆਈ.ਡੀ ਲਈ ਆਪਣੀ ਯੋਜਨਾ ਨੂੰ ਰੋਕ ਸਕਦਾ ਹੈ। ਹਾਲਾਂਕਿ ਇਸ ਨੂੰ ਲੈ ਕੇ ਵਿਰੋਧ ਵੀ ਹੈ।

ਕੰਜ਼ਰਵੇਟਿਵ ਲੀਡਰਪੀਅਰ ਪੋਲੀਐਵ ਕਈ ਵਾਰ ਕਹਿ ਚੁੱਕੇ ਹਨ ਕਿ ਜੇ ਉਨ੍ਹਾਂ ਦੀ ਸਰਕਾਰ ਬਣੀ ਤਾਂ ਉਹ ਇਸ ਮੌਤ ਦੇ ਕਾਨੂੰਨ ਦੇ ਵਿਸਥਾਰ ਨੂੰ ਰੋਕ ਦੇਣਗੇ।