8.09C Vancouver 8.09C VancouverMay 21, 2020 2:17 AM -
ਨੈਸ਼ਨਲ ਡਿਜ਼ਾਸਟਰ ਰਿਸਪਾਂਸ ਟੀਮ (National Disaster Response team) ਦੇ ਡਾਇਰੈਕਟਰ ਜਨਰਲ, ਐਸ.ਐਨ. ਪ੍ਰਧਾਨ ਦਾ ਕਹਿਣਾ ਹੈ ਕਿ ਉੜੀਸਾ ਅਤੇ ਪੱਛਮੀ ਬੰਗਾਲ 'ਚ ਦਸਤਕ ਦੇਣ ਵਾਲੇ ਤੂਫ਼ਾਨ ਅਮਫਾਨ ਨਾਲ ਨਜਿੱਠਣ ਲਈ ਟੀਮਾਂ ਮੈਦਾਨ 'ਤੇ ਹਨ।
ਉਨ੍ਹਾਂ ਦੱਸਿਆ ਕਿ ਟੀਮਾਂ ਕੋਲ ਆਪਣੇ ਸੈਟੇਲਾਈਟ ਕਮਿਊਨੀਕੇਸ਼ਨ ਦੇ ਸਾਧਨ ਉਪਲੱਬਧ ਹਨ।
ਐਸ.ਐਨ. ਪ੍ਰਧਾਨ ਨੇ ਦੱਸਿਆ ਕਿ ਤੂਫ਼ਾਨ ਦੇ ਨਾਲ ਕੋਵਿਡ-19 ਪੈਂਡੇਮਿਕ ਦੇ ਸੁਰੱਖਿਆ ਕਦਮਾਂ ਨੂੰ ਧਿਆਨ 'ਚ ਰੱਖਦੇ ਹੋਏ ਹੀ ਨਜਿੱਠਿਆ ਜਾ ਰਿਹਾ ਹੈ।
ਡਾਇਰੈਕਟਰ ਜਨਰਲ ਨੇ ਕਿਹਾ ਕਿ ਕੁਝ ਸਮਾਂ ਪਹਿਲਾਂ ਤਬਾਹੀ ਮਚਾਉਣ ਵਾਲੇ 'ਫਾਨੀ' ਤੂਫ਼ਾਨ ਦੇ ਤਜ਼ਰਬਿਆਂ ਦਾ ਵੀ ਫਾਇਦਾ ਲਿਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਟੀਮਾਂ ਕੋਲ ਦਰਖ਼ਤ ਅਤੇ ਖੰਭੇ ਕੱਟਣ ਦੇ ਔਜ਼ਾਰ ਉਪਲੱਬਧ ਹਨ।
ਯਾਦ ਰਹੇ ਤੂਫ਼ਾਨ ਅਮਫਾਨ ਨੇ ਬੁੱਧਵਾਰ ਦੁਪਹਿਰ ਕਰੀਬ 2 ਵਜੇ ਭਾਰਤ 'ਚ ਜ਼ਮੀਨ 'ਤੇ ਦਸਤਕ ਦਿੱਤੀ ਸੀ।
ਮਮਤਾ ਬੈਨਰਜੀ ਨੇ ਰੱਖੀ ਤੂਫ਼ਾਨ 'ਤੇ ਨਜ਼ਰ
ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ, ਨਬੰਨਾ ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ ਤੋਂ ਤੂਫ਼ਾਨ ਅਮਫਾਨ 'ਤੇ ਨਜ਼ਰ ਬਣਾ ਕੇ ਰੱਖ ਰਹੀ ਸਨ।
ਉਨ੍ਹਾਂ ਅੱਜ ਇੱਕ ਬਿਆਨ 'ਚ ਕਿਹਾ ਕਿ ਤੂਫ਼ਾਨ ਦਾ ਪ੍ਰਭਾਵ ਕੋਵਿਡ-19 ਤੋਂ ਵੀ ਖ਼ਤਰਨਾਕ ਹੈ।
ਇਸ ਤੂਫ਼ਾਨ ਦਾ ਭਾਰਤ 'ਚ ਉੜੀਸਾ ਅਤੇ ਪੱਛਮੀ ਬੰਗਾਲ 'ਚ ਸਭ ਤੋਂ ਵੱਧ ਪ੍ਰਭਾਵ ਪਿਆ ਹੈ।
ਉੜੀਸਾ 'ਚ ਤੂਫ਼ਾਨ ਕਾਰਨ ਭਾਰੀ ਨੁਕਸਾਨ
ਉੜੀਸਾ ਦੇ ਪ੍ਰਦੀਪ ਦੇ ਇਲਾਕੇ 'ਚ ਅਮਫਾਨ ਤੂਫ਼ਾਨ ਦੇ ਭਾਰੀ ਨੁਕਸਾਨ ਪਹੁੰਚਾਉਣ ਦੀਆਂ ਖ਼ਬਰਾਂ ਹਨ।
ਜਗਤਸਿੰਘਪੁਰ ਦੇ ਇਲਾਕੇ 'ਚ ਹਵਾਵਾਂ ਦੀ ਰਫ਼ਤਾਰ 102ਕੀ.ਮੀ. ਪ੍ਰਤੀ ਘੰਟਾ ਤੱਕ ਦਰਜ ਕੀਤੀ ਗਈ।
ਇਸ ਦੌਰਾਨ ਬਹੁਤ ਸਾਰੇ ਘਰ, ਦਰਖ਼ਤ, ਖੰਭੇ ਅਤੇ ਹੋਰ ਇਮਾਰਤਾਂ ਅਤੇ ਢਾਂਚਿਆਂ ਨੂੰ ਨੁਕਸਾਨ ਪਹੁੰਚਿਆ।
ਤੇਜ਼ ਹਵਾਵਾਂ ਨੇ ਅਨੇਕਾਂ ਦਰਖ਼ਤ ਅਤੇ ਖੰਭੇ ਪੁੱਟ ਦਿੱਤੇ।
ਭੁਵਨੇਸ਼ਵਰ ਅਤੇ ਚਾਂਦੀਪੁਰ ਦੇ ਇਲਾਕੇ 'ਚ ਵੀ ਤੇਜ਼ ਹਵਾਵਾਂ ਅਤੇ ਭਾਰੀ ਬਾਰਿਸ਼ ਨੇ ਦਸਤਕ ਦਿੱਤੀ।
