ਬੀ.ਸੀ. ਦੇ ਵੈਸਟ ਸ਼ੋਰ ਆਰ.ਸੀ.ਐਮ.ਪੀ. ਦੇ ਫਰੰਟਲਾਈਨ ਅਧਿਕਾਰੀ ਹੁਣ ਬਾਡੀ ਕੈਮਰਿਆਂ ਨਾਲ ਦੇਣਗੇ ਡਿਊਟੀ

ਬੀ. ਸੀ. ਦੇ ਵੈਸਟ ਸ਼ੋਰ ਆਰ.ਸੀ.ਐਮ.ਪੀ. ਦੇ ਫਰੰਟਲਾਈਨ ਅਧਿਕਾਰੀ ਹੁਣ ਬਾਡੀ ਕੈਮਰਿਆਂ ਨਾਲ ਡਿਊਟੀ ਦੇਣਗੇ। ਇਹ ਨਵੀਂ ਪਹਿਲ ਪੁਲਿਸ ਦੀ ਜਨਤਾ ਨਾਲ ਪਾਰਦਰਸ਼ਤਾ, ਜਵਾਬਦੇਹੀ ਅਤੇ ਸਬੂਤ ਇਕੱਠੇ ਕਰਨ ਦੀ ਪ੍ਰਕਿਰਿਆ ਨੂੰ ਮਜ਼ਬੂਤ ਕਰਨ ਲਈ ਸ਼ੁਰੂ ਕੀਤੀ ਗਈ ਹੈ। ਇਸ ਤੋਂ ਪਹਿਲਾਂ ਹਾਲ ਹੀ ਵਿਚ ਸਰੀ ਪੁਲਿਸ ਸਰਵਿਸ ਨੇ ਛੇ ਮਹੀਨਿਆਂ ਦਾ ਸਰੀਰ ਨਾਲ ਪਹਿਨੇ ਕੈਮਰਾ ਪਾਇਲਟ ਪ੍ਰੋਜੈਕਟ ਸ਼ੁਰੂ ਕੀਤਾ ਸੀ।

ਵੈਸਟ ਸ਼ੋਰ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਇਹ ਕੈਮਰੇ ਅਧਿਕਾਰੀਆਂ ਦੀ ਜਨਤਾ ਨਾਲ ਹੋਣ ਵਾਲੀ ਗੱਲਬਾਤ ਨੂੰ ਤੁਰੰਤ ਰਿਕਾਰਡ ਕਰਨਗੇ, ਭਰੋਸੇਯੋਗ ਸਬੂਤ ਪ੍ਰਾਪਤ ਕਰਨ ਵਿਚ ਮਦਦ ਕਰਨਗੇ ਤੇ ਲੋਕਾਂ ਦੇ ਭਰੋਸੇ ਨੂੰ ਵਧਾਉਣਗੇ। ਜਿਹੜੇ ਅਧਿਕਾਰੀ ਇਹ ਕੈਮਰੇ ਵਰਤ ਰਹੇ ਹਨ, ਉਨ੍ਹਾਂ ਨੂੰ ਵਰਤੋਂ, ਡੇਟਾ ਸਟੋਰੇਜ ਅਤੇ ਸੁਰੱਖਿਆ ਬਾਰੇ ਵਿਸ਼ੇਸ਼ ਟ੍ਰੇਨਿੰਗ ਦਿੱਤੀ ਗਈ ਹੈ।

ਵੈਸਟ ਸ਼ੋਰ ਆਰ.ਸੀ.ਐਮ.ਪੀ. ਦੇ ਕਾਰਜਕਾਰੀ ਅਧਿਕਾਰੀ ਇੰਸਪੈਕਟਰ ਸਟੀਫਨ ਰੋਜ਼ ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਸਖ਼ਤ ਗੋਪਨੀਯਤਾ ਅਤੇ ਡੇਟਾ ਸੁਰੱਖਿਆ ਨੀਤੀਆਂ ਦਾ ਪਾਲਣ ਕਰਦਾ ਹੈ ਅਤੇ ਸਾਰਾ ਰਿਕਾਰਡ ਸਿਰਫ਼ ਕਾਨੂੰਨੀ ਅਤੇ ਅਧਿਕਾਰਤ ਉਦੇਸ਼ਾਂ ਲਈ ਹੀ ਵਰਤਿਆ ਜਾਵੇਗਾ। ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਇਹ ਤਕਨਾਲੋਜੀ ਬੀ.ਸੀ. ਦੀਆਂ ਹੋਰ ਡਿਟੈਚਮੈਂਟ ਵਿਚ ਵੀ ਰਾਸ਼ਟਰੀ ਯੋਜਨਾ ਦੇ ਤਹਿਤ ਲਾਗੂ ਕੀਤੀ ਜਾ ਰਹੀ ਹੈ।