ਵੈਸਟਜੈੱਟ ਏਅਰਲਾਈਨਜ਼ ਅਤੇ ਮਕੈਨਿਕਸ ਐਸੋਸੀਏਸ਼ਨ ਵਿਚਕਾਰ ਹੋਇਆ ਸਮਝੌਤਾ, ਹੜਤਾਲ ਟਲੀ

ਵੈਸਟਜੈੱਟ ਏਅਰਲਾਈਨਜ਼ ਅਤੇ ਏਅਰਕ੍ਰਾਫਟ ਮਕੈਨਿਕਸ ਫਰਾਟਰਨਲ ਐਸੋਸੀਏਸ਼ਨ ਵਿਚਕਾਰ ਸਮਝੌਤਾ ਹੋਣ ਕਾਰਨ ਸੰਭਾਵੀ ਹੜਤਾਲ ਨੂੰ ਟਾਲ ਦਿੱਤਾ ਗਿਆ ਹੈ। ਜਾਣਕਾਰੀ ਮੁਤਾਬਕ ਐਤਵਾਰ ਰਾਤ ਦੋਹਾਂ ਧਿਰਾਂ ਵਿਚਕਾਰ ਸਮਝੌਤਾ ਹੋ ਗਿਆ ਹੈ, ਹਾਲਾਂਕਿ ਇਸ ਦੀ ਡਿਟੇਲ ਬਾਰੇ ਜਾਣਕਾਰੀ ਜਨਤਕ ਨਹੀਂ ਕੀਤੀ ਗਈ।

ਗੌਰਤਲਬ ਹੈ ਕਿ ਏਅਰਕ੍ਰਾਫਟ ਦੇ ਰੱਖ-ਰਖਾਅ ਵਾਲੇ ਇੰਜੀਨੀਅਰਜ਼ ਦੀ ਨੁਮਾਇੰਦਗੀ ਕਰਨ ਵਾਲੀ ਇਸ ਯੂਨੀਅਨ ਨੂੰ ਵੈਸਟਜੈੱਟ ਵਲੋਂ ਸ਼ਨੀਵਾਰ 72 ਘੰਟਿਆਂ ਦੀ ਤਾਲਾਬੰਦੀ ਨੋਟਿਸ ਜਾਰੀ ਕੀਤਾ ਗਿਆ ਸੀ। ਜੇਕਰ ਇਨ੍ਹਾਂ ਵਿਚਕਾਰ ਡੀਲ ਫਾਈਨਲ ਨਾ ਹੁੰਦੀ ਤਾਂ ਮੰਗਲਵਾਰ ਦੁਪਹਿਰ ਤੋਂ ਕੰਮ ਰੁਕ ਸਕਦਾ ਸੀ। ਵੈਸਟਜੈੱਟ ਅਤੇ ਯੂਨੀਅਨ ਵਿਚਕਾਰ ਸਤੰਬਰ 2023 ਤੋਂ ਲੇਬਰ ਗੱਲਬਾਤ ਚੱਲ ਰਹੀ ਹੈ।

ਐਸੋਸੀਏਸ਼ਨ ਨੇ ਪਿਛਲੇ ਹਫਤੇ ਜਨਮਤ ਜਾਰੀ ਕੀਤਾ ਸੀ, ਜਿਸ ਵਿਚ ਯੂਨੀਅਨ ਮੈਂਬਰਜ਼ ਨੂੰ ਹੜਤਾਲ ਕਰਨ ਲਈ ਕਿਹਾ ਗਿਆ ਸੀ। ਜਨਮਤ ਲਈ ਵੋਟ ਪਾਉਣ ਦੀ ਆਖਰੀ ਤਰੀਕ 9 ਮਈ ਰੱਖੀ ਗਈ ਸੀ। ਦੱਸ ਦੇਈਏ ਕਿ ਇਨ੍ਹਾਂ ਵਿਚਕਾਰ ਤਨਖਾਹ ਅਤੇ ਸਮਾਂ-ਤਹਿ ਨੂੰ ਲੈ ਕੇ ਤਕਰਾਰ ਚੱਲ ਰਹੀ ਸੀ।