ਵੈਸਟਜੈੱਟ ਵੱਲੋਂ ਚੈਕ ਕੀਤੇ ਸਮਾਨ ਦੀ ਫੀਸ ਵਿੱਚ ਵਾਧਾ, ਏਅਰ ਕੈਨੇਡਾ ਦੇ ਕਦਮਾਂ ਤੋਂ ਬਾਅਦ ਲਿਆ ਫੈਸਲਾ

ਕੈਨੇਡੀਅਨ ਹਵਾਈ ਮੁਸਾਫ਼ਰਾਂ ਦੀ ਜੇਬ 'ਤੇ ਹੋਰ ਬੋਝ ਪੈਣ ਵਾਲਾ ਹੈ। ਏਅਰ ਕੈਨੇਡਾ ਦੇ ਨਕਸ਼ੇ-ਕਦਮਾਂ 'ਤੇ ਚੱਲਦਿਆਂ ਵੈਸਟਜੈਟ ਨੇ ਵੀ ਵੀਰਵਾਰ ਤੋਂ ਆਪਣੀਆਂ checked baggage fees ਵਿਚ ਵਾਧਾ ਕਰਨ ਦਾ ਐਲਾਨ ਕਰ ਦਿੱਤਾ ਹੈ। ਏਅਰਲਾਈਨ ਨੇ ਇਸ ਫੈਸਲੇ ਪਿੱਛੇ ਗਲੋਬਲ ਹਾਲਾਤ ਅਤੇ ਇੰਡਸਟਰੀ ਦੇ ਬਦਲਦੇ ਰੁਝਾਨਾਂ ਦਾ ਹਵਾਲਾ ਦਿੱਤਾ ਹੈ।

ਹੁਣ ਏਅਰਪੋਰਟ ਚੈੱਕ-ਇਨ 'ਤੇ ਪਹਿਲੇ ਦੋ ਬੈਗਾਂ ਲਈ $10 ਵਾਧੂ ਅਤੇ ਓਵਰਵੇਟ ਸਮਾਨ 'ਤੇ $50 ਤੱਕ ਦੀ ਵਾਧੂ ਫੀਸ ਲਈ ਜਾਵੇਗੀ। ਪਿਛਲੇ ਹਫ਼ਤੇ ਏਅਰ ਕੈਨੇਡਾ ਨੇ ਵੀ ਘਰੇਲੂ ਅਤੇ ਅਮਰੀਕਾ ਸਮੇਤ ਕੁਝ ਅੰਤਰਾਸ਼ਟਰੀ ਉਡਾਣਾਂ ਲਈ ਮੁੱਢਲੀ ਇਕਾਨਮੀ ਕਲਾਸ ਵਿਚ ਪਹਿਲੇ ਬੈਗ ਦੀ ਫੀਸ $35 ਤੋਂ ਵਧਾ ਕੇ $45 ਕਰ ਦਿੱਤੀ ਸੀ।

ਇਹ ਵਾਧਾ ਅਜਿਹੇ ਸਮੇਂ ਹੋਇਆ ਹੈ ਜਦੋਂ ਈਰਾਨ ਅਤੇ ਅਮਰੀਕਾ ਵਿਚਕਾਰ ਚੱਲ ਰਹੇ ਟਕਰਾਅ ਕਾਰਨ ਜੈੱਟ ਫਿਊਲ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ ਅਤੇ ਇਸ ਕਾਰਨ ਹਾਲ ਹੀ ਵਿਚ ਵੈਸਟਜੈੱਟ, ਏਅਰ ਕੈਨੇਡਾ ਅਤੇ ਏਅਰ ਟ੍ਰਾਂਸੈਟ ਨੇ ਘੱਟ ਮੁਨਾਫੇ ਵਾਲੇ ਰਸਤੇ ਲਈ ਆਪਣੀਆਂ ਉਡਾਣਾਂ ਦੀ ਗਿਣਤੀ ਵਿਚ ਕਟੌਤੀ ਦਾ ਫੈਸਲਾ ਕੀਤਾ ਹੈ।