14.66C Vancouver 14.66C VancouverMar 17, 2026 6:34 PM - Pervez Sandhu - Connect Newsroom
ਐਮ.ਐਲ.ਐਸ. ਮੁਕਾਬਲਿਆਂ 'ਚ ਵੈਨਕੂਵਰ ਵ੍ਹਾਈਟਕੈਪਸ ਦੀ ਟੀਮ ਦਾ ਧਮਾਕੇਦਾਰ ਖੇਡ ਲਗਾਤਾਰ ਜਾਰੀ ਹੈ।
ਲੰਘੇ ਵੀਕਐਂਡ ਦੌਰਾਨ ਵੈਨਕੂਵਰ ਵ੍ਹਾਈਟਕੈਪਸ ਦੀ ਟੀਮ ਨੇ ਆਪਣੇ ਘਰੇਲੂ ਮੈਦਾਨ, ਬੀ.ਸੀ. ਪਲੇਸ ਸਟੇਡੀਅਮ 'ਤੇ ਸੀਜ਼ਨ ਦਾ ਤੀਜਾ ਮੁਕਾਬਲਾ ਖੇਡਿਆ।
ਇਸ ਮੁਕਾਬਲੇ 'ਚ ਵ੍ਹਾਈਟਕੈਪਸ ਨੇ ਮੀਨੇਸੋਟਾ ਯੂਨਾਈਟਿਡ ਖਿਲਾਫ 6-0 ਨਾਲ ਜਿੱਤ ਦਰਜ ਕੀਤੀ।
ਮੁਕਾਬਲੇ ਦੀ ਸ਼ੁਰੂਆਤ ਤੋਂ ਹੀ ਵ੍ਹਾਈਟਕੈਪਸ ਨੇ ਦਬਦਬਾ ਬਣਾਉਣਾ ਸ਼ੁਰੂ ਕਰ ਦਿੱਤਾ ਸੀ।
ਲਗਾਤਾਰ ਅਟੈਕਿੰਗ ਮੋਡ 'ਚ ਖੇਡ ਰਹੀ ਘਰੇਲੂ ਟੀਮ ਨੇ ਪਹਿਲੇ ਹਾਫ ਵਿੱਚ 4-0 ਦੀ ਲੀਡ ਹਾਸਿਲ ਕਰ ਲਈ ਸੀ।
ਵ੍ਹਾਈਟਕੈਪਸ ਲਈ ਪਹਿਲੇ ਹਾਫ 'ਚ 8ਵੇਂ ਮਿੰਟ 'ਚ ਬਰਹਾਲਟਰ ਨੇ ਪੈਨਲਟੀ ਨੂੰ ਗੋਲ 'ਚ ਤਬਦੀਲ ਕੀਤਾ।
ਫਿਰ 13ਵੇਂ ਮਿੰਟ 'ਚ ਬ੍ਰਾਇਨ ਵ੍ਹਾਈਟ ਨੇ ਗੋਲ ਦਾਗਿਆ।
ਇਸ ਤੋਂ ਬਾਅਦ 22ਵੇਂ ਮਿੰਟ 'ਚ ਲਬੋਰਡਾ ਅਤੇ 43ਵੇਂ ਮਿੰਟ 'ਚ ਸਾਬੀ ਨੇ ਗੋਲ ਦਾਗਿਆ।
ਮੁਕਾਬਲੇ ਦੇ ਦੂਜੇ ਹਾਫ ਦੇ ਵਿੱਚ 54ਵੇਂ ਮਿੰਟ 'ਚ ਬ੍ਰਾਇਨ ਵ੍ਹਾਈਟ ਨੇ ਪੈਨਲਟੀ ਨੂੰ ਗੋਲ 'ਚ ਤਬਦੀਲ ਕੀਤਾ ਅਤੇ ਇਸ ਦੇ ਨਾਲ ਹੀ ਐਮ.ਐਲ.ਐਸ. ਮੁਕਾਬਲਿਆਂ 'ਚ ਆਪਣੇ 100 ਗੋਲ ਕੰਟਰੀਬਿਊਸ਼ਨਸ ਪੂਰੇ ਕਰ ਲਏ, ਜਿਸ 'ਚ 84 ਗੋਲ ਅਤੇ 16 ਅਸਿਸਟ ਸ਼ਾਮਿਲ ਹਨ।
ਵੈਨਕੂਵਰ ਵ੍ਹਾਈਟਕੈਪਸ ਇਥੇ ਹੀ ਨਹੀਂ ਰੁਕੇ ਅਤੇ 73ਵੇਂ ਮਿੰਟ 'ਚ ਟੀਮ ਲਈ ਸਬਾਲੀ ਨੇ ਗੋਲ ਦਾਗਿਆ ਅਤੇ ਸਕੋਰ 6-0 'ਤੇ ਪਹੁੰਚਾ ਦਿੱਤਾ।
ਵ੍ਹਾਈਟਕੈਪਸ ਦੀ ਟੀਮ ਹੁਣ ਐਮ.ਐਲ.ਐਸ. ਦੇ ਪਹਿਲੇ ਚਾਰ ਮੁਕਾਬਲੇ ਜਿੱਤ ਚੁੱਕੀ ਹੈ, ਜਿੱਥੇ ਪਹਿਲੇ ਮੁਕਾਬਲੇ 'ਚ 21 ਫਰਵਰੀ ਨੂੰ ਟੀਮ ਨੇ ਰੀਅਲ ਸਾਲਟ ਲੇਕ ਖਿਲਾਫ 1-0 ਨਾਲ ਜਿੱਤ ਦਰਜ ਕੀਤੀ ਸੀ।
ਇਸ ਤੋਂ ਬਾਅਦ 28 ਫਰਵਰੀ ਨੂੰ ਵ੍ਹਾਈਟਕੈਪਸ ਨੇ ਆਲ ਕਨੇਡੀਅਨ ਮੁਕਾਬਲੇ 'ਚ ਟੋਰੌਂਟੋ ਨੂੰ 3-0 ਨਾਲ ਮਾਤ ਦਿੱਤੀ ਸੀ।
ਫਿਰ 7 ਮਾਰਚ ਨੂੰ ਪੋਰਟਲੈਂਡ ਖਿਲਾਫ ਉਨ੍ਹਾਂ ਦੇ ਘਰੇਲੂ ਮੈਦਾਨ 'ਤੇ ਵ੍ਹਾਈਟਕੈਪਸ 4-1 ਨਾਲ ਜੇਤੂ ਰਹੇ।
ਵ੍ਹਾਈਟਕੈਪਸ ਲਈ ਇਹ ਐਮ.ਐਲ.ਐਸ. ਮੁਕਾਬਲਿਆਂ ਦੇ ਆਪਣੇ ਕਲੱਬ ਇਤਿਹਾਸ 'ਚ ਪਹਿਲੇ ਚਾਰ ਮੁਕਾਬਲਿਆਂ ਅਨੁਸਾਰ ਸਭ ਤੋਂ ਦਮਦਾਰ ਸ਼ੁਰੂਆਤ ਹੈ।
