14.63C Vancouver 14.63C VancouverAug 29, 2024 12:25 PM - The Canadian Press
ਬੀ. ਸੀ . ਵਿਚ ਬਾਰਿਸ਼ ਅਤੇ ਮੌਸਮ ਵਿਚ ਬਦਲਾਅ ਦੇ ਕਾਰਨ ਜੰਗਲੀ ਅੱਗ ਦੀ ਸੰਖਿਆ ਵਿਚ ਲਗਾਤਾਰ ਕਮੀ ਜਾਰੀ ਹੈ। ਬੀ. ਸੀ .ਵਾਈਲਡਫਾਇਰ ਸਰਵਿਸ ਮੁਤਾਬਿਕ ਸੂਬੇ ਵਿਚ ਇਸ ਵੇਲੇ 280 ਸਰਗਰਮ ਅੱਗਾਂ ਬਲ਼ ਰਹੀਆਂ ਹਨ ਜਿਨ੍ਹਾਂ ਵਿਚੋਂ 15% ਜਾਂ ਸਿਰਫ 40 ਹੀ ਬੇਕਾਬੂ ਦੱਸੀਆਂ ਜਾ ਰਹੀਆਂ ਹਨ। ਇਹ ਸੰਖਿਆ ਪਿਛਲੇ ਹਫਤੇ 100 ਦੇ ਕਰੀਬ ਸੀ।
ਵਾਈਲਡਫਾਇਰ ਸਰਵਿਸ ਮੁਤਾਬਿਕ ਇਨ੍ਹਾਂ ਵਿਚੋਂ ਕੋਈ ਵੀ ਜੰਗਲੀ ਅੱਗ ਬਹੁਤ ਜ਼ਿਆਦਾ ਦਿਖਾਈ ਨਹੀਂ ਦੇ ਰਹੀ ਜਾਂ ਲੋਕਾਂ ਜਾਂ ਬੁਨਿਆਦੀ ਢਾਂਚੇ ਲਈ ਖਤਰਾ ਪੈਦਾ ਨਹੀਂ ਕਰ ਰਹੀ। ਇਸ ਤੋਂ ਇਲਾਵਾ ਅੱਜ ਦੁਪਿਹਰ ਤੋਂ ਕੈਂਪਫਾਇਰ 'ਤੇ ਲੱਗੀ ਪਾਬੰਦੀ ਨੂੰ ਵੀ ਹਟਾਇਆ ਜਾ ਰਿਹਾ ਹੈ। ਵਾਈਲਡਫਾਇਰ ਸਰਵਿਸ ਦਾ ਕਹਿਣਾ ਹੈ ਕਿ ਹਾਲ ਹੀ ਵਿੱਚ ਹੋਈ ਬਾਰਿਸ਼ ਅਤੇ ਠੰਡੇ ਮੌਸਮ ਨੇ ਉਨ੍ਹਾਂ ਖੇਤਰਾਂ ਵਿੱਚ ਅੱਗ ਲੱਗਣ ਦੇ ਖਤਰੇ ਨੂੰ ਘੱਟ ਕਰ ਦਿੱਤਾ ਹੈ ਪਰ ਲੋਕਾਂ ਨੂੰ ਅਜੇ ਵੀ ਅੱਗ ਬਾਲਣ ਵੇਲੇ ਸਾਵਧਾਨੀ ਵਰਤਣ ਦੀ ਜ਼ਰੂਰਤ ਹੈ।
ਵਾਈਲਡਫਾਇਰ ਸਰਵਿਸ ਮੁਤਾਬਿਕ ਅੱਗ ਸੁਰੱਖਿਅਤ ਢੰਗ ਅਤੇ ਜ਼ਿੰਮੇਵਾਰੀ ਨਾਲ ਨਿਯਮਾਂ ਅਨੁਸਾਰ ਹੀ ਬਾਲੀ ਜਾਣੀ ਚਾਹੀਦੀ ਹੈ। ਇਸ ਤੋਂ ਇਲਾਵਾ ਵੱਡੇ ਪੱਧਰ ਦੀਆਂ ਅੱਗਾਂ 'ਤੇ ਪਾਬੰਦੀ ਅਜੇ ਜਾਰੀ ਰਹੇਗੀ ਜਿਸ ਵਿਚ ਆਤਿਸ਼ਬਾਜ਼ੀ, ਆਸਮਾਨੀ ਲਾਲਟੇਨ , ਵਿਸਫੋਟਕ ਸਮੱਗਰੀ ਅਤੇ ਬਰਨ ਬੈਰਲਸ ਸ਼ਾਮਲ ਹਨ। ਜ਼ਿਕਰਯੋਗ ਹੈ ਕਿ ਕੋਸਟਲ ਅਤੇ ਕਾਮਲੂਪਸ ਫਾਇਰ ਸੈਂਟਰ ਲਈ ਪਾਬੰਦੀ 12 ਜੁਲਾਈ ਨੂੰ ਲਾਗੂ ਕੀਤੀ ਗਈ ਸੀ।
