ਗੋਲਡਨ ਈਅਰਸ ਵੇਅ ਨੇੜੇ ਵਾਪਰੇ ਹਾਦਸੇ ਵਿੱਚ ਮਹਿਲਾ ਦੀ ਮੌਤ,ਆਰ.ਸੀ.ਐਮ.ਪੀ. ਵੱਲੋਂ ਜਾਂਚ ਜਾਰੀ

ਮੈਪਲ ਰਿਜ ਅਤੇ ਪਿਟ ਮੀਡੋਜ਼ ਨੂੰ ਜੋੜਨ ਵਾਲੀ ਸੜਕ 'ਤੇ ਸਿੰਗਲ-ਵਾਹਨ ਹਾਦਸੇ ਵਿਚ ਇੱਕ ਮਹਿਲਾ ਡਰਾਈਵਰ ਦੀ ਮੌਤ ਹੋ ਗਈ। ਪੁਲਿਸ ਨੇ ਕਿਹਾ ਕਿ ਹਾਦਸਾ ਸ਼ਨੀਵਾਰ ਰਾਤ ਲਗਭਗ 8:30 ਵਜੇ ਗੋਲਡਨ ਈਅਰਸ ਵੇਅ ਕੋਲ ਵਾਪਰਿਆ, ਜਿਥੇ ਗੱਡੀ ਬੇਕਾਬੂ ਹੋ ਕੇ ਸੜਕ ਕਿਨਾਰੇ ਲੱਗੇ ਇੱਕ ਲੈਂਪ ਪੋਸਟ ਨਾਲ ਟਕਰਾਈ।

ਆਰ.ਸੀ.ਐਮ.ਪੀ.ਮੁਤਾਬਕ, ਮਹਿਲਾ ਆਪਣੀ ਗੱਡੀ ਟੋਇਟਾ ਆਰ.ਏ.ਵੀ.4 ਵਿਚ ਇੱਕਲੌਤੀ ਸਵਾਰ ਸੀ। ਰਿਜ ਮੀਡੋਜ਼ ਆਰਸੀਐਮਪੀ ਇਸ ਘਟਨਾ ਦੀ ਜਾਂਚ ਕਰ ਰਹੀ ਹੈ, ਜਿਸ ਦੇ ਇਨਵੈਸਟੀਗੇਟਰਸ ਦਾ ਮੰਨਣਾ ਹੈ ਕਿ ਤੇਜ਼ ਰਫ਼ਤਾਰ ਹਾਦਸੇ ਦਾ ਇੱਕ ਮੁੱਖ ਕਾਰਨ ਹੋ ਸਕਦਾ ਹੈ। ਪੁਲਿਸ ਵਲੋਂ ਇਸ ਘਟਨਾ ਦੇ ਗਵਾਹਾਂ ਨਾਲ ਗੱਲਬਾਤ ਤੋਂ ਇਲਾਵਾ ਡੈਸ਼ਕੈਮ ਫੁਟੇਜ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਅਤੇ ਫਿਲਹਾਲ ਮ੍ਰਿਤਕਾ ਦੀ ਪਛਾਣ ਨਹੀਂ ਦੱਸੀ ਗਈ।