ਸਰੀ ਵਿਚ ਇੱਕ ਘਰ 'ਤੇ ਚੱਲੀਆਂ ਗੋਲੀਆਂ, ਪੁਲਿਸ ਵੱਲੋਂ ਜਾਂਚ ਜਾਰੀ

ਸਰੀ ਦੇ 101ਬੀ ਐਵੇਨਿਊ ਦੇ 12100-ਬਲਾਕ ਵਿਚ ਇੱਕ ਘਰ 'ਤੇ ਚੱਲੀਆਂ ਗੋਲੀਆਂ ਵਿਚ ਇੱਕ ਔਰਤ ਜ਼ਖਮੀ ਹੋਈ ਹੈ। ਪੁਲਿਸ ਮੁਤਾਬਕ, ਹਸਪਤਾਲ ਲਿਜਾਣ ਸਮੇਂ ਉਸ ਦੀ ਹਾਲਤ ਖ਼ਤਰੇ ਵਿਚੋਂ ਬਾਹਰ ਸੀ ਅਤੇ ਉਸ ਤੋਂ ਇਲਾਵਾ ਘਰ ਵਿਚ ਹੋਰ ਵੀ ਲੋਕ ਸਨ ਪਰ ਹੋਰ ਕਿਸੇ ਨੂੰ ਨੁਕਸਾਨ ਨਹੀਂ ਪੁੱਜਾ।

ਸਰੀ ਪੁਲਿਸ ਸਰਵਿਸ ਮੁਤਾਬਕ, ਉਸ ਨੂੰ ਗੋਲੀ ਚੱਲਣ ਦੀ ਸੂਚਨਾ ਰਾਤ ਕਰੀਬ 9.11 ਵਜੇ ਮਿਲੀ। ਐਸ.ਪੀ.ਐਸ. ਅਧਿਕਾਰੀ ਜਾਂਚ ਅਤੇ ਸਬੂਤ ਇਕੱਠੇ ਕਰਨ ਲਈ ਅੱਜ ਪੂਰਾ ਦਿਨ ਘਟਨਾ ਸਥਾਨ 'ਤੇ ਰਹਿਣਗੇ। ਪੁਲਿਸ ਨੇ ਕਿਹਾ ਕਿ ਇਨਵੈਸਟੀਗੇਟਸ਼ਨ ਸ਼ੁਰੂਆਤੀ ਸਟੇਜ ਵਿਚ ਹੈ, ਇਸ ਲਈ ਗੋਲੀ ਚੱਲਣ ਦਾ ਮਕਸਦ ਅਜੇ ਜਾਂਚ ਦਾ ਵਿਸ਼ਾ ਹੈ।

ਹਾਲਾਂਕਿ, ਸਰੀ ਪੁਲਿਸ ਸਰਵਿਸ ਨੇ ਕਿਹਾ ਕਿ ਹੁਣ ਤੱਕ ਫਿਰੌਤੀ ਨਾਲ ਜੁੜਿਆ ਕੋਈ ਲਿੰਕ ਨਹੀਂ ਮਿਲਿਆ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਜੇ ਕਿਸੇ ਕੋਲ ਇਸ ਘਟਨਾ ਸਬੰਧ ਕੋਈ ਜਾਣਕਾਰੀ ਹੈ ਜਾਂ ਜੋ ਕੋਈ ਵੀ ਰਾਤ 8.30 ਵਜੇ ਤੋਂ 9.15 ਵਜੇ ਵਿਚਕਾਰ 101ਬੀ ਐਵੇਨਿਊ ਦੇ 12100-ਬਲਾਕ ਦੇ ਇਲਾਕੇ ਵਿਚ ਸੀ ਅਤੇ ਜਿਸ ਨੇ ਗੋਲੀਆਂ ਚੱਲਦੀਆਂ ਦੇਖੀਆਂ ਹੋ ਸਕਦੀਆਂ ਸਨ ਤਾਂ ਉਹ ਸਰੀ ਪੁਲਿਸ ਸਰਵਿਸ ਨਾਲ 604-599-0502 'ਤੇ ਸੰਪਰਕ ਕਰ ਸਕਦਾ ਹੈ।