18.42C Vancouver 18.42C VancouverMar 3, 2021 9:38 PM -
ਨੌਰਥ ਵੈਨਕੂਵਰ ਦੇ ਵਿੱਚ ਵਾਪਰੇ ਇੱਕ ਕ੍ਰੈਸ਼ ਦੌਰਾਨ ਵਾਹਨ ਚਾਲਕ ਦੀ ਮੌਤ ਹੋ ਗਈ ਹੈ।
ਘਟਨਾ ਦੌਰਾਨ ਗੱਡੀ 'ਚ ਸਵਾਰ ਇੱਕ ਹੋਰ ਵਿਅਕਤੀ ਦੇ ਗੰਭੀਰ ਜ਼ਖਮੀ ਹੋਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ।
ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਕ੍ਰੈਸ਼ ਮੰਗਲਵਾਰ ਰਾਤ ਵਾਪਰਿਆ ਸੀ। ਘਟਨਾ ਸੇਂਟ ਪੈਟ੍ਰਿਕਸ ਇਲਾਕੇ 'ਚ 'ਲੋਅ ਲੈਵਲ ਰੋਡ' ਕੋਲ ਵਾਪਰੀ।
ਪੁਲਿਸ ਨੂੰ 2 ਵਾਹਨਾਂ ਵਿਚਾਲੇ ਆਹਮੋ-ਸਾਹਮਣੇ ਦੀ ਟੱਕਰ ਦੀ ਜਾਣਕਾਰੀ ਮਿਲੀ ਸੀ।
ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਵਾਹਨ, ਜਿਸ ਵਿੱਚ ਇੱਕ ਆਦਮੀ ਸਵਾਰ ਸੀ, ਉਹ ਸੈਂਟਰ ਲਾਈਨ ਨੂੰ ਟੱਪ ਗਿਆ ਅਤੇ ਇੱਕ ਹੋਰ ਵਾਹਨ ਨਾਲ ਜਾ ਟਕਰਾਇਆ।
ਜਦ ਤਕ ਐਮਰਜੈਂਸੀ ਸੇਵਾਵਾਂ ਮੌਕੇ 'ਤੇ ਪਹੁੰਚੀਆਂ ਉਸ ਵੇਲੇ ਤਕ ਇਸ ਵਿਅਕਤੀ ਦੀ ਗੱਡੀ ਨੂੰ ਅੱਗ ਲਗ ਗਈ ਸੀ।
ਅੱਗ ਲੱਗਣ ਤੋਂ ਪਹਿਲਾਂ ਵਿਅਕਤੀ ਨੂੰ ਬਾਹਰ ਕੱਢ ਲਿਆ ਗਿਆ ਸੀ।
ਤਿੰਨਾਂ ਲੋਕਾਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ ਸੀ, ਜਿੱਥੇ ਵਾਹਨ ਚਾਲਕ ਔਰਤ ਨੂੰ ਮ੍ਰਿਤ ਐਲਾਨ ਦਿੱਤਾ ਗਿਆ।
ਔਰਤ ਨਾਲ ਸਵਾਰ ਵਿਅਕਤੀ ਦੀ ਹਾਲਤ ਨਾਜ਼ੁਕ ਦੱਸੀ ਗਈ ਹੈ।
ਵਾਹਨ ਚਾਲਕ ਆਦਮੀ ਨੂੰ ਵੀ ਗੰਭੀਰ ਸੱਟਾਂ ਲੱਗੀਆਂ ਹਨ।
ਪੁਲਿਸ ਦਾ ਮੰਨਣਾ ਹੈ ਕਿ ਘਟਨਾ 'ਚ ਸ਼ਰਾਬ ਦਾ ਸੇਵਨ ਇੱਕ ਕਾਰਨ ਹੋ ਸਕਦਾ ਹੈ।
