15.7C Vancouver 15.7C VancouverDec 12, 2025 6:39 PM - Connect Newsroom - Ramandeep Kaur with files from The Canadian Press
ਬੀ. ਸੀ. ਵਿਚ ਉਸਾਰੀ ਵਾਲੀਆਂ ਥਾਵਾਂ 'ਤੇ ਕਰੇਨ ਹਾਦਸੇ ਦੇ ਲੜੀਵਾਰ ਮਾਮਲਿਆਂ ਦੇ ਸਬੰਧ ਵਿਚ ਵਰਕਸੇਫਬੀਸੀ ਨੇ ਦੋ ਕੰਪਨੀਆਂ 'ਤੇ ਕਰੀਬ $1.3 ਮਿਲੀਅਨ ਦਾ ਜੁਰਮਾਨਾ ਲਗਾਇਆ ਹੈ। ਇਸ ਵਿਚ ਪਿਛਲੇ ਸਾਲ ਵੈਨਕੂਵਰ ਦੇ ਓਕਰਿਜ ਪਾਰਕ ਡਿਵੈਲਪਮੈਂਟ ਵਿਚ ਫਰਵਰੀ 2024 ਵਿਚ ਹੋਈ ਉਹ ਘਟਨਾ ਵੀ ਸ਼ਾਮਲ ਹੈ, ਜਿੱਥੇ ਯੂਰੀਡੀਆ ਫਲੋਰੇਸ ਨਾਂ ਮਹਿਲਾ ਵਰਕਰ ਦੀ ਦਰਦਨਾਕ ਮੌਤ ਹੋ ਗਈ ਸੀ।
ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਇੱਕ 9.6 ਮੀਟਰ ਲੰਬਾ ਅਤੇ ਛੇ ਮੀਟਰ ਚੌੜਾ ਕੰਕਰੀਟ ਦਾ ਭਾਰੀ ਮੋਲਡ, ਜਿਸ ਨੂੰ ਕ੍ਰੇਨ ਰਾਹੀਂ ਇੱਕ ਫਲੋਰ ਤੋਂ ਦੂਜੇ ਫਲੋਰ 'ਤੇ ਲਿਜਾਇਆ ਜਾ ਰਿਹਾ ਸੀ, ਅਚਾਨਕ 26 ਮੰਜ਼ਿਲਾਂ ਉੱਪਰੋਂ ਡਿੱਗ ਗਿਆ, ਜਿਸ ਵਿਚ ਫਲੋਰੇਸ ਮਾਰੀ ਗਈ। ਵਰਕਸੇਫਬੀਸੀ ਐਲਿਸਡੌਨ ਨੂੰ ਲਗਭਗ $515,000 ਦਾ ਜੁਰਮਾਨਾ ਅਤੇ ਨਿਊਵੇਅ ਕੰਕਰੀਟ ਫਾਰਮਿੰਗ ਨੂੰ $113,000 ਦਾ ਜੁਰਮਾਨਾ ਕੀਤਾ ਹੈ।
ਫਲੋਰੇਸ ਮੂਲ ਰੂਪ ਤੋਂ ਮੈਕਸੀਕੋ ਨਾਲ ਸਬੰਧ ਰੱਖਦੀ ਸੀ, ਉਹ ਦੋ ਬੱਚਿਆਂ ਦੀ ਮਾਂ ਸੀ ਅਤੇ 2023 ਵਿਚ ਹੀ ਪੀ. ਆਰ. ਹੋਈ ਸੀ। ਮਜ਼ਦੂਰ ਵਜੋਂ ਨੌਕਰੀ ਉਸ ਦੀ ਇਹ ਪਹਿਲੀ ਨੌਕਰੀ ਸੀ ਅਤੇ ਬਦਕਿਸਮਤੀ ਨਾਲ ਇਹ ਨੌਕਰੀ ਉਸ ਦੀ ਆਖਰੀ ਸਾਬਤ ਹੋਈ। ਇਸ ਤੋਂ ਇਲਾਵਾ ਐਲਿਸਡੌਨ ਨੂੰ ਇਸ ਸਾਲ ਅਪ੍ਰੈਲ ਅਤੇ ਜੂਨ ਵਿਚ ਹੋਏ ਦੋ ਹੋਰ ਵੱਖਰੇ ਕ੍ਰੇਨ ਹਾਦਸਿਆਂ, ਜਿਨ੍ਹਾਂ ਵਿਚ ਭਾਵੇਂ ਕੋਈ ਗੰਭੀਰ ਜ਼ਖਮੀ ਨਹੀਂ ਹੋਇਆ ਸੀ ਉਸ ਲਈ ਵੀ ਵਾਧੂ $689,000 ਦਾ ਜੁਰਮਾਨਾ ਭਰਨਾ ਪਿਆ ਹੈ।
