16.93C Vancouver 16.93C VancouverSep 13, 2023 7:22 PM - Connect News
ਕੈਨੇਡਾ ਦੀ ਟਰੂਡੋ ਸਰਕਾਰ ਨੇ ਘਰਾਂ ਦੀ ਘਾਟ ਦਾ ਸੰਕਟ ਹੱਲ ਕਰਨ ਲਈ ਹਾਊਸਿੰਗ ਐਕਸਲੇਟਰ ਫੰਡ ਤਹਿਤ ਨਗਰਪਾਲਿਕਾਵਾਂ ਨਾਲ ਡੀਲ ਵਿੱਚ ਨਵੇਂ ਘਰਾਂ ਦਾ ਨਿਰਮਾਣ ਸ਼ੁਰੂ ਕਰਨ ਦੀ ਸ਼ੁਰੂਆਤ ਕਰ ਦਿੱਤੀ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਬੁੱਧਵਾਰ ਨੂੰ ਓਨਟੇਰਿਓ ਦੇ ਲੰਡਨ ਵਿੱਚ 2000 ਨਵੇਂ ਘਰ ਬਣਾਉਣ ਲਈ $74 ਮਿਲੀਅਨ ਦੀ ਮਦਦ ਦੇਣ ਦੀ ਘੋਸ਼ਣਾ ਕੀਤੀ।
ਲੰਡਨ ਸਿਟੀ ਹਾਊਸਿੰਗ ਐਕਸਲੇਟਰ ਫੰਡ ਤਹਿਤ ਫੈਡਰਲ ਸਰਕਾਰ ਨਾਲ ਸਮਝੌਤੇ 'ਤੇ ਪਹੁੰਚਣ ਵਾਲੀ ਕੈਨੇਡਾ ਦੀ ਪਹਿਲੀ ਸਿਟੀ ਬਣ ਗਈ ਹੈ। ਇਸ ਡੀਲ ਤਹਿਤ ਸਿਟੀ ਵਿਚ ਤਿੰਨ ਸਾਲਾਂ ਦੌਰਾਨ 2,000 ਨਵੇਂ ਘਰ ਬਣਨਗੇ। ਲਿਬਰਲ ਸਰਕਾਰ ਮੁਤਾਬਕ ਹਾਊਸਿੰਗ ਐਕਸਲੇਟਰ ਫੰਡ ਦਾ ਟੀਚਾ ਦੇਸ਼ ਵਿਚ 100,000 ਹਾਊਸਿੰਗ ਯੂਨਿਟ ਬਣਾਉਣ ਦਾ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਲੰਡਨ ਸਿਟੀ ਵਿੱਚ ਪਾਰਟੀ ਦੀ ਬੈਠਕ ਵਿੱਚ ਸ਼ਾਮਲ ਹੋਣ ਲਈ ਪਹੁੰਚੇ ਸਨ।
ਗੌਰਤਲਬ ਹੈ ਕਿ ਲਿਬਰਲਸ ਨੇ 2021 ਵਿਚ ਚੋਣ ਮੁਹਿੰਮ ਦੌਰਾਨ ਹਾਊਸਿੰਗ ਐਕਸਲੇਟਰ ਫੰਡ ਦੀ ਘੋਸ਼ਣਾ ਕੀਤੀ ਸੀ ਅਤੇ ਇਸ ਨੂੰ 2022 ਦੇ ਫੈਡਰਲ ਬਜਟ ਵਿੱਚ ਪੇਸ਼ ਕੀਤਾ ਸੀ, ਜਦੋਂ ਕਿ ਇਸ ਨੂੰ ਅਧਿਕਾਰਤ ਤੌਰ 'ਤੇ ਲੌਂਚ ਇਸ ਸਾਲ ਮਾਰਚ ਵਿੱਚ ਕੀਤਾ ਗਿਆ।
ਸਰਕਾਰ ਦਾ ਕਹਿਣਾ ਹੈ ਕਿ ਲੰਡਨ ਦੀ ਤਰ੍ਹਾਂ ਦੇਸ਼ ਵਿਚ ਹੋਰ ਨਗਰਪਾਲਿਕਾਵਾਂ ਨਾਲ ਵੀ ਸਮਝੌਤੇ ਕੀਤੇ ਜਾਣਗੇ।
ਲੰਡਨ ਦੇ ਮੇਅਰ ਜੋਸ਼ ਮੌਰਗਨ ਨੇ ਕਿਹਾ ਕਿ ਉਹ ਚਾਹੁੰਦੇ ਹਨ ਕਿ ਹਾਊਸਿੰਗ ਨਿਰਮਾਣ ਦੇ ਮੁੱਦੇ ‘ਤੇ ਇਹ ਸਮਝੌਤਾ ਦੇਸ਼ ਦੇ ਬਾਕੀ ਹਿੱਸਿਆਂ ਲਈ ਵੀ ਇੱਕ ਮਿਸਾਲ ਕਾਇਮ ਕਰੇ। ਜ਼ਿਕਰਯੋਗ ਹੈ ਕਿ ਟ੍ਰੂਡੋ ਸਰਕਾਰ ‘ਤੇ ਹਾਊਸਿੰਗ ਸੰਕਟ ਨੂੰ ਲੈਕੇ ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਦਬਾਅ ਬਹੁਤ ਵਧ ਗਿਆ ਹੈ।
ਕੈਨੇਡਾ ਮੋਰਗੇਜ ਐਂਡ ਹਾਊਸਿੰਗ ਕਾਰਪੋਰੇਸ਼ਨ ਨੇ ਇੱਕ ਨਵੀਂ ਰਿਪੋਰਟ ਵਿੱਚ ਕਿਹਾ ਹੈ ਕਿ ਸਾਲ 2004 ਜਿੰਨਾ ਕਿਫ਼ਾਇਤ ਪੱਧਰ ਪ੍ਰਾਪਤ ਕਰਨ ਲਈ ਸਾਲ 2030 ਤੱਕ ਜਿੰਨੇ ਘਰ ਬਣਨੇ ਹਨ ਉਸਤੋਂ ਇਲਾਵਾ 3.5 ਮਿਲੀਅਨ ਵਾਧੂ ਘਰਾਂ ਦੇ ਨਿਰਮਾਣ ਦੀ ਜ਼ਰੂਰਤ ਹੋਵੇਗੀ।
ਦੱਸ ਦਈਏ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇਹ ਐਲਾਨ ਉਸ ਸਮੇਂ ਕੀਤਾ ਜਦੋਂ ਕੰਸਟਰਕਸ਼ਨ ਸਾਈਟਾਂ ਪਹਿਲਾਂ ਹੀ ਲੇਬਰ ਦੀ ਘਾਟ ਨਾਲ ਜੂਝ ਰਹੀਆਂ ਹਨ।
