News

ਨੌਰਥ ਸੈਂਟ੍ਰਲ ਐਲਬਰਟਾ ਦੇ ਟਾਊਨ ਸਵੈਨ ਹਿਲਜ਼ ਦੇ ਲੋਕਾਂ ਨੂੰ ਜੰਗਲੀ ਅੱਗ ਦੇ ਖਤਰੇ ਕਾਰਨ ਘਰ ਖਾਲੀ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਬੀਤੇ ਦਿਨ ਲੋਕਾਂ ਨੂੰ ਆਪਣਾ ਤਿੰਨ ਦਿਨਾਂ ਦਾ ਸਮਾਨ ਅਤੇ ਜ਼ਰੂਰੀ ਦਸਤਾਵੇਜ਼ ਪੈਕ ਕਰਕੇ ਰੱਖਣ ਦੇ ਹੁਕਮ ਦਿੱਤੇ ਗਏ ਸਨ ਅਤੇ ਉਨ੍ਹਾਂ ਕੋਲੋਂ ਸ਼ਾਮ ਸਮੇਂ ਘਰ ਖਾਲੀ ਕਰਵਾਏ ਗਏ। 16-ਵਰਗ-ਕਿਲੋਮੀਟਰ ਵਿਚ ਫੈਲੀ ਬੇਕਾਬੂ ਜੰਗਲੀ ਅੱਗ ਰਿਹਾਇਸ਼ੀ ਘਰਾਂ ਵੱਲ ਵੱਧ ਗਈ ਹੈ ਅਤੇ ਟਾਊਨ ਦਾ ਨੌਰਥ ਹਾਈਵੇਅ ਵੀ ਬੰਦ ਹੋ ਗਿਆ ਹੈ।

ਕੈਨੇਡੀਅਨ ਪਾਰਲੀਮੈਂਟ ਵਿਚ ਅੱਜ ਸਵੇਰ ਕਿੰਗ ਚਾਰਲਸ ਸੰਬੋਧਨ ਕਰਨਗੇ, ਜਿਸ ਦੇ ਨਾਲ ਹੀ ਸੰਸਦ ਦਾ ਨਵਾਂ ਸੈਸ਼ਨ ਅਧਿਕਾਰਤ ਤੌਰ 'ਤੇ ਸ਼ੁਰੂ ਹੋ ਜਾਵੇਗਾ। ਚਾਰਲਸ ਆਪਣੀ ਸਪੀਚ ਵਿਚ ਮਾਰਕ ਕਾਰਨੀ ਸਰਕਾਰ ਵਲੋਂ ਕੀਤੇ ਜਾਣ ਵਾਲੇ ਕੰਮਾਂ ਦਾ ਜ਼ਿਕਰ ਕਰਨਗੇ। 1977 ਵਿਚ ਮਹਾਰਾਣੀ ਐਲਿਜ਼ਾਬੈਥ ਵਲੋਂ ਦਿੱਤੇ ਗਏ ਆਖਰੀ ਭਾਸ਼ਣ ਤੋਂ ਬਾਅਦ ਕੈਨੇਡਾ ਦੀ ਸੰਸਦ ਨੂੰ ਸੰਬੋਧਨ ਕਰਨ ਵਾਲੇ ਕਿੰਗ ਚਾਰਲਸ ਪਹਿਲੇ ਬ੍ਰਿਟਿਸ਼ ਰਾਜਾ ਹੋਣਗੇ।

ਨਾਨਾਇਮੋ ਦੇ ਇੱਕ ਸ਼ਖਸ ਨੂੰ ਨਸ਼ੇ ਅਤੇ ਹਥਿਆਰਾਂ ਦੇ ਮਾਮਲੇ ਵਿਚ ਪੰਜ ਸਾਲ ਦੀ ਸਜ਼ਾ ਹੋਈ ਹੈ ਅਤੇ ਉਸ 'ਤੇ ਹਥਿਆਰ ਰੱਖਣ 'ਤੇ ਲਾਈਫਟਾਈਮ ਪਾਬੰਦੀ ਲਗਾਈ ਗਈ ਹੈ। ਕੋਡੀ ਐਡਵਰਡ ਰੇਂਜਰ ਨਾਂ ਦੇ ਮੁਲਜ਼ਮ ਖਿਲਾਫ ਜਾਂਚ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਵਲੋਂ ਵੈਨਕੂਵਰ ਏਅਰਪੋਰਟ 'ਤੇ ਗੈਰ ਕਾਨੂੰਨੀ ਸਾਈਲੈਂਸਰ ਫੜ੍ਹੇ ਜਾਣ ਤੋਂ ਬਾਅਦ ਸ਼ੁਰੂ ਹੋਈ ਸੀ।

ਬੀਸੀ ਸਰਕਾਰ ਦੇ ਵਿਵਾਦਤ ਬਿੱਲ 14 ਅਤੇ ਬਿੱਲ 15 ਨੂੰ ਲੈ ਕੇ ਮਾਮਲਾ ਗਰਮਾ ਗਿਆ ਹੈ।ਫਰਸਟ ਨੇਸ਼ਨ ਲੀਡਰ ਦਾ ਕਹਿਣਾ ਹੈ ਕਿ ਅਮਰੀਕੀ ਟੈਰਿਫ ਦੀ ਆੜ ਵਿਚ ਲਿਆਂਦੇ ਗਏ ਇਹ ਦੋ ਬਿੱਲ ਜੇ ਇਸ ਹਫ਼ਤੇ ਪਾਸ ਹੋ ਜਾਂਦੇ ਹਨ ਤਾਂ ਪ੍ਰੀਮੀਅਰ ਡੇਵਿਡ ਈਬੀ ਦੀ ਸਰਕਾਰ ਨਾਲ ਫਰਸਟ ਨੇਸ਼ਨ ਦਾ ਵਿਸ਼ਵਾਸ ਦਾ ਯੁੱਗ ਸਮਾਪਤ ਹੋ ਜਾਵੇਗਾ।

ਕੈਨੇਡਾ ਦੀ ਵਿਦੇਸ਼ ਮਾਮਲਿਆਂ ਬਾਰੇ ਮੰਤਰੀ, ਅਨੀਤਾ ਆਨੰਦ ਨੇ ਐਤਵਾਰ ਨੂੰ ਭਾਰਤ ਦੇ ਵਿਦੇਸ਼ ਮੰਤਰੀ ਐਸ. ਜੈਸ਼ੰਕਰ ਨਾਲ ਟੈਲੀਫੋਨ ਜਰੀਏ ਗੱਲਬਾਤ ਕੀਤੀ। ਗੱਲਬਾਤ ਤੋਂ ਬਾਅਦ ਅਨੀਤਾ ਅਨੰਦ ਨੇ ਸੋਸ਼ਲ ਮੀਡੀਆ ਪਲੈਟਫਾਰਮ 'X' 'ਤੇ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਐਸ. ਜੈਸ਼ੰਕਰ ਨਾਲ ਭਾਰਤ ਅਤੇ ਕੈਨੇਡਾ ਦੇ ਰਿਸ਼ਤਿਆਂ ਮਜਬੂਤ ਕਰਨ, ਇਕਨੌਮਿਕ ਕੋਆਪ੍ਰੇਸ਼ਨ ਨੂੰ ਵਧਾਉਣ, ਅਤੇ ਸਾਂਝੀਆਂ ਤਰਜੀਹਾਂ 'ਤੇ ਅੱਗੇ ਵਧਣ ਸੰਬੰਧੀ ਚਰਚਾ ਪ੍ਰੋਡਕਟਿਵ ਰਹੀ। ਅਨੀਤਾ ਅਨੰਦ ਨੇ ਐਸ. ਜੈਸ਼ੰਕਰ ਦਾ ਧੰਨਵਾਦ ਵੀ ਕੀਤਾ।

ਲੈਂਗਲੀ 'ਚ 50 ਕਿਲੋਮੀਟਰ ਦੀ ਰਫਤਾਰ ਜ਼ੋਨ ਵਾਲੇ ਖੇਤਰ 'ਚ ਇੱਕ ਗੱਡੀ ਨੂੰ 124 ਕਿਲੋਮੀਟਰ ਦੀ ਰਫਤਾਰ 'ਤੇ ਦੜਾਉਂਦਿਆਂ ਕਲੌਕ ਕੀਤਾ ਗਿਆ।

ਵੈਨਕੂਵਰ ਵਿਚ ਬੀਤੇ ਕੱਲ੍ਹ ਬੀਸੀ ਖਾਲਸਾ ਦਰਬਾਰ ਅਤੇ ਗੁਰੂ ਨਾਨਕ ਜਹਾਜ਼ ਹੈਰੀਟੇਜ ਸੁਸਾਇਟੀ ਵਲੋਂ ਆਯੋਜਿਤ ਇੱਕ ਸਮਾਰੋਹ ਵਿਚ ਕਾਮਾਗਾਟਾਮਾਰੂ ਨੂੰ ਉਸ ਦੇ ਮੂਲ ਨਾਮ ਗੁਰੂ ਨਾਨਕ ਜਹਾਜ਼ ਵਜੋਂ ਬਹਾਲ ਕਰਨ ਸਬੰਧੀ ਸਰਬਸੰਮਤੀ ਨਾਲ ਮਤਾ ਪਾਸ ਕੀਤਾ ਗਿਆ।

ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇੱਕ ਵਿਅਕਤੀ ਦਰਸ਼ਨ ਆਰ ਸੋਨੀ ਨੂੰ ਆਪਣੀ ਪਤਨੀ ਨੂੰ ਮਾਰਨ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਸ 'ਤੇ ਕਤਲ ਦੀ ਕੋਸ਼ਿਸ਼ ਅਤੇ ਕਤਲ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਲਗਾਏ ਗਏ ਹਨ। ਇਹ ਇੰਡੀਆਨਾ ਦੀ ਹੈਮਿਲਟਨ ਕਾਊਂਟੀ ਦਾ ਮਾਮਲਾ ਹੈ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਕਿਹਾ ਹੈ ਕਿ ਉਨ੍ਹਾਂ ਦੀ ਪਾਰਟੀ ਅਮਰੀਕਾ ਦੀ ਟਰੇਡ ਵਾਰ ਨਾਲ ਨਜਿੱਠਣ ਲਈ ਕਾਰਨੀ ਸਰਕਾਰ ਦਾ ਪੂਰਨ ਸਹਿਯੋਗ ਕਰੇਗੀ। ਪੌਲੀਐਵ ਨੇ ਕਿਹਾ ਕਿ ਅਸੀਂ ਸਾਰੇ ਅਮਰੀਕਾ ਨਾਲ ਟੈਰਿਫ ਨੂੰ ਸਥਾਈ ਤੌਰ 'ਤੇ ਸਮਾਪਤ ਚਾਹੁੰਦੇ ਹਾਂ ਅਤੇ ਉਨ੍ਹਾਂ ਦੀ ਕੰਜ਼ਰਵੇਟਿਵ ਪਾਰਟੀ ਅਜਿਹਾ ਕਰਨ ਵਿਚ ਸਰਕਾਰ ਨਾਲ ਮਿਲ ਕੇ ਕੰਮ ਕਰੇਗੀ।