News

ਪ੍ਰੀਮੀਅਰ ਡੇਵਿਡ ਈਬੀ ਵਲੋਂ 1 ਜੂਨ ਤੋਂ ਸ਼ੁਰੂ ਕੀਤੇ ਜਾਣ ਵਾਲੇ ਏਸ਼ੀਆ ਦੇ 10 ਦਿਨਾਂ ਦੌਰੇ ਨੂੰ ਮਾਹਰਾਂ ਨੇ ਬਹੁਤ ਮਹੱਤਵਪੂਰਨ ਕਰਾਰ ਦਿੱਤਾ ਹੈ। ਯੂਨੀਵਰਸਿਟੀ ਆਫ਼ ਬੀ.ਸੀ. ਦੇ ਲਿਊ ਇੰਸਟੀਚਿਊਟ ਫਾਰ ਗਲੋਬਲ ਇਸ਼ੂਜ਼ ਦੇ ਡਾਇਰੈਕਟਰ ਤੇ ਪ੍ਰੋਫੈਸਰ ਕ੍ਰਿਸਟਨ ਹੋਪਵੈੱਲ ਨੇ ਸਾਡੀ ਭੂਗੋਲਿਕ ਸਥਿਤੀ ਕਾਰਨ ਹੁਣ ਤੱਕ ਸਾਡੇ ਬੀਸੀ ਅਤੇ ਕੈਨੇਡਾ ਦੀਆਂ ਕੰਪਨੀਆਂ ਲਈ ਏਸ਼ੀਆਈ ਬਾਜ਼ਾਰ ਦੀ ਤੁਲਨਾ ਵਿਚ ਅਮਰੀਕਾ ਨਾਲ ਵਪਾਰ ਕਰਨਾ ਬਹੁਤ ਸੌਖਾ ਰਿਹਾ ਹੈ ਤੇ ਸਾਡੇ ਵਪਾਰ ਦਾ ਲਗਭਗ 50 ਫੀਸਦੀ ਅਮਰੀਕਾ ਨੂੰ ਜਾਂਦਾ ਰਿਹਾ ਹੈ, ਜੋ ਸਾਡੇ ਲਈ ਇਸ ਵਕਤ ਸਭ ਤੋਂ ਵੱਡੀ ਕਮਜ਼ੋਰੀ ਹੈ।

ਬੀਸੀ ਦੇ ਪੀਸ ਰਿਵਰ ਇਲਾਕੇ ਵਿਚ ਲੱਗੀ ਅੱਗ ਦਾ ਸਾਈਜ਼ ਚਾਰ ਗੁਣਾ ਵੱਧ ਗਿਆ ਹੈ। ਬੀਤੇ ਕੱਲ੍ਹ ਹੀ ਇਸ ਦੇ ਨੇੜੇ ਸਥਿਤ ਕੈਲੀ ਲੇਕ ਕਮਿਊਨਿਟੀ ਦੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਜਾਣ ਦੇ ਹੁਕਮ ਦਿੱਤੇ ਗਏ ਸਨ। ਬੀ.ਸੀ. ਵਾਈਲਡਫਾਇਰ ਸਰਵਿਸ ਨੇ ਕਿਹਾ ਕਿ ਇਹ ਅੱਗ ਹੁਣ ਲਗਭਗ 46 ਵਰਗ ਕਿਲੋਮੀਟਰ ਤੱਕ ਫੈਲ ਗਈ ਹੈ, ਵੀਰਵਾਰ ਦੁਪਹਿਰ ਤੱਕ ਇਹ 11 ਵਰਗ ਕਿਲੋਮੀਟਰ ਸੀ।

ਕੈਨੇਡਾ ਦੀ ਫਰਸਟ ਕੁਆਰਟਰ ਜੀ.ਡੀ.ਪੀ. ਸਾਲਾਨਾ ਆਧਾਰ 'ਤੇ 2.2 ਫੀਸਦੀ ਵਧੀ ਹੈ, ਇਹ ਅਰਥਸ਼ਾਸਤਰੀ ਵਲੋਂ ਲਗਾਏ 1.7 ਫੀਸਦੀ ਅਨੁਮਾਨ ਤੋਂ ਤੇਜ਼ ਉਛਾਲ ਹੈ।

ਓਨਟਾਰੀਓ ਦੇ ਡਰਹਮ ਵਿਚ ਵੀਰਵਾਰ ਇੱਕ ਬਜ਼ੁਰਗ ਔਰਤ ਦੀ ਚਾਕੂ ਨਾਲ ਹੱਤਿਆ ਕਰਨ ਦੇ ਮਾਮਲੇ ਵਿਚ ਪੁਲਿਸ ਨੇ 14 ਸਾਲਾ ਲੜਕੇ ਨੂੰ ਫਰਸਟ ਡਿਗਰੀ ਮਰਡਰ ਦੇ ਦੋਸ਼ ਨਾਲ ਚਾਰਜ ਕੀਤਾ ਹੈ। ਦੋਸ਼ੀ ਸ਼ੁੱਕਰਵਾਰ ਨੂੰ ਡਰਹਮ ਰੀਜਨਲ ਪੁਲਿਸ ਡਿਵੀਜ਼ਨ ਤੋਂ ਓਸ਼ਾਵਾ ਕੋਰਟ ਵਿਚ ਜ਼ੂਮ ਰਾਹੀਂ ਪੇਸ਼ ਹੋਇਆ। ਯੂਥ ਕ੍ਰਿਮੀਨਲ ਜਸਟਿਸ ਐਕਟ ਦੇ ਨਿਯਮ ਦੇ ਮੱਦੇਨਜ਼ਰ ਉਸ ਦੀ ਪਛਾਣ ਗੁਪਤ ਰੱਖੀ ਗਈ ਹੈ।

ਕੈਨੇਡਾ ਵਿਚ ਹੋਣ ਵਾਲੀ ਜੀ-7 ਬੈਠਕ ਲਈ ਸਿੱਖ ਸੰਗਠਨਾਂ ਨੇ ਪ੍ਰਧਾਨ ਮੰਤਰੀ ਕਾਰਨੀ ਨੂੰ ਭਾਰਤ ਦੇ ਪੀ. ਐੱਮ. ਨਰਿੰਦਰ ਮੋਦੀ ਨੂੰ ਸੱਦਾ ਨਾ ਦੇਣ ਦੀ ਮੰਗ ਕੀਤੀ ਹੈ। ਜੀ 7 ਲੀਡਰਾਂ ਦੀ ਮੇਜ਼ਬਾਨੀ ਕੈਨੇਡਾ 15 ਜੂਨ ਤੋਂ 17 ਜੂਨ ਤੱਕ ਐਲਬਰਟਾ ਦੇ ਕਨਨਾਸਕਿਸ ਵਿਚ ਕਰ ਰਿਹਾ ਹੈ, ਜਿਸ ਵਿਚ ਫਰਾਂਸ, ਯੂਕੇ, ਜਰਮਨੀ, ਇਟਲੀ, ਜਾਪਾਨ, ਅਮਰੀਕਾ ਦੇ ਨੇਤਾਵਾਂ ਤੋਂ ਇਲਾਵਾ ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਦੇ ਸ਼ਾਮਲ ਹੋਣ ਦੀ ਉਮੀਦ ਹੈ।

ਐਡਮਿੰਟਨ ਦੇ ਜੇਲ੍ਹ ਔਫੀਸਰਜ਼ ਨੂੰ ਝੂਠੇ ਦਸਤਾਵੇਜ਼ ਦਿਖਾ ਕੇ ਰਿਹਾਅ ਹੋਈ ਔਰਤ ਨੂੰ ਬੀ.ਸੀ.ਤੋਂ ਹਿਰਾਸਤ ਵਿਚ ਲਿਆ ਗਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਮੈਕੇਂਜੀ ਡਾਨ ਹਾਰਡੀ ਨੂੰ ਰੇਵਲਸਟੋਕ ਤੋਂ ਫੜਿਆ ਗਿਆ। ਉਸ ਦੇ ਨਾਲ ਉਸ ਦਾ ਸਾਥੀ 27 ਸਾਲਾ ਡੇਵਿਡ ਜੋਸਫ਼ ਵੁੱਡ ਵੀ ਕਾਬੂ ਕੀਤਾ ਗਿਆ, ਜਿਸ ਨੇ ਉਸ ਦੀ ਰਿਹਾਈ ਵਿਚ ਮਦਦ ਕੀਤੀ ਸੀ।

ਬੀ.ਸੀ. ਐਨ.ਡੀ.ਪੀ. ਦੀ ਸਾਬਕਾ ਮੰਤਰੀ ਤੇ ਸੂਬੇ ਦੀ ਪਹਿਲੀ ਫਰਸਟ ਨੇਸ਼ਨ ਵਿਧਾਇਕ ਮੇਲਾਨੀ ਮਾਰਕ ਨੇ ਬਿੱਲ 15 ਨੂੰ ਲੈ ਕੇ ਪ੍ਰੀਮੀਅਰ ਡੇਵਿਡ ਈਬੀ ਅਤੇ ਉਨ੍ਹਾਂ ਦੇ ਮੰਤਰੀ ਮੰਡਲ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਵਿਵਾਦਪੂਰਨ ਬਿੱਲ ਪਾਸ ਕਰਕੇ ਫਸਟ ਨੇਸ਼ਨਜ਼, ਸਥਾਨਕ ਸਰਕਾਰਾਂ ਅਤੇ ਵਾਤਾਵਰਣ ਪ੍ਰੇਮੀ ਦੀਆਂ ਚਿੰਤਾਵਾਂ ਨੂੰ ਦਰਕਿਨਾਰ ਕੀਤਾ ਹੈ।

ਰਿਚਮੰਡ ਵਿਚ 6 ਸਾਲ ਪਹਿਲਾਂ 58 ਸਾਲਾ ਸਟੀਫਨ ਚੋਂਗ ਦੀ ਸ਼ੱਕੀ ਹਾਲਤ ਵਿਚ ਹੋਈ ਮੌਤ ਦੇ ਮਾਮਲੇ ਵਿਚ ਕਤਲ ਲਈ ਜ਼ਿੰਮੇਵਾਰ ਵਿਅਕਤੀ ਦੀ ਗ੍ਰਿਫ਼ਤਾਰੀ ਲਈ ਸੂਚਨਾ ਦੇਣ 'ਤੇ $10,000 ਦੇ ਇਨਾਮ ਦੀ ਘੋਸ਼ਣਾ ਕੀਤੀ ਗਈ ਹੈ। ਸੋਸਾਇਟੀ ਆਫ਼ ਨੋਟਰੀਜ਼ ਪਬਲਿਕ ਆਫ ਬੀ.ਸੀ. ਨੇ ਕਿਹਾ ਕਿ ਜੇ ਕਿਸੇ ਕੋਲ ਚੋਂਗ ਦੀ ਹੱਤਿਆ ਲਈ ਜ਼ਿੰਮੇਵਾਰ ਵਿਅਕਤੀ ਬਾਰੇ ਜਾਣਕਾਰੀ ਹੈ ਤਾਂ ਉਸ ਨੂੰ ਏਕੀਕ੍ਰਿਤ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਨੂੰ ਸੂਚਨਾ ਦੇਣ ਦੇ ਬਦਲੇ ਇਨਾਮੀ ਰਾਸ਼ੀ ਦਿੱਤੀ ਜਾਵੇਗੀ।

ਸਟੈਨਲੀ ਕੱਪ ਦੇ ਡਿਫੈਂਡਿੰਗ ਚੈਂਪੀਅਨਸ ਫਲੋਰੀਡਾ ਪੈਂਥਰਸ ਨੇ ਐਨ.ਐਚ.ਐਲ ਦੇ ਈਸਟਰਨ ਕਾਨਫਰੰਸ ਫਾਈਨਲਸ ਵਿੱਚ ਬਾਜ਼ੀ ਮਾਰੀ ਹੈ। ਕੱਲ੍ਹ ਦੇ ਸੀਰੀਜ਼ ਦੇ ਪੰਜਵੇ ਮੁਕਾਬਲੇ ਵਿੱਚ ਪੈਂਥਰਸ ਨੇ ਕੈਰੋਲੀਨਾ ਹਰੀਕੇਨਸ ਨੂੰ 5-3 ਨਾਲ ਮਾਤ ਦੇ ਕੇ ਇਸ ਸੀਰੀਜ਼ ਨੂੰ 4-1 ਦੇ ਫਰਕ ਨਾਲ ਜਿੱਤ ਲਿਆ।