18.12C Vancouver 18.12C VancouverAug 26, 2026 5:22 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ 24 ਨਾਗਰਿਕ ਨੇਪਾਲ ਅਤੇ ਚੀਨ ਦੇ ਸਰਹੱਦੀ ਖੇਤਰ ਵਿਚ ਆਏ ਹੜ੍ਹਾਂ ਅਤੇ ਢਿੱਗਾਂ ਡਿੱਗਣ ਵਿਚਕਾਰ ਲਾਪਤਾ ਹੋ ਗਏ ਹਨ। ਨੇਪਾਲ ਦੇ ਪ੍ਰਧਾਨ ਮੰਤਰੀ ਦਫ਼ਤਰ ਮੁਤਾਬਕ, ਸਿਰਫ਼ ਨੇਪਾਲ ਵਾਲੇ ਪਾਸੇ ਹੀ 95 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ, ਜਦੋਂ ਕਿ ਚੀਨ ਦੇ ਸਰਕਾਰੀ ਮੀਡੀਆ ਨੇ ਤਿੱਬਤ ਦੇ Gyirong County ਵਿਚ ਤਿੰਨ ਮੌਤਾਂ ਅਤੇ 265 ਲੋਕਾਂ ਦੇ ਲਾਪਤਾ ਹੋਣ ਦੀ ਪੁਸ਼ਟੀ ਕੀਤੀ ਹੈ।
ਨੇਪਾਲ ਟੂਰਿਜ਼ਮ ਬੋਰਡ ਦੇ ਬੁਲਾਰੇ ਸੁਨੀਲ ਸ਼ਰਮਾ ਮੁਤਾਬਕ, ਕੁੱਲ 403 ਲਾਪਤਾ ਸੈਲਾਨੀਆਂ ਵਿਚੋਂ ਸਭ ਤੋਂ ਵੱਧ 133 ਭਾਰਤੀ ਨਾਗਰਿਕ ਹਨ, ਜੋ ਤਿੱਬਤ ਵਿਚ ਮਾਊਂਟ ਕੈਲਾਸ਼ ਦੀ ਯਾਤਰਾ 'ਤੇ ਸਨ। ਇਸ ਤੋਂ ਇਲਾਵਾ 47 ਅਮਰੀਕੀ, 34 ਆਸਟ੍ਰੇਲੀਆਈ, 33 ਬ੍ਰਿਟਿਸ਼ ਅਤੇ 24 ਕੈਨੇਡੀਅਨ ਵੀ ਲਾਪਤਾ ਹਨ।
ਇਹ ਤਬਾਹੀ ਹਿਮਾਲੀਅਨ ਖੇਤਰ ਦੀ ਇੱਕ ਨਦੀ ਵਿਚ ਚੱਟਾਨਾਂ ਅਤੇ ਚਿੱਕੜ ਦਾ ਇੱਕ ਬਹੁਤ ਵੱਡਾ ਹਿੱਸਾ ਡਿੱਗਣ ਨਾਲ ਆਏ ਹੜ੍ਹ ਕਰਕੇ ਹੋਈ ਹੈ, ਜਿਸ ਨੇ ਨੁਵਾਕੋਟ ਜ਼ਿਲ੍ਹੇ ਸਮੇਤ ਕਈ ਇਲਾਕਿਆਂ ਵਿਚ ਇਮਾਰਤਾਂ, ਸੜਕਾਂ ਅਤੇ ਵਾਹਨਾਂ ਨੂੰ ਮਲਬੇ ਹੇਠ ਦੱਬ ਦਿੱਤਾ ਹੈ। ਕੈਨੇਡਾ ਦੀ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਮੁਤਾਬਕ, ਕੌਂਸਲਰ ਅਧਿਕਾਰੀ ਪ੍ਰਭਾਵਿਤ ਖੇਤਰਾਂ ਵਿਚ ਮੌਜੂਦ ਆਪਣੇ ਨਾਗਰਿਕਾਂ ਦੀ ਸੁਰੱਖਿਆ ਨੂੰ ਲੈ ਕੇ ਸਥਾਨਕ ਪ੍ਰਸ਼ਾਸਨ ਨਾਲ ਲਗਾਤਾਰ ਸੰਪਰਕ ਵਿਚ ਹੈ।
