ਆਖਰੀ ਗੇਂਦ ’ਤੇ ਛੱਕਾ, ਟੋਰੌਂਟੋ ਸਿਕਸਰਸ ਨੇ ਜਿੱਤਿਆ ਕੈਨੇਡਾ ਸੁਪਰ ਸਿਕਸਟੀ ਦਾ ਖਿਤਾਬ

ਕੈਨੇਡਾ ਸੁਪਰ ਸਿਕਸਟੀ (60) ਟੂਰਨਾਮੈਂਟ ਦਾ ਖ਼ਿਤਾਬੀ ਮੁਕਾਬਲਾ ਕੱਲ੍ਹ ਰਾਤ ਬੀ.ਸੀ. ਪਲੇਸ ਸਟੇਡੀਅਮ ਵਿਖੇ ਖੇਡਿਆ ਗਿਆ। ਲੀਗ ਦੇ ਦੂਜੇ ਸੀਜਨ 'ਚ ਟੋਰੌਂਟੋ ਸਿਕਸਰਸ ਨੇ ਆਖਰੀ ਗੇਂਦ 'ਤੇ ਛੱਕਾ ਜੜ ਕੇ ਵੈਨਕੂਵਰ ਐਂਕਰਸ ਖਿਲਾਫ ਬਾਜੀ ਮਾਰੀ ਅਤੇ ਖਿਤਾਬ ਆਪਣੇ ਨਾਮ ਕੀਤਾ। ਇਸ ਆਖਰੀ ਮੁਕਾਬਲੇ ਦੌਰਾਨ ਜਿੱਥੇ ਮੈਦਾਨ 'ਤੇ ਰੋਚਕ ਮੁਕਾਬਲਾ ਵੇਖਣ ਨੂੰ ਮਿਲਿਆ ਉੱਥੇ ਹੀ ਮੈਦਾਨ ਦੇ ਬਾਹਰ ਕੌਮੈਂਟਰੀ ਬੌਕਸ 'ਚ ਵੀ ਇਤਿਹਾਸਿਕ ਦ੍ਰਿਸ਼ ਵੇਖਣ ਨੂੰ ਮਿਲੇ।

ਪਾਕਿਸਤਾਨ ਦੇ ਲੀਜੈਂਡਰੀ ਕ੍ਰਿਕਟ ਖਿਡਾਰੀ ਅਤੇ ਟੈਸਟ ਅਤੇ ਵਨਡੇ ਮੈਚਾਂ 'ਚ 900 ਤੋਂ ਵੱਧ ਵਿਕਟ ਹਾਸਿਲ ਕਰ ਚੁੱਕੇ ਵਸੀਮ ਅਕਰਮ ਨੇ ਪਹਿਲੀ ਵਾਰ ਪੰਜਾਬੀ ਕਮੈਂਟਰੀ ਕੀਤੀ। ਕਨੈਕਟ 91.5 ਐਫ.ਐਮ. ਕੈਨੇਡਾ ਸੁਪਰ ਸਿਕਸਟੀ ਦਾ ਆਫੀਸ਼ੀਅਲ ਰੇਡੀਓ ਬ੍ਰੌਡਕਾਸਟ ਪਾਰਟਨਰ ਸੀ, ਅਤੇ ਕਨੈਕਟ ਐਫ.ਐਮ. ਦੇ ਕਮੈਂਟਰੀ ਬੂਥ ਵਿੱਚ ਵੈਨਕੂਵਰ ਐਂਕਰਸ ਦੀ ਪਾਰੀ ਦੇ 7ਵੇਂ ਤੋਂ 10ਵੇਂ ਓਵਰ ਤੱਕ ਵਸੀਮ ਅਕਰਮ ਨੇ ਪੰਜਾਬੀ ਵਿੱਚ ਕਮੈਂਟਰੀ ਕੀਤੀ।

ਇਸ ਦੌਰਾਨ ਉਨ੍ਹਾਂ ਨਿਊਜ ਡਾਇਰੈਕਟਰ ਪਰਵੇਜ਼ ਸੰਧੂ ਨਾਲ ਗੱਲਬਾਤ ਦੌਰਾਨ ਆਖਿਆ ਕਿ ਉਹ ਆਪਣੇ ਕ੍ਰਿਕਟ ਜੀਵਨ 'ਚ ਪਹਿਲੀ ਵਾਰ ਪੰਜਾਬੀ ਵਿੱਚ ਕਮੈਂਟਰੀ ਕਰ ਰਹੇ ਹਨ ਅਤੇ ਉਨ੍ਹਾਂ ਨੂੰ ਬੇਹੱਦ ਅਨੰਦ ਆ ਰਿਹਾ ਹੈ।