28.62C Vancouver 28.62C VancouverJan 13, 2025 7:34 PM -
ਲਾਸ ਏਂਜਲਸ ਵਿਚ ਫੈਲੀ ਅੱਗ ਨਾਲ 24 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਪਿਛਲੇ 7 ਦਿਨਾਂ ਤੋਂ ਅੱਗ ’ਤੇ ਪੂਰੀ ਤਰ੍ਹਾਂ ਕਾਬੂ ਨਹੀਂ ਪਾਇਆ ਜਾ ਸਕਿਆ ਹੈ। ਉਥੇ ਹੀ ਰਾਸ਼ਟਰੀ ਮੌਸਮ ਸੇਵਾ ਨੇ ਲਾਸ ਏਂਜਲਸ ਖੇਤਰ ਲਈ ਖ਼ਤਰਨਾਕ ਮੌਸਮ ਦੀ ਚੇਤਾਵਨੀ ਜਾਰੀ ਕੀਤੀ ਹੈ। ਮੌਸਮ ਏਜੰਸੀ ਦਾ ਕਹਿਣਾ ਹੈ ਕਿ ਮੰਗਲਵਾਰ ਨੂੰ 110 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫਤਾਰ ਨਾਲ ਹਵਾਵਾਂ ਚੱਲ ਸਕਦੀਆਂ ਹਨ, ਜਿਸ ਨਾਲ ਅੱਗ ਵਿਚ ਵਿਸਫੋਟਕ ਵਾਧਾ ਹੋ ਸਕਦਾ ਹੈ।
ਇਸ ਸਮੇਂ ਲਾਸ ਏਂਜਲਸ ਖੇਤਰ ਵਿਚ ਤਿੰਨ ਵੱਡੀਆਂ ਅੱਗਾਂ ਬਲ ਰਹੀਆਂ ਹਨ, ਜਿਨ੍ਹਾਂ ਵਿਚੋਂ ਪੈਲੀਸੇਡਸ ਦੀ ਅੱਗ ਸਭ ਤੋਂ ਵੱਡੀ ਹੈ ਅਤੇ ਇਸ ਦੇ ਸਿਰਫ 13 ਫੀਸਦੀ ਹਿੱਸੇ ’ਤੇ ਕਾਬੂ ਪਾਇਆ ਗਿਆ ਹੈ। ਕੈਲੀਫੋਰਨੀਆ ਸਟੇਟ ਵਲੋਂ ਕੈਨੇਡਾ ਅਤੇ ਮੈਕਸੀਕੋ ਦੇ ਅੱਗ ਬੁਝਾਊ ਅਮਲੇ ਵੀ ਮਦਦ ਲਈ ਬੁਲਾਏ ਗਏ ਹਨ।
ਕੈਲੀਫੋਰਨੀਆ ਫਾਇਰ ਅਥਾਰਟੀ ਦਾ ਕਹਿਣਾ ਹੈ ਕਿ ਪਿਛਲੇ ਹਫ਼ਤੇ ਤੱਕ ਸ਼ਹਿਰ ਦਾ 40,000 ਏਕੜ ਖੇਤਰ ਅੱਗ ਵਿਚ ਝੁਲਸ ਚੁੱਕਾ ਹੈ। ਗਵਰਨਰ ਗੈਵਿਨ ਨਿਊਸਮ ਨੇ ਕਿਹਾ ਕਿ ਦੱਖਣੀ ਕੈਲੀਫੋਰਨੀਆ ਵਿਚ ਲੱਗੀ ਜੰਗਲੀ ਅੱਗ ਅਮਰੀਕੀ ਇਤਿਹਾਸ ਦੀ ਸਭ ਤੋਂ ਭਿਆਨਕ ਕੁਦਰਤੀ ਆਫ਼ਤ ਹੋ ਸਕਦੀ ਹੈ।
