17.15C Vancouver 17.15C VancouverJan 15, 2025 5:33 PM - Connect Newsroom
ਲਾਸ ਏਂਜਲਸ ਵਿਚ ਫੈਲੀ ਜੰਗਲੀ ਅੱਗ ਵਿਚ ਹੁਣ ਤੱਕ 25 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂ ਕਿ 30 ਦੇ ਕਰੀਬ ਲੋਕ ਲਾਪਤਾ ਹਨ। ਇਸ ਵਿਚਕਾਰ ਪੁਲਿਸ ਨੇ ਪ੍ਰਭਾਵਿਤ ਇਲਾਕਿਆਂ ਵਿਚ 50 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਨ੍ਹਾਂ ਲੋਕਾਂ ’ਤੇ ਲੁੱਟ-ਖੋਹ, ਅੱਗ ਨਾਲ ਪ੍ਰਭਾਵਿਤ ਇਲਾਕਿਆਂ ਵਿਚ ਡਰੋਨ ਉਡਾਉਣ ਅਤੇ ਕਰਫਿਊ ਦੀ ਉਲੰਘਣਾ ਸਮੇਤ ਕਈ ਦੋਸ਼ ਹਨ।
ਫਿਲਹਾਲ ਪੈਲੀਸੇਡਸ ਅਤੇ ਈਟਨ ਨੂੰ ਛੱਡ ਕੇ ਬਾਕੀ ਜਗ੍ਹਾ ਅੱਗ ਨੂੰ ਕਾਬੂ ਕਰ ਲਿਆ ਗਿਆ ਹੈ ਪਰ ਨੈਸ਼ਨਲ ਮੌਸਮ ਸਰਵਿਸ ਨੇ ਬੁੱਧਵਾਰ ਨੂੰ ਤੇਜ਼ ਹਵਾਵਾਂ ਚੱਲਣ ਦੀ ਸੰਭਾਵਨਾ ਦੇ ਚੱਲਦੇ ਲਾਸ ਏਂਜਲਸ ਅਤੇ ਵੈਂਚੁਰਾ ਦੇ ਕੁਝ ਹਿੱਸਿਆਂ ਲਈ ਫਿਰ ਤੋਂ ਰੈੱਡ ਫਲੈਗ ਚਿਤਾਵਨੀਆਂ ਨੂੰ ਬਹਾਲ ਕੀਤਾ ਹੈ।
ਹਾਲਾਂਕਿ, ਮੌਸਮ ਏਜੰਸੀ ਨੇ ਕਿਹਾ ਕਿ ਹਵਾਵਾਂ ਪਿਛਲੇ ਹਫ਼ਤੇ ਜਿੰਨੀਆਂ ਤੇਜ਼ ਹੋਣ ਦੀ ਉਮੀਦ ਨਹੀਂ ਹੈ। ਦੱਸ ਦੇਈਏ ਕਿ ਹੁਣ ਤੱਕ ਇਸ ਵਿਨਾਸ਼ਕਾਰੀ ਅੱਗ ਵਿਚ 12 ਹਜ਼ਾਰ ਤੋਂ ਵੱਧ ਇਮਾਰਤਾਂ ਨਸ਼ਟ ਹੋ ਚੁੱਕੀਆਂ ਹਨ ਅਤੇ 155 ਵਰਗ ਕਿਲੋਮੀਟਰ ਦਾ ਇਲਾਕਾ ਰਾਖ਼ ਹੋ ਚੁੱਕਾ ਹੈ।
