13.3C Vancouver 13.3C VancouverJul 1, 2021 1:39 AM -
ਬੀ.ਸੀ. ਕੋਰੋਨਰ ਸਰਵਿਸ ਦਾ ਕਹਿਣਾ ਹੈ ਕਿ ਸ਼ੁੱਕਰਵਾਰ ਤੋਂ ਸੂਬੇ 'ਚ 486 ਅਜਿਹੀਆਂ ਮੌਤਾਂ ਰਿਪੋਰਟ ਹੋਈਆਂ ਹਨ ਜਿੱਥੇ ਪੀੜਤਾਂ ਨੇ ਅਚਾਨਕ ਦਮ ਤੋੜ ਦਿੱਤਾ ਸੀ।
ਚੀਫ਼ ਕੋਰੋਨਰ ਲੀਜ਼ਾ ਲਾਪੌਂਟ ਦਾ ਕਹਿਣਾ ਹੈ ਕਿ ਇਹ ਅਨੁਮਾਨ ਅਨੁਸਾਰ 5 ਦਿਨਾਂ ਦੇ ਸਮੇਂ 'ਚ ਹੋਣ ਵਾਲੀਆਂ ਮੌਤਾਂ 'ਚ 195% ਦਾ ਵਾਧਾ ਦਰਸ਼ਾਉਂਦਾ ਹੈ।
ਆਮ ਤੌਰ 'ਤੇ ਇੰਨੇ ਸਮੇਂ 'ਚ 165 ਮੌਤਾਂ ਰਿਪੋਰਟ ਹੁੰਦੀਆਂ ਹਨ।
ਪਰ ਮੌਤਾਂ ਦੇ ਇਸ ਵਾਧੇ ਨੂੰ ਹੀਟ ਵੇਵ ਦੇ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਹਾਲ ਦੀ ਘੜੀ ਇਹਨਾਂ ਸਾਰੀਆਂ ਮੌਤਾਂ ਨੂੰ ਹੀਟ ਵੇਵ ਦੇ ਕਾਰਨ ਹੋਈਆਂ ਨਹੀਂ ਮੰਨਿਆ ਜਾ ਸਕਦਾ ਪਰ ਉਨ੍ਹਾਂ ਕਿਹਾ ਕਿ ਇਹ ਮੰਨਣਾ ਗਲਤ ਨਹੀਂ ਹੋਵੇਗਾ ਕਿ ਅਚਾਨਕ ਹੋਏ ਮੌਤਾਂ ਦੇ ਇਸ ਵਾਧੇ 'ਚ ਮੌਸਮ ਨੇ ਭੂਮਿਕਾ ਨਿਭਾਈ ਹੋ ਸਕਦੀ ਹੈ।
ਇਹ ਜਾਣਕਾਰੀਆਂ ਉਸ ਵਾਲੇ ਸਾਹਮਣੇ ਆਈਆਂ ਹਨ ਜਦ ਵੈਨਕੂਵਰ 'ਚ ਪੁਲਿਸ ਦਾ ਕਹਿਣਾ ਹੈ ਕਿ ਇਲਾਕੇ 'ਚ ਮੰਗਲਵਾਰ ਨੂੰ 53 ਹੋਰ ਮੌਤਾਂ ਰਿਪੋਰਟ ਹੋਈਆਂ ਹਨ।
ਅਚਾਨਕ ਹੋਈਆਂ ਇਹਨਾਂ ਮੌਤਾਂ 'ਚ ਹੀਟ ਵੇਵ ਨੂੰ ਇੱਕ ਕਾਰਨ ਵਜੋਂ ਵੇਖਿਆ ਜਾ ਰਿਹਾ ਹੈ।
ਇਸ ਤੋਂ ਪਹਿਲਾਂ ਬੀਤੇ ਕੱਲ ਵੀ.ਪੀ.ਡੀ. ਨੇ ਜਾਣਕਾਰੀ ਦਿੱਤੀ ਸੀ ਕਿ ਸ਼ੁੱਕਰਵਾਰ ਤੋਂ ਕੱਲ ਦੁਪਹਿਰ ਤਕ 65 ਮੌਤਾਂ ਰਿਪੋਰਟ ਹੋਈਆਂ ਸਨ ਜਿੰਨਾ ਨੂੰ ਹੀਟ ਵੇਵ ਨਾਲ ਸੰਬੰਧਤ ਮੰਨਿਆ ਜਾ ਰਿਹਾ ਹੈ।
ਸਾਰਜੈਂਟ ਸਟੀਵ ਐਡੀਸਨ ਦਾ ਕਹਿਣਾ ਸੀ ਕਿ, ਮਾਮਲਿਆਂ 'ਚ ਇੰਨੀ ਵੱਡੀ ਗਿਣਤੀ 'ਚ ਵਾਧੇ ਕਾਰਨ ਉਹ ਵਧੇਰੇ ਅਫ਼ਸਰ ਤਾਇਨਾਤ ਕਰ ਰਹੇ ਹਨ ਤਾਂ ਜੋ ਵੱਧ ਤੋਂ ਵੱਧ ਮੌਕਿਆਂ 'ਤੇ ਜਲਦੀ ਤੋਂ ਜਲਦੀ ਪਹੁੰਚਿਆ ਜਾ ਸਕੇ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਆਮ ਦਿਨਾਂ 'ਚ ਅਜਿਹੀਆਂ ਅਚਾਨਕ ਹੋਣ ਵਾਲੀਆਂ ਮੌਤਾਂ ਦੀ ਗਿਣਤੀ 3 ਤੋਂ 4 ਰਹਿੰਦੀ ਹੈ ਪਰ ਬੀਤੇ ਕੁਝ ਦਿਨਾਂ 'ਚ ਇਹ ਮੌਤਾਂ ਦੀ ਗਿਣਤੀ 13 ਤੋਂ 14 ਰਿਪੋਰਟ ਹੁੰਦੀ ਰਹੀ ਹੈ।
