ਅਮਰੀਕਾ ਨੇ ਡਰੱਗ ਜਾਂਚ ਸਬੰਧੀ 7 ਕੈਨੇਡੀਅਨਾਂ ਨੂੰ ਕੀਤਾ ਚਾਰਜ

ਕੈਨੇਡਾ ਤੋਂ ਭਗੌੜੇ ਸਾਬਕਾ ਓਲੰਪੀਅਨ ਰਿਆਨ ਜੇਮਸ ਵੈਡਿੰਗ ਦੇ ਇੰਟਰਨੈਸ਼ਨਲ ਕੋਕੀਨ-ਤਸਕਰੀ ਨੈੱਟਵਰਕ ਨਾਲ ਸਬੰਧ ਵਿਚ 7 ਕੈਨੇਡੀਅਨਾਂ ਨੂੰ ਅਮਰੀਕਾ ਵਿਚ ਚਾਰਜ ਕੀਤਾ ਗਿਆ ਹੈ, ਜਿਨ੍ਹਾਂ ਵਿਚ ਇੱਕ ਵਕੀਲ ਵੀ ਸ਼ਾਮਲ ਹੈ। ਵੈਡਿੰਗ ਐਫ.ਬੀ.ਆਈ. ਦਾ ਵੀ ਵਾਂਟੇਡ ਹੈ। ਆਰਸੀਐਮਪੀ ਕਮਿਸ਼ਨਰ ਮਾਈਕਲ ਡੂਹੇਮ ਨੇ ਅੱਜ ਵਾਸ਼ਿੰਗਟਨ ਵਿਚ ਅਮਰੀਕੀ ਅਟਾਰਨੀ ਜਨਰਲ ਪੈਮ ਬੋਂਡੀ ਅਤੇ ਐਫਬੀਆਈ ਡਾਇਰੈਕਟਰ ਕੈਸ਼ ਪਟੇਲ ਨਾਲ ਦੋਸ਼ਾਂ ਦਾ ਐਲਾਨ ਕੀਤਾ।

ਆਰਸੀਐਮਪੀ ਕਮਿਸ਼ਨਰ ਨੇ ਕਿਹਾ ਕਿ ਜੇਮਸ ਵੈਡਿੰਗ ਨਾਲ ਜੁੜੇ ਇਨ੍ਹਾਂ ਸ਼ੱਕੀਆਂ ਨੂੰ ਇਸ ਹਫ਼ਤੇ ਕਿਊਬੈਕ, ਓਨਟਾਰੀਓ ਅਤੇ ਐਲਬਰਟਾ ਤੋਂ ਅਮਰੀਕਾ ਹਵਾਲੇ ਕਰਨ ਲਈ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਯੂ.ਐਸ. ਸਟੇਟ ਡਿਪਾਰਟਮੈਂਟ ਵਲੋਂਜੇਮਸ ਵੈਡਿੰਗ ਦੀ ਗ੍ਰਿਫਤਾਰੀ ਲਈ ਸੂਚਨਾ ਦੇਣ 'ਤੇ ਇਨਾਮ 15 ਮਿਲੀਅਨ ਅਮਰੀਕੀ ਡਾਲਰ ਤੱਕ ਵਧਾ ਦਿੱਤਾ ਗਿਆ ਹੈ।

ਮੰਨਿਆ ਜਾ ਰਿਹਾ ਹੈ ਕਿ ਉਹ ਮੈਕਸੀਕੋ ਵਿਚ ਲੁਕਿਆ ਹੋਇਆ ਹੈ। ਐਫ.ਬੀ.ਆਈ. ਦਾ ਕਹਿਣਾ ਹੈ ਕਿ ਵੈਡਿੰਗ ਅਤੇ ਉਸ ਦੇ ਸਾਥੀ ਐਂਡਰਿਊ ਕਲਾਰਕ ਨੇ ਡਰੱਗ ਦੀ ਖੇਪ ਚੋਰੀ ਹੋਣ ਦਾ ਬਦਲਾ ਲੈਣ ਲਈ ਓਨਟਾਰੀਓ ਦੇ ਕੇਲਡਨ ਅਤੇ ਬਰੈਂਪਟਨ ਵਿਚ ਇਸ ਮਾਮਲੇ ਵਿਚ ਸ਼ਾਮਲ ਲੋਕਾਂ ਨੂੰ ਮੌਤ ਦੇ ਘਾਟ ਉਤਾਰਨ ਦਾ ਹੁਕਮ ਦਿੱਤਾ ਸੀ ਪਰ ਇਹ ਪੀੜਤ ਅਸਲ ਨਿਸ਼ਾਨਾ ਨਹੀਂ ਸਨ ਅਤੇ ਗਲਤੀ ਨਾਲ ਮਾਰੇ ਗਏ ਸਨ। ਇਸ ਵਿਚ ਬਰੈਂਪਟਨ ਨਿਵਾਸੀ ਮੁਹੰਮਦ ਜ਼ਫਰ ਅਤੇ ਕੇਲਡਨ ਵਿਚ ਬਜ਼ੁਰਗ ਜੋੜੇ ਜਗਤਾਰ ਸਿੰਘ ਅਤੇ ਹਰਭਜਨ ਕੌਰ ਦੀ ਮੌਤ ਹੋਈ ਸੀ, ਜਿਨ੍ਹਾਂ ਦਾ ਇਸ ਨਾਲ ਕੋਈ ਲੈਣ-ਦੇਣਾ ਨਹੀਂ ਸੀ।