ਅਮਰੀਕਾ ਦੇ ਇੱਕ ਛੋਟੇ ਕੈਂਪ ’ਤੇ ਬੀਤੀ ਰਾਤ ਡਰੋਨ ਨਾਲ ਹਮਲਾ ਹੋਇਆ

ਜਾਰਡਨ ਵਿਚ ਸੀਰੀਆ ਦੇ ਸਰਹੱਦ ਨੇੜੇ ਅਮਰੀਕਾ ਦੇ ਇੱਕ ਛੋਟੇ ਕੈਂਪ ’ਤੇ ਬੀਤੀ ਰਾਤ ਡਰੋਨ ਹਮਲਾ ਹੋਇਆ ਹੈ, ਜਿਸ ਵਿਚ ਤਿੰਨ ਫੌਜੀ ਮਾਰੇ ਗਏ ਅਤੇ 30 ਤੋਂ ਵੱਧ ਜ਼ਖਮੀ ਹੋ ਗਏ।

ਇਸ ਹਮਲੇ ਪਿੱਛੇ ਈਰਾਨ ਦਾ ਹੱਥ ਹੋਣ ਦੇ ਦੋਸ਼ ਲੱਗੇ ਹਨ ਅਤੇ ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਇਸ ਦਾ ਕਰਾਰਾ ਜਵਾਬ ਦੇਣ ਦੀ ਚਿਤਾਵਨੀ ਦਿੱਤੀ ਹੈ। ਮਿਡਲ ਈਸਟ ਵਿਚ ਇਸ ਹਮਲੇ ਨਾਲ ਸਥਿਤੀ ਹੋਰ ਵੀ ਤਣਾਅਪੂਰਨ ਹੋਣ ਦਾ ਖਦਸ਼ਾ ਹੈ, ਜੋ ਗਾਜ਼ਾ ਵਿਚ ਇਜ਼ਰਾਇਲ ਅਤੇ ਹਮਾਸ ਨਾਲ ਪਹਿਲਾਂ ਹੀ ਖਰਾਬ ਚੱਲ ਰਹੀ ਹੈ।

ਅਧਿਕਾਰੀ ਨੇ ਕਿਹਾ ਕਿ ਡਰੋਨ ਹਮਲੇ ਪਿੱਛੇ ਈਰਾਨ ਸਮਰਥਿਤ ਅੱਤਵਾਦੀ ਸਨ ਅਤੇ ਇਹ ਸੀਰੀਆ ਤੋਂ ਆਇਆ ਜਾਪਦਾ ਸੀ। ਉਨ੍ਹਾਂ ਕਿਹਾ ਕਿ ਇਸ ਗੱਲ ਦਾ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਇਸ ਪਿੱਛੇ ਕਿਹੜਾ ਅੱਤਵਾਦੀ ਗਰੁੱਪ ਖਾਸ ਤੌਰ ’ਤੇ ਜ਼ਿੰਮੇਵਾਰ ਹੈ।

ਓਧਰ, ਈਰਾਨ ਨੇ ਹਮਲੇ ਵਿਚ ਕਿਸੇ ਵੀ ਤਰ੍ਹਾਂ ਸ਼ਾਮਲ ਹੋਣ ਤੋਂ ਇਨਕਾਰ ਕੀਤਾ ਹੈ ਅਤੇ ਸਾਰੇ ਆਰੋਪ ਬੇਬੁਨਿਆਦ ਕਰਾਰ ਦਿੱਤੇ ਹਨ। ਉਥੇ ਹੀ, ਅਮਰੀਕਾ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜ਼ਖਮੀਆਂ ਦੀ ਗਿਣਤੀ ਵਧਣ ਦੀ ਉਮੀਦ ਹੈ।